Brahmaproktam Suryasya Ekavimshatinama Stotram

 ब्रह्मप्रोक्तं सूर्यस्य एकविंशतिनामस्तोत्रम् 

ब्रह्मोवाच ।
श‍ृणुध्वं मुनिशार्दूलाः सारभूतं सनातनम् ।
अलं नामसहस्रेण पठन्नेवं स्तवं शुभम् ॥ २९॥

यानि नामानि गुह्यानि पवित्राणि शुभानि च ।
तानि वः कीर्त्तयिष्यामि श्रृणुध्वं भारस्कस्य वै ॥ ३०॥

विकर्त्तनो विवस्वांश्च मार्त्तण्डो भास्करो रविः ।
लोकप्रकाशकः श्रीमाँल्लोकचक्षुर्महेश्वरः ॥ ३१॥

लोकसाक्षी त्रिलोकेशः कर्त्ता हर्त्ता तमिस्रहा ।
तपनस्तापनश्चैव शुचिः सप्ताश्ववाहनः ॥ ३२॥

गभस्तिहस्तो ब्रह्मा च सर्वदेवनमस्कृतः ।
एकविंशतिरित्येष स्तव इष्टः सदा रवेः ॥ ३३॥

शरीरारोग्यदश्चैव धनवृद्धियशस्करः ।
स्तवराज इति ख्यातिस्त्रिषु लोकेषु विश्रुतः ॥ ३४॥

य एतेन द्विजश्रेष्ठा द्विसन्ध्येऽस्तमनोदये ।
स्तौति सूर्यं शुचिर्भूत्वा सर्वपापैः प्रमुच्यते ॥ ३५॥

मानसं वाचिकं वापि देहजं कर्मजं तथा ।
एकजप्येन तत्सर्वं नश्यत्यर्कस्य सन्निधौ ॥ ३६॥

एकजप्यश्च होमश्च सन्ध्योपासनमेव च ।
धूपमन्त्रार्घ्यमन्त्रश्च बलिमन्त्रस्तथैव च ॥ ३७॥

अन्नप्रदाने दाने च प्रणिपाते प्रदक्षिणे ।
पूजितोऽयं महामन्त्रः सर्वपापहरः शुभः ॥ ३८॥

तस्माद्यूयं प्रयत्नेन स्तवेनानेन वै द्विजाः ।
स्तुवीध्वं वरदं देवं सर्वकामफलप्रदम् ॥ ३९॥

इति ब्रह्मपुराणे एकत्रिंशाध्यायान्तर्गतं
         ब्रह्मप्रोक्तं एकविंशतिनामसूर्यस्तोत्रं समाप्तम् ।

ब्रह्मपुराण । अध्याय ३१/३१-३८॥


brahmapurANa . adhyAya 31/31-38..

Proofread by PSA Easwaran