Brahmana Kritam Surya Stotram 18

ब्रह्मणा कृतं सूर्यस्तोत्रम् १८

ब्रह्मोवाच । नमस्ये यन्मयं सर्वमेतत्सर्वमयश्च यः । विश्वमूर्तिः परं ज्योतिर्यत्तद्ध्यायन्ति योगिनः ॥ ५॥ य ऋङ्मयो यो यजुषां निधानं साम्नां च यो योनिरचिन्त्यशक्तिः । त्रयीमयः स्थूलतयार्धमात्रा परस्वरूपो गुणपारयोग्यः ॥ ६॥ त्वां सर्वहेतुं परमं च वेद्यमाद्यं परं ज्योतिरवेद्यरूपम् । स्थूलं च देवात्मतया नमस्ते भास्वन्तमाद्यं परमं परेभ्यः ॥ ७॥ सृष्टिं करोमि यदहं तव शक्तिराद्या तत्प्रेरितो जलमहीपवनाग्निरूपाम् । तद्देवताऽऽदिविषयां प्रणवाद्यशेषां नात्मेच्छया स्थितिलयावपि तद्वदेव ॥ ८॥ वह्निस्त्वमेव जलशोषणतः पृथिव्याः सृष्टिं करोषि जगतां च तथाद्य पाकम् । व्यापी त्वमेव भगवन्गगनस्वरूपं त्वं पञ्चधा जगदिदं परिपासि विश्वम् ॥ ९॥ यज्ञैर्यजन्ति परमात्मविदो भवन्तं विष्णुस्वरूपमखिलेष्टिमयं विवस्वन् । ध्यायन्ति चापि यतयो नियतात्मचित्ताः सर्वेश्वरं परममात्मविमुक्तिकामाः ॥ १०॥ नमस्ते देवरूपाय यज्ञरूपाय ते नमः । परब्रह्मस्वरूपाय चिन्त्यमानाय योगिभिः ॥ ११॥ उपसंहर तेजो यत्तेजसः संहतिस्तव । सृष्टेर्विघाताय विभो सृष्टौ चाहं समुद्यतः ॥ १२॥ इति मार्कण्डेयपुराणे शततमाध्यायानतर्गतं ब्रह्मणा कृतं सूर्यस्तोत्रं समाप्तम् । मार्कण्डेयपुराण । अध्याय १००/५-१२॥ mArkaNDeyapurANa . adhyAya 100/5-12.. Proofread by PSA Easwaran