Devadibhih Kritam Surya Stotram 15

 देवादिभिः कृतं सूर्यस्तोत्रम् १५ 

देवा ऊचुः ।
नमस्ते रविरूपाय सोमरूपाय ते नमः ।
नमो यजुःस्वरूपायाथर्वायाङ्गिरसे नमः ॥ ६४॥

ज्ञानैकधामभूताय निर्धूततमसे नमः ।
शुद्धज्योतिःस्वरूपाय निस्तत्त्वायामलात्मने ॥ ६५॥

नमोऽखिलजगद्व्याप्तिस्वरूपायात्ममूर्तये ।
सर्वकारणभूताय निष्ठायै ज्ञानचेतसाम् ॥ ६६॥

नमोऽस्तु ज्ञेयरूपाय प्रकाशे लक्षरूपिणे ।
भास्कराय नमस्तुभ्यं तथा शब्दकृते नमः ॥ ६७॥

संसारहेतवे चैव सन्ध्याज्योत्स्नाकृते नमः ।
त्वं सर्वमेतद्भगवाञ्जगद्वै भ्रमति त्वया ॥ ६८॥

भ्रमत्वाविद्धमखिलं ब्रह्माण्डं सचराचरम् ।
त्वदंशुभिरिदं सर्वं संसृष्टं जायते शुचि ॥ ६९॥

क्रियते त्वत्करस्पर्शाज्जलादीनां पवित्रता ।
होमदानादिको धर्मो नोपकाराय जायते ॥ ७०॥

तावद्यावन्न संयोगी जगत्यत्र भवाञ्छुचिः ।
प्रातर्होमं प्रशस्तं हि उदिते त्वयि जायते ॥ ७१॥

ऋचोऽथ सकला ह्येता यजूंषि त्वं जगत्पते ।
सकलानि च सामानि तपत्येवं जगत्सदा ॥ ७२॥

ऋङ्मयस्त्वं जगन्नाथ त्वमेव च यजुर्मयः ।
तथा साममयश्चैव ततो नाथ त्रयीमयः ॥ ७३॥

त्वमेव ब्रह्मणो रूपं परं चापरमेव च ।
मूर्तोऽमूर्तस्तथा सूक्ष्मः स्तूलरूपतया स्थितः ॥ ७४॥

निमेषकाष्ठादिमयः कालरूपः क्षयात्मकः ।
प्रसीद स्वेच्छया रूपं स्वतेजोमयमादिश ॥ ७५॥

इत्थं संस्तूयमानस्तु देवैर्देवर्षिभिस्तथा ।

इति भविष्यपुराणे ब्राह्मे पर्वणि त्रयोविंशाधिकशततमाध्यायान्तर्गतं
         देवादिभिः कृतं सूर्यस्तोत्रं समाप्तम् ।

भविष्यपुराण । ब्राह्मपर्व । अध्याय १२३/६४-७५॥


bhaviShyapurANa . brAhmaparva . adhyAya 123/64-75..

Proofread by PSA Easwaran