Brahmavishnvishakritam Surya Stotram 14

 ब्रह्मविष्ण्वीशकृतं सूर्यस्तोत्रम् १४ 

ब्रह्मविष्ण्वीशा ऊचुः ।
नमो नमः सुरवर तिग्मतेजसे नमो नमः सुरवर संस्तुताय वै ।
जडान्धमूकान्बधिरान्सकुष्ठान्सश्वित्रिणोंऽधान्विविधव्रणावृतान् ।
करोषि तानेव पुनर्नवान्सदा अतो महाकारुणिकाय ते नमः ॥ ४४॥

यदौदरं ज्योतिरतित्वरन्महद्यदल्पतेजो यदपीह चक्षुषाम् ।
यदत्र यज्ञेष्वपनीतमाहितं तवैव तद्रूपमनेकतः स्थितम् ॥ ४५॥

सुरद्विषः सागरतोयवासिनः प्रचण्डपाशासिपरश्वधायुधाः ।
समुच्छ्रितास्ते भुवि पापचेतसः प्रयान्ति नाशं तव देव दर्शनात् ॥ ४६॥

यतो भवांस्तीर्थफलं समस्तं यज्ञेषु नित्यं भगवानवस्थितः ।
नमो भवन्नात्र विचारणास्ति सदा समः शान्तिकरो नराणाम् ।
यच्चापि लोके तप उच्यते बुधैस्तत्ते महातेज उशन्ति पण्डिताः ॥ ४७॥

स्तुतः स भगवानेवं प्रजापतिमुखैः सुरैः ।
अवधानं ततश्चक्रे श्रवणाभ्यां महीपते ॥ ४८॥

स्तुवन्ति ते ततो भूयः शिवविष्णुपुरोगमाः ।
कृत्वा मां पुरतः सर्वे भक्तिनम्राः समन्ततः ॥ ४९॥

नमो नमस्त्रिभुवनभूतिदायिने क्रतुक्रियासत्फलसम्प्रदायिने ।
नमो नमः प्रतिदिनकर्मसाक्षिणे सहस्रसन्दीधितये नमो नमः ॥ ५०॥

प्रसक्तसप्ताश्वयुजे क्षयाय ध्रुवैकरश्मिग्रथिने नमो नमः ।
सवालखिल्याप्सरकिन्नरोरगैः संसिद्धगन्धर्वपिशाचमानुषैः ।
सयक्षरक्षोगणगुह्यकोत्तमैः स्तुतः सदा देव नमो नमस्ते ॥ ५१॥

यतो रसान्सङ्क्षिपसे शरीरिणां गभस्तिभिर्हिमजलघर्मनिःस्रवैः ।
जगच्च संशोषयसे सदैव अतोऽसि लोके जगतो विशोषणम् ॥ ५२॥

इति भविष्यपुराणे ब्राह्मे पर्वणि त्रयोविंशाधिकशततमाध्यायान्तर्गतं
         ब्रह्मविष्णुरुद्रादिकृतं सूर्यस्तोत्रं समाप्तम् ।

भविष्यपुराण । ब्राह्मपर्व । अध्याय १२३/४४-५२॥


bhaviShyapurANa . brAhmaparva . adhyAya 123/44-52..

Proofread by PSA Easwaran