Shri Jayatirtha Stuti

श्रीजयतीर्थस्तुतिः

धाटी श्रीजयतीर्थ-वर्य-वचसां चीटीभवत्-स्वर्धुनी पाटीरानिल-फुल्ल-मल्लि-सुमनो-वाटी-लसद्-वासना । पेटी युक्त-मणि-श्रियां सुमतिभिः कोटीरकैः श्लाघिता सा टीका-निचयात्मिका मम चिरादाटीकतां मानसे ॥ १॥ टीकाकृज्जयवर्य संसदि भवत्येकान्ततो राजति प्राकाम्यं दधते पलायन-विधौ स्तोकान्य-शङ्का द्विषः । लोकान्धीकरण-क्षमस्य तमसः सा काल-सीमा यदा पाकाराति-दिशि प्ररोहति न चेद् राका-निशा-कामुकः ॥ २॥ छाया-संश्रयणेन यच्चरणयोरायामि-सांसारिका- पायानल्पतमातप-व्यतिकर-व्यायाम-विक्षोभिताः । आयान्ति प्रकटां मुदं बुध-जना हेयानि धिक्कृत्य नः पायाच्छ्रीजयराड् दृशा सरस-निर्मायानुकम्पार्द्रया ॥ ३॥ श्रीवाय्वंश-सुवंश-मौक्तिकमणेः सेवा-विनम्र-क्षमा- देवाज्ञान-तमो-विमोचन-कला-जैवातृक-श्री-निधेः । शैवाद्वैत-मताटवी-कवलना-दावाग्नि-लीला-जुषः को वादी पुरतो जयीश्वर भवेत् ते वाद-कोलाहले ॥ ४॥ नीहार-च्छवि-बिम्ब-निर्गत-कर-व्यूहाप्लुतेन्दूपला- नाहार्य-स्रुत-नूतनामृत-परीवाहालि-वाणी-मुचः । ऊहागोचर-गर्व-पण्डित-पयो-वाहानिल-श्री-जुषो माहात्म्यं जयतीर्थ वर्य भवतो व्याहारमत्येति नः ॥ ५॥ मन्दारु-क्षिति-पाल-मौलि-विलसन्मन्दार-पुष्पावली- मन्दान्य-प्रसरन्मरन्द-कणिका-वृन्दार्द्र-पादाम्बुजः । कुन्दाभामल-कीर्तिरार्त-जनता-वृन्दारकानोकहः स्वं दासं जयतीर्थ-राट् स्व-करुणा-सन्दानितं मां क्रियात् ॥ ६॥ श्री-दाराङ्घ्रि-नतः प्रतीप-सुमनो-वादाहवाटोप-नि- र्भेदातन्द्र-मतिः समस्त-विबुधामोदावली-दायकः । गोदावर्यदयत्-तरङ्ग-निकर-ह्री-दायि-गम्भीर-गीः पादाब्ज-प्रणते जयी कलयतु स्वे दास-वर्गेऽपि माम् ॥ ७॥ विद्या-वारिज-षण्ड-चण्ड-किरणो विद्या-मद-क्षोदयद्- वाद्याली-कदली-भिदामर-करी हृद्यात्म-कीर्ति-क्रमः । पद्या भोध-ततेर्विनम्र-सुर-राडुद्यान-भूमी-रुहो दद्याच्छ्रीजयतीर्थ-राड् धियमुतावद्यानि भिद्यान्मम ॥ ८॥ आभासत्वमियाय तार्किक-मतं प्राभाकर-प्रक्रिया शोभां नैव बभार दूर-निहिता वैभाषिकाद्युक्तयः । ह्रीभारेण नताश्च सङ्कर-मुखाः क्षोभाकरो भास्करः श्री-भाष्यं जय-योगिनि प्रवदति स्वाभाविकोद्यन्मतौ ॥ ९॥ बन्धानः सरसार्थ-शब्द-विलसद्-बन्धाकराणां गिरां इन्धानोऽर्क-विभा-परिभव-झरी-सन्धायिना तेजसा । रुन्धानो यशसा दिशः कवि-शिरः-सन्धार्यमाणेन मे सन्धानं स जयी प्रसिद्ध-हरि-सम्बन्धागमस्य क्रियात् ॥ १०॥ सख्यावद्-गण-गीयमान-चरितः साङ्ख्याक्षपादादि-निः- सङ्ख्यासत्-समयि-प्रभेद-पटिम-प्रख्यात-विख्याति-गः । मुख्यावास-गृहं क्षमा-दम-दया-मुख्यामल-श्री-धुरां व्याख्याने कलयेद् रतिं जयवराभिख्या-धरोमद्-गुरुः ॥ ११॥ आसीनो मरुदंश-दास-सुमनो-नासीर-देशे क्षणाद् दासीभूत-विपक्ष-वादि-विसरः शासी समस्तैनसाम् । वासी हृत्सु सतां कला-निवह-विन्यासी ममानारतं श्री-सीता-रमणार्चकः स जयराडासीदतां मानसे ॥ १२॥ पक्षीशासन-पाद-पूजन-रतः कक्षीकृतोद्यद्-दयो लक्ष्मीकृत्य सभा-तले रटदसत्-पक्षीश्वरानक्षिपत् । अक्षीणं-प्रतिभा-भरो विधि-सरोजाक्षी-विहाराकरो लक्ष्मीं नः कलयेज्जयी सुचिरमध्यक्षीकृताधोक्षजाम् ॥ १३॥ येनागाहि समस्त-शास्त्र-पृतना-रत्नाकरो लीलया येनाखण्डि कुवादि-सर्व-सुभट-स्तोमो वचः-सायकैः । येनास्थापि च मध्व-शास्त्र-विजय-स्तम्भो धरा-मण्डले तं सेवे जयतीर्थ-वीरमनिशं मध्वाख्य-राजादृतम् ॥ १४॥ यदीय-वाक्-तरङ्गाणां विप्लुषो विदुषां गिरः । जयति श्रीधरावासो जयतीर्थ-सुधाकरः ॥ १५॥ सत्यप्रिय-यति-प्रोक्तं श्री-जयार्य-स्तवं शुभम् । पठन् सभासु विजयी लोके ख्यातिं गमिष्यति ॥ १६॥ ॥ इति श्रीसत्यप्रियतीर्थविरचिता श्रीजयतीर्थस्तुतिः समाप्ता ॥