श्रीमार्ताण्डस्तोत्रम्
गाढान्तकारहरणाय जगद्धिताय
ज्योतिर्मयाय परमेश्वरलोचनाय ।
मन्देहदैत्यभुजगर्वविभञ्जनाय
सूर्याय तीव्रकिरणाय नमो नमस्ते ॥
छायाप्रियाय मणिकुण्डलमण्डिताय
सूरोत्तमाय सरसीरुहबान्धवाय ।
सौवर्णरत्नमकुटाय विकर्तनाय
सूर्याय तीव्रकिरणाय नमो नमस्ते ॥
संज्ञावधूहृदयपङ्कजषट्पदाय
गौरीशपङ्कजभवाच्युतविग्रहाय ।
लोकेक्षणाय तपनाय दिवाकराय
सूर्याय तीव्रकिरणाय नमो नमस्ते ॥
सप्ताश्वबद्धशकटाय ग्रहाधिपाय
रक्ताम्बराय शरणागतवत्सलाय ।
जाम्बूनदाम्बुजकराय दिनेश्वराय
सूर्याय तीव्रकिरणाय नमो नमस्ते ॥
आम्नायभारभरणाय जलप्रदाय
तोयापहाय करुणामृतसागराय ।
नारायणाय विविधामरवन्दिताय
सूर्याय तीव्रकिरणाय नमो नमस्ते ॥
इति श्रीमार्ताण्डस्तोत्रं सम्पूर्णाम् ।
Proofread by PSA Easwaran