श्री चन्द्रशेखरेन्द्रसरस्वती-पञ्चपञ्चाशत्क-स्तोत्रम्
श्रीचन्द्रशेखराचार्यशेखराय नमो नमः ।
नमः शङ्करसन्तानसुधाम्बुधिसुधांशवे ॥ १॥
महादेवेन्द्रहस्ताब्जसञ्जाताय नमो नमः ।
काञ्चीश्रीकामकोट्याख्यपीठाधीशाय ते नमः ॥ २॥
महात्रिपुरसुन्दर्याः चन्द्रमौलीश्वरस्य च ।
सन्तताराधनानन्दनिर्भराय नमो नमः ॥ ३॥
नमस्सत्यव्रतक्षेत्रनिवासरसिकाय ते ।
कामाक्ष्येकाम्रनाथेशसाक्षात्कारवते नमः ॥ ४॥
महादेवीहस्तिगिरिनाथसान्निध्ययोगिने ।
नमो, नमः शिवास्थानस्थानैकान्त्यप्रियाय ते ॥ ५॥
नमोऽद्वैतमतव्याख्यासिंहासननृपाय ते ।
षण्मतोपासनाभक्तिमार्गजीवातवे नमः ॥ ६॥
वेदोद्धरणमत्स्याय कूर्मायामृतदायिने ।
लोकोद्धारवराहाय नरसिंहाय ते नमः ॥ ७॥
नमः प्रपन्नप्रह्लादवर्धकाद्भुतमूर्तये ।
यज्ञाचरणतुष्टाय कुमारब्रह्मचारिणे ॥ ८॥
तेजसा क्रान्तलोकाय तीर्थपादाय ते नमः ।
गुणाभिरामरामाय धर्मानुग्रहकारिणे ॥ ९॥
योगत्रयोपदेष्ट्रे ते बुद्धाय करुणादृशे ।
कलिदोषहरायास्तु पुरुषोत्तम ते नमः ॥ १०॥
नमो नारायणस्मृत्या नारायाणमयाय ते ।
श्रीचक्रिणे सुगदिने सुदर्शनविराजिने ।
नन्दकाय नमस्तेऽस्तु शङ्खतीर्थप्रदाय च ॥ ११॥
नमः शिवाय चन्द्रार्धशेखराय नमो नमः ।
भवाय भवनाशाय शम्भवे च मयोभुवे ॥ १२॥
दक्षिणामूर्तये मौनच्छिन्नसंशीतये नमः ।
शङ्कराय नमः कामजिते कालजिते नमः ॥ १३॥
नमो मृडाय ते सर्वमङ्गलालय ते नमः ।
सौम्यीकृतभुजङ्गाय मान्त्रिकायास्तु ते नमः ॥ १४॥
आश्रिताभीष्टवरद सहकारपरायण ।
चिदभ्रलील त्यागेश ज्योतिरूप रसात्मक ॥ १५॥
आश्रितप्राण संसाररोगवैद्येश ते नमः ।
भक्तप्रसादस्य कृते भिक्षाटनकृते नमः ॥ १६॥
भक्तपापविषाशाय वृषारूढाय ते नमः ।
अन्नप्राणमनोरूपत्रिपुरातीत ते नमः ॥ १७॥
सन्न्यासिगणनाथाय स्वामिनाथाय ते नमः ।
श्रीशिवास्थानयाथार्थ्यकृते तत्स्थिरवासिने ॥ १८॥
श्रीचन्द्रशेखरैकात्म्यात् चन्द्रशेखर ते नमः ।
नम इन्द्र परैश्वर्यात् वैखर्या च सरस्वती ।
तत्त्वातत्त्वक्षीरनीरविवेकपरहंस ते ॥ १९॥
अत्रये त्रिगुणातीतब्रह्मनिष्ठाय ते नमः ।
आनन्दब्रह्मविद्याया गुरो ते भृगवे नमः ॥ २०॥
प्रपञ्चमायाकुत्साय कुत्सायास्तु नमस्तव ।
वसिष्ठाय नमस्तेऽस्तु राघवस्य गुरोस्तव ॥ २१॥
शतानन्दप्रसूतेस्ते गौतमाय नमो नमः ।
दक्षिणाशागुरुश्रेष्ठकुम्भजायास्तु ते नमः ॥ २२॥
श्रुतिस्मृत्यध्वगुरवे याज्ञवल्क्याय ते नमः ।
मोक्षाघ्वसाधनीभूतवीणावादनवेदिने ॥ २३॥
नमो वाल्मीकये तुभ्यं राघवख्यातिदायिने ।
व्यासाय भारतख्यातमहिम्ने ते नमो नमः ॥ २४॥
ब्राह्म्या स्थित्या भागवतमहिमोत्कीर्तनेन च ।
देव्या च लालितत्वेन शुकस्त्वमसि ते नमः ॥ २५॥
जैमिने वेदसंरक्षिन् ब्रह्मविद् बादरायण ।
गुणागुणज्ञ कपिल योगनिष्ठ पतञ्जले ॥ २६॥
न्यायवादिन्नक्षपाद विशेषाभिज्ञ काश्यप ।
नम आगमशास्त्रज्ञसम्प्रदायानुयायिने ॥ २७॥
गोविन्दभगवत्पादस्मृतितादात्म्यशोभिने ।
विवेकचूडामणये सहस्रमुपदेशिने ॥ २८॥
मनीषिणे समदृशे दक्षिणामूर्तये नमः ।
मण्डनाय ब्रह्मविद्यामण्डनायास्तु ते नमः ॥ २९॥
नैष्कर्म्यसिद्धिसंफुल्लमानसोल्लास ते नमः ।
सच्छिष्यसङ्घशरणपद्मपादाय ते नमः ॥ ३०॥
हस्तामलकवद् ब्रह्मतत्त्वसाक्षात्कृते नमः ।
नमोऽस्तु ते विमुक्तात्मन् व्याख्यावाचस्पते तव ॥ ३१॥
भक्तकल्पतरो तुभ्यं चित्सुखानुभविन् नमः ।
यशः परिमलाकृष्टभक्तभृङ्गालये नमः ॥ ३२॥
विद्यारण्य नमस्तेऽस्तु जीवन्मुक्तिप्रकाशक ।
अद्वैतसिद्धिमूलाय मधुसूदन ते नमः ॥ ३३॥
ततत्प्रसिद्धक्षेत्रेषु निर्मितानि यदाज्ञया ।
सशिष्यशङ्कराचार्यमन्दिराणि नमोऽस्तु ते ॥ ३४॥
पष्ट्यब्दपूर्तिकलवैवेदनिध्यादिसंग्रहैः ।
परिक्षामानदानाद्यैर्नियमाध्यायपोषिणे ॥ ३५॥
लुप्तशाखासमुद्धर्त्रे वेदमेलनकारिणे ।
वेदाध्ययनशालानां स्थापकायास्तु ते नमः ॥ ३६॥
वेदधर्मपरिपालसभासंस्थापकाय ते ।
धर्मज्ञविरुदद्वारा स्मार्तसंरक्षकाय ते ॥ ३७॥
येन संस्कृतबोधार्थं स्थापिताऽमरभारती ।
परीक्षाः पाठशालाश्च तस्मै दीर्घदृशे नमः ॥ ३८॥
जीर्णोद्धरणकुम्भाभिषेकप्रोत्साहनैमुहुः ।
देवालये जनश्रद्धां वर्धयित्रे नमोऽस्तु ते ॥ ३९॥
गोदामणिवचोमार्गशीर्षगाथार्थमेलनैः ।
शैववैष्णवसौहार्दपोषकायास्तु ते नमः ॥ ४०॥
धर्माचार्यकपीठानां समुदायसमागमैः ।
ऐकमत्येन धर्माणां प्रचारपथदर्शिने ॥ ४१॥
कामकोटीकोशमालाद्वारा नानास्तवावलीः ।
सद्राविडानुवादास्ते प्रकाशितवते नमः ॥ ४२॥
वेदान्तन्यायमीमांसाविद्वद्वाक्यार्थमाननैः ।
नानामतीयवैदुष्यवर्धयित्रेऽस्तु ते नमः ॥ ४३॥
व्यासागमकलातन्त्रज्योतिर्वित्तममेलनैः ।
जीर्यतां संप्रदायानां जीवनौषध ते नमः ॥ ४४॥
दरिद्रकन्यकोद्वाहसाह्यार्थनिधिदायिने ।
श्रीरामजयलेखेषु जनोत्साहपुषे नमः ॥ ४५॥
अन्नकार्श्यनिवृत्त्यर्थं मुष्टिशालिव्यवस्थितिः ।
दृष्टा येन सदोल्लासिप्रतिभाढ्याय ते नमः ॥ ४६॥
वैद्यशालासु रुग्णानामाश्वासारोग्यहेतवे ।
भक्तान् प्रसाददानाय संप्रेरितवते नमः ॥ ४७॥
कारागृहेषु बद्धानामुत्सवादिषु हृष्टये ।
सत्स्मृत्यै भक्ष्यदानादि प्रचोदितवते नमः ॥ ४८॥
तेजोनिधे कलापूर्ण बुध सौम्य गुरो कवे ।
स्थिर सर्वग्रहाकार तेजोमण्डलभासुर ॥ ४९॥
ललितासततोपास्तिकालिदास नमोऽस्तु ते ।
भवभूतिलसद्गात्र भारवे ब्रह्मतेजसा ॥ ५०॥
माघ सर्वाघरहित मुक्तिश्रीहर्षनिर्भर ।
श्रीकामाक्षीनिदिध्यासमौनमूकाय ते नमः ॥ ५१॥
सर्वान् स्वंजनवत् सर्वकुशलं परिपृच्छते ।
सर्वलोकप्रियायास्तु नमो रामनिभाय ते ॥ ५२॥
अहमेव गुरोरस्य मत इत्यभिमन्यते ।
यथा सर्वः श्रितः तादृग्विश्वासाधायिने नमः ॥ ५३॥
एकोऽद्वितीयमहिमा त्रिगुणाद्यतीतः
भक्तप्रदत्तपुरुषार्थचतुष्टयश्च ।
पञ्चाक्ष-षड्रिपु-जयी द्युतिसप्तसप्तिः
भात्यष्टमूर्त्यनवमो दशदिक्प्रसिद्धः ॥ ५४॥
ईश्वरो जङ्गमस्सोऽयमिति यो घुष्यतेऽखिलैः ।
तस्मै जयेन्द्रगुरवे श्रीजगद्गुरवे नमः ॥ ५५॥
इति जगद्गुरुश्रीशङ्कराचार्यश्रीचन्द्रशेखरेन्द्रसरस्वतीश्रीचरणानुगृहीत-
कविकोकिल-सकलकलाकलाप-बिरुदवर्धिष्णुना राघवेन विरचितं
श्रीचन्द्रशेखरेन्द्रसरस्वतीपञ्चपञ्चाशत्कस्तोत्रं सम्पूर्णम् ।
डाॅ. राघवः
Copyright Dr. V. Raghavan Centre For Performing Arts (Regd.)
www.drvraghavancentre.com
Encoded and proofread by Aruna Narayanan