Vidyakshara Stotram

विद्याक्षरस्तोत्रम्

ॐकारोत्पन्नशुक्लाभं मध्यसिंहासनस्थितम् । बोध्यं त्रिमुद्रया युक्तं वैरोचनमुनिं नुमः ॥ १॥ हूङ्कारोत्पन्ननीलाभं पूर्वे गजासनस्थितम् । भूस्पर्शमुद्रया युक्तमक्षोभ्यं श्रीघन नुमः ॥ २॥ त्राङ्कारोत्पन्नहेमाभं दक्षिणेऽश्वमारूढम् । वरदमुद्रया युक्तं नमामि रत्नसम्भवम् ॥ ३॥ झिङ्कारोत्पन्नरक्ताभं पश्चिमे मयूरासनम् । ध्यानमूर्तिधरं नाथममिताभमुनिं नुमः ॥ ४॥ खङ्कारोत्पन्नश्यामाभमुत्तरे गरुडासनम् । अभयमुद्रसम्बद्धममोघसिद्धिं नमाम्यहम् ॥ ५॥ रोचना मामकी चैव पाण्डरा तारणी तथा । ब्रह्मादिकोणसंस्थाश्च चतुर्देव्यो नमो नमः ॥ ६॥ निरञ्जनं निराकारं प्रत्येकज्योतिरूपिणम् । चैत्यमध्यस्थितं देवं वज्रसत्त्वं नमो वयम् ॥ ७॥ इति श्री बुद्धभट्टारकस्य विद्याक्षरस्तोत्रं सम्पूर्णम् ॥