प्रस्त्यो ऽन्यतरस्याम् ८।२।५४

प्रपूर्वात् स्त्यायतेः उत्तरस्य निष्थातकारस्य अन्यतरस्यां मकारादेशो भवति। प्रस्तीमः। प्रस्तीमवान्। प्रस्तीतः। प्रस्तीतवान्। यदा मत्वं न अस्ति, तदा संयोगादेरातो धातोर् यण्वतः ८।२।४३ इत्यस्य पूर्वत्र असिद्धत्वात् संप्रसारणं प्रथमं क्रियते, तत्र कृते निमित्तव्याघातान् नत्वं न भवति।

प्रस्त्योऽन्यतरस्याम् ८४१, ८।२।५४

प्रस्त्योऽन्यतरस्याम्। "प्रस्त्य" इति पञ्चमी। प्रपूर्वात्स्यैधातोरित्यर्थः। "निष्ठातस्य म" इति शेषः। प्रस्तीम इति। सङ्गीभूत इत्यर्थः।

प्रस्त्योऽन्यतरस्याम् ६८९, ८।२।५४

प्रस्तीमः प्रस्तीत इति। स्त्यै ष्ठै शब्दसङ्घातयोः। आत्वे कृते "संयोगादे"रित्यस्याऽसिद्धत्वात्पूर्वं संप्रसारणे पूर्वरूपे कृते "हलः" इति दीर्घः, पश्चाद्यण्वत्त्वादन्तत्वयोर्विरहान्न नत्वम्। "संस्त्यान" इत्यत्र तु भवत्येव।