श्रीदत्तात्रेयप्रार्थना
ॐ नमस्ते भगवन् श्रीसद्गुरुदेव-दत्तात्रेयाय नमो नमः ॥ १॥
त्वं ब्रह्ममयोऽसि । त्वं आनन्दमयोऽसि । त्वं विज्ञानमयोऽसि ।
त्वं सत्यमयोऽसि । त्वं शान्तिमयोऽसि । त्वं प्रेममयोऽसि ।
त्वं निराकारो निरालम्बो निर्विकल्पो निर्विषयो निरञ्जनो निरङ्कुशो
निरन्तरो निराशयो निरामयो निर्धूतकल्मषोऽसि ॥ २॥
त्वदाज्ञया तपन्ति रविशशि-तारामण्डलाः ।
त्वदाज्ञया विपुलधनधान्यवती वसुधा ।
त्वदाज्ञया वहति वायुस्सन्दहत्यनलः । त्वदाज्ञयाऽऽकाशं सर्वं व्याप्नोति ।
त्वदाज्ञया यथाकालं वर्षति पर्जन्यः । त्वदाज्ञया विकसन्ति कुसुमानि ।
त्वदाज्ञया फलन्ति पादपाः । त्वदाज्ञया गायन्ति विहङ्गमः ।
त्वदाज्ञया जीवन्ति चतुर्विधयोनयः ।
त्वदाज्ञया देहे प्राणः सञ्चरति निर्गच्छति देहात् ॥ ३॥
त्वं मनश्चित्तान्तःकरणबुद्ध्यहङ्कार-प्रेरकोऽसि ।
त्वं शमदम-तितिक्षावैराग्य-भक्तिप्रदायकोऽसि ।
त्वं द्वन्द्वदुःख-तिमिर-विध्वंसकोऽसि । त्वं मायापाश-निकृन्तकोऽसि ।
त्वं संसार-बन्धनच्छेदकोऽसि ।
त्वं सर्वसद्गुणकर्ताऽसि । त्वं सर्वदुर्गुणहर्ताऽसि । त्वं शान्तिप्रदोऽसि ।
त्वमानन्दप्रदोऽसि । त्वं प्रेमप्रदोऽसि । त्वं सकलविघ्नहरोऽसि ।
त्वमभयकरोऽसि । त्वं वरदवरोऽसि । त्वं निजपद-प्रदानकरोऽसि ॥ ४॥
ऋते त्वत् कोऽपि नेतरो वदान्यः । ऋते त्वत् कोऽपि नेतरः समर्थः ।
ऋते त्वत् कोऽपि नेतरो दयालुः । ऋते त्वत् कोऽपि नेतरः क्षमाशीलः ।
ऋते त्वत् कोऽपि नेतरो भक्तपालकः ॥ ५॥
त्वत्तः सकलैश्वर्य-भोगक्षमत्वम् । त्वत्तः सकलवस्तु-रमणीयत्वम् ।
त्वत्तः कर्मज्ञानेन्द्रिय-गणसमर्थत्वम् । त्वत्तः सकलयोग-शक्तिमत्त्वम् ।
त्वत्तः परमवैराग्य-परबुद्धिमत्त्वम् ॥ ६॥
त्वयि समुपस्थितं ब्रह्माण्डोत्पत्ति-स्थितिलयबीजम् ।
त्वयि सुप्रतिष्ठितं संसृतिनाशनाद्वैत-भावनामूलम् ।
त्वयि सन्निहितं जन्ममृत्युभय-संहननसामर्थ्यम् ॥ ७॥
कनक-कामिनी-कमनीयत्वात् त्राहि त्राहि माम् ।
काम-क्रोध-मोह-मद-मत्सरकोलाहलात् त्राहि त्राहि माम् ।
जन्म-जरा-मरण-त्रिदोषात् त्राहि त्राहि माम् ।
संसृति-दावानल-दह्यमानं पाहि पाहि माम् ।
विषयकर्दम-निमज्जमानं पाहि पाहि माम् ।
भयकर-कालदण्ड-निपीडयमानं पाहि पाहि माम् ।
धर्माचरण-दिङ्मूढोऽहं धैर्यं देहि देहि मे ।
अहङ्कारमलिन-चित्तोऽहमभयं वरं देहि देहि मे ।
त्वत् पदपङ्कज-शरणागतिं देहि देहि मे ॥ ८॥
विना त्वया नास्ति कोऽप्यन्य आपत्तिनिवारकः । त्वं प्रियतमा माताऽसि मे ।
त्वं प्रियतमः पिताऽसि मे । त्वं प्रियतमो बन्धुरसि मे ।
त्वं प्रियतमं मित्रमसि मे । त्वं पूज्यतमः सद्गुरुवर्योऽसि मे ।
ते कृपाहस्तं देहि मे शिरसि । ते पदतलकञ्जं देहि मे मनसि ।
ते सुखकर-वासोऽस्तु मे वपुषि ।
अनन्त-जन्मपर्यन्तं ते स्मरणं मे चित्तेऽस्तु ॥ ९॥
ॐ नमस्ते अत्रिपुत्राय । ॐ नमस्ते अवधूताय । ॐ नमस्ते हंसदेवाय ।
ॐ नमस्ते सद्गुरुनाथाय । ॐ नमस्ते यतिनाथाय । ॐ नमस्ते शक्तिनाथाय ।
ॐ नमस्ते सिद्धिनाथाय । ॐ नमस्ते मुक्तिनाथाय । ॐ नमस्ते जगन्नाथाय ।
ॐ नमस्ते भगवते दत्तात्रेयाय ।
ॐ नमस्ते परब्रह्मणे सच्चिदानन्दमूर्तये मुनिवर्याय नमो नमः ॥ १०॥
इति श्रीदत्तात्रेयप्रार्थना सम्पूर्णा ।
Proofread by Paresh Panditrao, Rajani Arjun Shankar