Ghosharajna Krita Surya Stuti

घोषराज्ञा कृता सूर्यस्तुतिः

राजोवाच । भगवन्देवदेवेश नमस्तुभ्यं चिदात्मने । नमः सवित्रे सूर्याय जगदानन्ददायिने ॥ १२२॥ प्रभागेहाय देवाय त्रयीभूताय ते नमः । विवस्वते नमस्तुभ्यं योगज्ञाय सदात्मने ॥ १२३॥ पराय परमेशाय त्रिलोकीतिमिरच्छिदे । अचिन्त्याय सदा तुभ्यं नमो भास्करतेजसे ॥ १२४॥ योगप्रियाय योगाय योगज्ञाय सदा नमः । ॐ काराय वषट्काररूपिणे ज्ञानरूपिणे ॥ १२५॥ यज्ञाय यज्ञमानाय हविषे ऋत्विजे नमः । रोगघ्नाय स्वरूपाय कमलानन्ददायिने ॥ १२६॥ अतिसौम्यातितीक्ष्णाय सुराणां पतये नमः । सत्राशाय नमस्तुभ्यं भक्तत्राय प्रियात्मने ॥ १२७॥ प्रकाशकाय सततं लोकानां हितकारिणे । प्रसीद प्रणतायाद्य मह्यं भक्तिकृते स्वयम् ॥ १२८॥ इति श्रीस्कन्दपुराणे वैष्णवखण्डे अयोध्यामाहात्म्ये सप्तमाध्यायान्तर्गतं (घोष)राज्ञा कृता सूर्यस्तुतिः समाप्ता । स्कन्दपुराण । वैष्णवखण्ड । अयोध्याखण्ड । अध्याय ७/१२२-१२८॥ skandapurANa . vaiShNavakhaNDa . ayodhyAkhaNDa . adhyAya 7/122-128.. Proofread by PSA Easwaran