Yajnavalkyakritam Surya Stotram 11

याज्ञवल्क्यकृतं सूर्यस्तोत्रम् ११

याज्ञवल्क्य उवाच । नमस्सवित्रे द्वाराय मुक्तेरमिततेजसे । ऋग्यजुस्सामभूताय त्रयीधाम्ने च ते नमः ॥ १६॥ नमोऽग्निषोमभूताय जगतः कारणात्मने । भास्कराय परं तेजस्सौषुम्णरुचिबिभ्रते ॥ १७॥ कलाकाष्ठानिमेषादिकालज्ञानात्मरूपिणे । ध्येयाय विष्णुरूपाय परमाक्षररूपिणे ॥ १८॥ बिभर्त्ति यस्सुरगणानाप्यायेन्दुं स्वरश्मिभिः । स्वधामृतेन च पितॄंस्तस्मै तृप्तात्मने नमः ॥ १९॥ हिमाम्बुघर्मवृष्टीनां कर्त्ता भर्त्ता च यः प्रभुः । तस्मै त्रिकालरूपाय नमस्सूर्याय वेधसे ॥ २०॥ अपहन्ति तमो यश्च जगतोऽस्य जगत्पतिः । तस्य धामधरो देवो नमस्तस्मै विवस्वते ॥ २१॥ सत्कर्मयोग्यो न जनो नैवापः शुद्धिकारणम् । यस्मिन्ननुदिते तस्मै नमो देवाय भास्वते ॥ २२॥ स्पृष्टो यदंशुभिर्लोकः क्रियायोग्यो हि जायते । पवित्रकारणात्माय तस्मै शुद्धात्मने नः ॥ २३॥ नमः सवित्रे सूर्याय भास्कराय विवस्वते । आदित्यायादिभूताय देवादीनां नमो नमः ॥ २४॥ हिरण्मयं रथं यस्य केतवोऽमृतवाजिनः । वहन्ति भुवनालोकचक्षुषं तं नमाम्यहम् ॥ २५॥ इति विष्णुपुराणे तृतीयभागे पञ्चमाध्यायानितर्गतं याज्ञवल्क्यकृतं सूर्यस्तोत्रं समाप्तम् । विष्णुपुराण । अध्याय ३/५/१६-२६॥ viShNupurANa . adhyAya 3/5/16-26.. Proofread by PSA Easwaran