जिनसहस्रनामस्तवनम्
प्रभो भवाङ्गभोगेषु निर्विण्णो दुःखभीरुकः ।
एष विज्ञापयामि त्वां शरण्यं करुणार्णवम् ॥ १॥
सुखलालसया मोहाद् भ्राम्यन् बहिरितस्ततः ।
सुखैकहेतोर्नामापि तव न ज्ञातवान् पुरा ॥ २॥
अद्य मोहग्रहावेशशैथिल्य तत्किञ्चिदुन्मुखः ।
अनन्तगुणमाप्तेभ्यस्त्वां श्रुत्वा स्तोतुमुद्यतः ॥ ३॥
भक्त्या प्रोत्सार्यमाणोऽपि (प्रोत्साह्यमानोऽपि) दूरं शक्त्या तिरस्कृतः ।
त्वां नामाष्टसहस्रेण स्तुत्वाऽऽत्मानं पुनाम्यहम् ॥ ४॥
जिन-सर्वज्ञ- यज्ञार्ह-तीर्थकृन्नाथ-योगिनाम् ।
निर्वाण ब्रह्म-बुद्धान्तकृतां चाष्टोत्तरैः शतैः ॥ ५॥
१ अथ जिनशतम् ।
जिनो जिनेन्द्रो जिनराट् जिनपृष्ठो जिनोत्तमः ।
जिनाधिपो जिनाधीशो जिनस्वामी जिनेश्वरः ॥ ६॥
जिननाथो जिनपतिर्जिनराजो जिनाधिराट् ।
जिनप्रभुर्जिनविभुर्जिनभर्त्ता जिनाधिभूः ॥ ७॥
जिननेता जिनेशानो जिनेनो जिननायकः ।
जिनेट् जिनपरिवृढो जिनदेवो जिनेशिता ॥ ८॥
जिनाधिराजो जिनपो जिनेशी जिनशासिता ।
जिनाधिनाथोऽपि जिनाधिपतिर्जिनपालकः ॥ ९॥
जिनचन्द्रो जिनादित्यो जिनार्को जिनकुञ्जरः ।
जिनेन्दुर्जिनधौरेयो जिनधुर्यो जिनोत्तरः ॥ १०॥
जिनवर्यो जिनवरो जिनसिंहो जिनोद्वहः ।
जिनर्षभो जिनवृपो जिनरत्रं जिनोरसम् ॥ ११॥
जिनेशो जिनशार्दूलो जिनाग्र्यं जिनपुङ्गवः ।
जिनहंसो जिनोत्तंसो जिननागो जिनाग्रणीः ॥ १२॥
जिनप्रवेकश्च जिनग्रामणीर्जिनसत्तमः ।
जिनप्रवर्हः परमजिनो जिनपुरोगमः ॥ १३॥
जिनश्रेष्ठो जिनज्येष्ठो जिनमुख्यो जिनाग्रिमः ।
श्रीजिनश्वोत्तमजिनो जिनवृन्दारकोऽरिजित् ॥ १४॥
निर्विघ्नो विरजाः शुद्धो निस्तमस्को निरञ्जनः ।
घातिकर्मान्तकः कर्ममर्मावित्कर्महानघः ॥ १५॥
वीतरागोऽक्षुदद्वेषो निर्मोहो निर्मदोऽगदः ।
वितृष्णो निर्ममोऽसङ्गो निर्भयो वीतविस्मयः ॥ १६॥
अस्वप्नो निःश्रमोऽजन्मा निःस्वेदो निर्जरोऽमरः ।
अरत्यतीतो निश्चिन्तो निर्विषादस्त्रिषष्ठिजित् ॥ १७॥
२ अथ सर्वज्ञतम् ।
सर्वज्ञः सर्ववित्सर्वदर्शी सर्वावलोकनः ।
अनन्तविक्रमोऽनन्तवीर्योऽनन्तसुखात्मकः ॥ १८॥
अनन्तसौख्यो विश्वज्ञो विश्वदृश्वाऽखिलार्थदृक् ।
न्यक्षदृग्विश्वतश्चक्षुर्विश्वचक्षुरशेषवित् ॥ १९॥
आनन्द परमानन्दः सदानन्दः सदोदयः ।
नित्यानन्दो महानन्दः परानन्दः परोदयः ॥ २०॥
परमोजः परंतेजः परंधाम परंमहः ।
प्रत्यग्ज्योतिः परंज्योतिः परंब्रह्म परंरहः ॥ २१॥
प्रत्यगात्मा प्रबुद्धात्मा महात्मात्ममहोदयः ।
परमात्मा प्रशान्तात्मा परात्मात्मनिकेतनः ॥ २२॥
परमेष्ठी महिष्टात्मा श्रेष्ठात्मा स्वात्मनिष्ठितः ।
ब्रह्मनिष्ठो महानिष्ठो निरूढात्मा दृढात्मदृक् ॥ २३॥
एकविद्यो महाविद्यो महाब्रह्मपदेश्वरः ।
पञ्चब्रह्ममयः सार्वः सर्वविद्येश्वरः स्वभूः ॥ २४॥
अनन्तधीरनन्तात्माऽनन्तशक्तिरनन्तदृक् ।
अनन्तानन्तधीशक्तिरनन्तचिदनन्तमुत् ॥ २५॥
सदाप्रकाशः सर्वार्थसाक्षात्कारी समग्रधीः ।
कर्मसाक्षी जगच्चक्षुरलक्ष्यात्माऽचलस्थितिः ॥ २६॥
निराबाधोऽप्रतर्क्यात्मा धर्मचक्री विदांवरः ।
भूतात्मा सहजज्योतिर्विश्वज्योतिरतीन्द्रियः ॥ २७॥
केवली केवलालोको लोकालोकविलोकनः ।
विविक्तः केवलोऽव्यक्तः शरण्योऽचिन्त्यवैभवः ॥ २८॥
विश्वभृद्विश्वरूपात्मा विश्वात्मा विश्वतोमुखः ।
विश्वव्यापी स्वयञ्ज्योतिरचिन्त्यात्माऽमितप्रभः ॥ २९॥
महौदार्यो महाबोधिर्महालाभो महोदयः ।
महोपभोगः सुगतिर्महाभोगो महाबलः ॥ ३०॥
३ अथ यज्ञार्हशतम् ।
यज्ञार्हो भगवानर्हन्महार्हो मघवार्चितः ।
भूतार्थयज्ञपुरुषो भूतार्थक्रतुपौरुषः ॥ ३१॥
पूज्यो भट्टारकस्तत्रभवानत्रभवान्महान् ।
महामहार्हस्तत्रायुस्ततो दीर्घायुरर्घ्यवाक् ॥ ३२॥
आराध्यः परमाराध्यः पञ्चकल्याणपूजितः ।
दृग्विशुद्धिगणोदग्रो वसुधारार्चितास्पदः ॥ ३३॥
सुस्वप्नदर्शी दिव्यौजाः शचीसेवितमातृकः ।
स्याद्वत्नगर्भः श्रीपूतगर्भो गर्भोत्सवोच्छ्रतः ॥ ३४॥
दिव्योपचारोपचितः पद्मभूर्निष्कलः स्वजः ।
सर्वीयजन्मा पुण्याङ्गो भास्वानुद्भूतदैवतः ॥ ३५॥
विश्वविज्ञातसम्भूतिर्विश्वदेवागमाद्भुतः ।
शचीसृष्टप्रतिच्छन्दः सहस्राक्षदृगुत्सवः ॥ ३६॥
नृत्यदैवतासीनः सर्वशक्रनमस्कृतः ।
हर्षाकुलामरखगश्चारणर्षिमतोत्सवः ॥ ३७॥
व्योम विष्णुपदारक्षा स्नानपीठायिताद्रिराट् ।
तीर्थेशंमन्यदुग्धाब्धिः स्नानाम्बुस्नातवासवः ॥ ३८॥
गन्धाम्बुपूतत्रैलोक्यो वज्रसूचीशुचिश्रवा ।
कृतार्थितशचीहस्तः शक्रोद्धुष्टेष्टनामकः ॥ ३९॥
शक्रारब्धानन्दनृत्यः शचीविस्मापिताम्बिकः ।
इन्द्रनृत्यन्तपितृको रैदपूर्णमनोरथः ॥ ४०॥
आज्ञार्थीन्द्रकृतासेवो देवर्षीष्टशिवोद्यमः ।
दीक्षाक्षणक्षुब्धजगद्भूर्भुवःस्वःपतीडितः ॥ ४१॥
कुबेरनिर्मितास्थानः श्रीयुग्योगीश्वरार्चितः ।
ब्रह्मेड्यो ब्रह्मविद्वेद्यो याज्यो यज्ञपतिः क्रतुः ॥ ४२॥
यज्ञाङ्गममृतं यज्ञो हविः स्तुत्यः स्तुतीश्वरः ।
भावो महामहपतिर्महायज्ञोऽग्रयाजकः ॥ ४३॥
दयायागो जगत्पूज्यः पूजार्हो जगदर्चितः ।
देवाधिदेवः शक्रार्च्यो देवदेवो जगद्गुरुः ॥ ४४॥
संहूतदेवसङ्घार्च्यः पद्मयानो जयध्वजी ।
भामण्डली चतुःषष्टिचामरो देवदुन्दुभिः ॥ ४५॥
वागस्पृष्टासनः छत्रत्रयराट् पुष्पवृष्टिभाक् ।
दिव्याशोको मानमर्दी सङ्गीतार्होऽष्टमङ्गलः ॥ ४६॥
४ अथ तीर्थकृच्छतम् ।
तीर्थकुत्तीर्थसृट् तीर्थङ्करस्तीर्थङ्करः सुदृक् ।
तीर्थकर्त्ता तीर्थभर्ता तीर्थेशस्तीर्थनायकः ॥ ४७॥
धर्मतीर्थङ्करस्तीर्थप्रणेता तीर्थकारकः ।
तीर्थप्रवर्तकस्तीर्थवेधास्तीर्थविधायकः ॥ ४८॥
सत्यतीर्थङ्करस्तीर्थसेव्यस्तैर्थिकतारकः ।
सत्यवाक्याधिपः सत्यशासनोऽप्रतिशासनः ॥ ४९॥
स्याद्वादी दिव्यगीर्दिव्यध्वनिरव्याहतार्थवाक् ।
पुण्यवागर्थ्यवागर्धवागधीयोक्तिरिद्धवाक् ॥ ५०॥
अनेकान्त दिगेकान्तध्वान्तभिद् दुर्णयान्तकृत् ।
सार्थवागप्रयत्नोक्तिः प्रतितीर्थमदघ्नवाक् ॥ ५१॥
स्यात्कारध्वजवागीहापेतवागचलौष्ठवाक् ।
अपौरुषेयवाक्छास्ता रुद्धवाक् सप्तभङ्गिवाक् ॥ ५२॥
अवर्णगीः सर्वभाषामयगीर्व्यक्तवर्णगीः ।
अमोघवागक्रमवागवाच्यान्तवागवाक् ॥ ५३॥
अद्वैतगीः सूनृतगीः सत्यानुभयगीः सुगीः ।
योजनव्यापिगी क्षीरगौरगीस्तीर्थकृत्वगीः ॥ ५४॥
भव्यैश्रव्यगुः सद्गुश्चित्रगुः परमार्थगुः ।
प्रशान्तगुः प्राश्निकगुः सुगुर्नियतकालगुः ॥ ५५॥
सुश्रुतिः सुश्रुतो याज्यश्रुतिः सुश्रुन्महाश्रुतिः ।
धर्मश्रुतिः श्रुतिपतिः श्रुत्युद्धर्त्ता ध्रुवश्रुतिः ॥ ५६॥
निर्वाणमार्गदिग्मार्गदेशकः सर्वमार्गदिक् ।
सारस्वतपथस्तीर्थपरमोत्तमतीर्थकृत् ॥ ५७॥
देष्टा वाग्मीश्वरो धर्मशासको धर्मदेशकः ।
वागीश्वरस्त्रयीनाथस्त्रिभङ्गीशो गिरां पतिः ॥ ५८॥
सिद्धाज्ञः सिद्धवागाज्ञासिद्धः सिद्धैकशासनः ।
जगत्प्रसिद्धक्ष् सिद्धान्तः सिद्धमन्त्रः सुसिद्धवाक् ॥ ५९॥
शुचिश्रवा निरुकोक्तिस्तन्त्रकृन्यायशास्त्रकृत् ।
महिष्ठवाग्महानादः कवीन्द्रो दुन्दुभिस्वनः ॥ ६०॥
५ अथ नाथशतम् ।
नाथः पतिः परिवृढः स्वामी भर्त्ता विभुः प्रभुः ।
ईश्वरोऽधीश्वरोऽधीशोऽधीशानोऽधोशितेशिता ॥ ६१॥
ईशोऽधिपतिरीशान इन इन्द्रोऽधिपोऽधिभूः ।
महेश्वरो महेशानो महेशः परमेशिता ॥ ६२॥
अधिदेवो महादेवो देवस्त्रिभुवनेश्वरः ।
विश्वेशो विश्वभूतेशो विश्वेट् विश्वेश्वरोऽधिराट् ॥ ६३॥
लोकेश्वरो लोकपति लोकनाथो जगत्पतिः ।
त्रैलोक्यनाथो लोकेशो जगन्नाथो जगत्प्रभुः ॥ ६४॥
पिताः परः परतरो जेता जिष्णुरनीश्वरः ।
कर्त्ता प्रभूष्णुर्भ्राजिष्णुः प्रभविष्णुः स्वयम्प्रभुः ॥ ६५॥
लोकजिद्विश्वजिद्विश्वविजेता विश्वजित्वरः ।
जगज्जेता जगज्जैत्रो जगज्जिष्णुर्जगज्जयी ॥ ६६॥
अग्रणीर्ग्रामणीर्नेता भूर्भुवःस्वरधीश्वरः ।
धर्मनायक ऋद्धीशो भूतनाथश्च भूतभृत् ॥ ६७॥
गतिः पाता वृषो वर्यो मन्त्रकृच्छुभलक्षणः ।
लोकाध्यक्षो दुराधर्षो भव्यबन्धुर्निरुत्सुकः ॥ ६८॥
धीरो जगद्धितोऽजय्यस्त्रिजगत्परमेश्वरः ।
विश्वासी सर्वलोकेशो विभवो भुवनेश्वरः ॥ ६९॥
त्रिजगद्वल्लभस्तुङ्गस्त्रिजगन्मङ्गलोदयः ।
धर्मचक्रायुधः सद्योजातस्त्रैलोक्य मङ्गलः ॥ ७०॥
वरदोऽप्रतिघोऽच्छेद्यो दृढीयानभयङ्करः ।
महाभागो निरौपम्यो धर्मसाम्राज्यनायकः ॥ ७१॥
६ अथ योगिशतम् ।
योगी प्रव्यक्तनिर्वेदः साम्यारोहणतत्परः ।
सामयिकी सामयिको निःप्रमादोऽप्रतिक्रमः ॥ ७२॥
यमः प्रधाननियमः स्वभ्यस्तपरमासनः ।
प्राणायामचणः सिद्धप्रत्याहारो जितेन्द्रियः ॥ ७३॥
धारणाधीश्वरो धर्मध्याननिष्ठः समाधिराट् ।
स्फुरत्समरसीभाव एकी करणनायकः ॥ ७४॥
निर्ग्रन्थनाथो योगीन्द्रः ऋषिः साधुर्यतिर्मुनिः ।
महर्षिः साधुधौरेयो यतिनाथो मुनीश्वरः ॥ ७५॥
महामुनिर्महामौनी महाध्यानी महाव्रती ।
महाक्षमो महाशीलो महाशान्तो महादमः ॥ ७६॥
निर्लेपो निर्भमस्वान्तो धर्माध्यक्षो दयाध्वजः ।
ब्रह्मयोनिः स्वयम्बुद्धो ब्रह्मज्ञो ब्रह्मतत्त्ववित् ॥ ७७॥
पूतात्मा स्नातको दान्तो भदन्तो वीतमत्सरः ।
धर्मवृक्षायुधोऽक्षोभ्यः प्रपूतात्माऽमृतोद्भवः ॥ ७८॥
मन्त्रमूर्त्तिः स्वसौम्यात्मा स्वतन्त्रो ब्रह्मसम्भवः ।
सुप्रसन्नो गुणाम्भोधिः पुण्यापुण्यनिरोधकः ॥ ७९॥
सुसंवृतः सुगुप्तात्मा सिद्धात्मा निरुपप्लवः ।
महोदर्को महोपायो जगदेकपितामहः ॥ ८०॥
महाकारुणिको गुण्यो महाक्लेशाङ्कुशः शुचिः ।
अरिजंयः सदायोगः सदाभोगः सदाधृतिः ॥ ८१॥
परमौदासिताऽनाश्वान् सत्याशीः शान्तनायकः ।
अपूर्ववैद्यो योगज्ञो धर्ममूर्तिरधर्मधक् ॥ ८२॥
ब्रह्मेट् महाब्रह्मपतिः कृतकृत्यः कृतकृतुः ।
गुणाकरो गुणोच्छेदी निर्निमेषो निराश्रयः ॥ ८३॥
सूरिः सुनयतत्त्वज्ञो महामैत्रीमयः समी (शमी) ।
प्रक्षीणबन्धो निर्द्वन्द्वः परमर्षिरनन्तगः ॥ ८४॥
७ अथ निर्वाणशतम् ।
निर्वाणः सागरः प्राज्ञैर्महासाधुरुदाहृतः ।
विमलाभोऽथ शुद्धाभः श्रीधरो दत्त इत्यपि ॥ ८५॥
अमलाभोऽप्युद्धरोऽग्निः संयमश्च शिवस्तथा ।
पुष्पाञ्जलिः शिवगण उत्साहो ज्ञानसंज्ञकः ॥ ८६॥
परमेश्वर इत्युक्तो विमलेशो यशोधरः ।
कृष्णो ज्ञानमतिः शुद्धमतिः श्रीभद्र शान्तयुक् ॥ ८७॥
वृषभस्तद्वदजितः सम्भवश्चाभिनन्दनः ।
मुनिभिः सुमतिः पद्मप्रभः प्रोक्तः सुपार्श्वकः ॥ ८८॥
चन्द्रप्रभः पुष्पदन्तः शीतलः श्रेय आह्वयः ।
वासुपूज्यश्च विमलोऽनन्तजिद्धर्म इत्यपि ॥ ८९॥
शान्तिः कुन्थुररो मल्लिः सुब्रतो नमिरप्यतः ।
नेमिः पार्श्वो वर्धमानो महावीरः सुवीरकः ॥ ९०॥
सन्मतिश्चाकथि महतिमहावीर इत्यथ ।
महापद्मः सूरदेवः सुप्रभश्च स्वयम्प्रभः ॥ ९१॥
सर्वायुधो जयदेवो भवेदुदयदेवकः ।
प्रभादेव उदङ्कश्च प्रश्नकीत्तिर्जयाभिधः ॥ ९२॥
पूर्णबुद्धिर्निष्कषायो विज्ञेयो विमलप्रभः ।
बहलो निर्मलश्चित्रगुप्तः समाधिगुप्तकः ॥ ९३॥
स्वयम्भूश्वापि कन्दर्पो जयनाथ इतीरितः ।
श्रीविमलो दिव्यवादोऽनन्तवीरोऽप्युदीरितः ॥ ९४॥
पुरुदेवोऽथ सुविधिः प्रज्ञापारमितोऽव्ययः ।
पुराणपुरुषो धर्मसारथिः शिवकीर्त्तनः ॥ ९५॥
विश्वकर्माऽक्षरोऽछद्मा विश्वभूर्विश्वनायकः ।
दिगम्बरो निरातङ्को निरारेको भवान्तकः ॥ ९६॥
दृढव्रतो नयोत्तुङ्गो निःकलङ्कोऽकलाधरः ।
सर्वक्लेशापहोऽक्षय्यः क्षान्तः श्रीवृक्षलक्षणः ॥ ९७॥
८ अथ ब्रह्मशतम् ।
ब्रह्मा चतुर्मुखो धाता विधाता कमलासनः ।
अब्जभूरात्मभूः स्रष्टा सुरज्येष्ठः प्रजापतिः ॥ ९८॥
हिरण्यगर्भो वेदज्ञो वेदाङ्गो वेदपारगः ।
अजो मनुः शतानन्दो हंसयानस्त्रयीमयः ॥ ९९॥
विष्णुस्त्रिविक्रमः शौरिः श्रीपतिः पुरुषोत्तमः ।
वैकुण्ठः पुण्डरीकाक्षो हृषीकेशो हरिः स्वभूः ॥ १००॥
विश्वम्भरोऽसुरध्वंसी माधवो बलिबन्धनः ।
अधोक्षजो मधुद्वेषी केशवो विष्टरश्रवः ॥ १०१॥
श्रीवत्सलाञ्छनः श्रीमानच्युतो नरकान्तकः ।
विश्वक्सेनश्चक्रपाणिः पद्मनाभो जनार्दनः ॥ १०२॥
श्रीकण्ठः शङ्करः शम्भुः कपाली वृषकेतनः ।
म्रुत्युञ्जयो विरूपाक्षो वामदेवस्त्रिलोचनः ॥ १०३॥
उमापतिः पशुपतिः स्मरारिस्त्रिपुरान्तकः ।
अर्धनारीश्वरो रुद्रो भवो भर्गः सदाशिवः ॥ १०४॥
जगत्कर्त्ताऽन्धकारातिरनादिनिधनो हरः ।
महासेनस्तारकजिद्गणनाथो विनायकः ॥ १०५॥
विरोचनो वियद्रत्नं द्वादशात्मा विभावसुः ।
द्विजाराध्यो वृहद्भानुश्चित्रभानुस्तनूनपात् ॥ १०६॥
द्विजराजः सुधाशोचिरौषधीशः कलानिधिः ।
नक्षत्रनाथः शुभ्रांशुः सोमः कुमुदबान्धवः ॥ १०७॥
लेखर्षभोऽनिलः पुण्यजनः पुण्यजनेश्वरः ।
धर्मराजो भोगिराजः प्रचेता भूमिनन्दनः ॥ १०८॥
सिंहिकातनयश्छायानन्दनो वृहतांपतिः ।
पूर्वदेवोपदेष्टा च द्विजराजसमुद्भवः ॥ १०९॥
९ अथ बुद्धशतम् ।
बुद्धो दशबलः शाक्यः षडभिज्ञस्तथागतः ।
समन्तभद्रः सुगतः श्रीघनो भूतकोटिदिक् ॥ ११०॥
सिद्धार्थो मारजिच्छास्ता क्षणिकैकसुलक्षणः ।
बोधिसत्त्वो निर्विकल्पदर्शनोऽद्वयवाद्यपि ॥ १११॥
महाकृपालुर्नैरात्म्यवादी सन्तानशासकः ।
सामान्यलक्षणचणः पञ्चस्कन्धमयात्मदृक् ॥ ११२॥
भूतार्थभावनासिद्धः चतुर्भूमिकशासनः ।
चतुरार्यसत्यवक्ता निराश्रयचिदन्वयः ॥ ११३॥
योगो वैशेषिकस्तुच्छाभावभित्पट्पदार्थदृक् ।
नैयायिकः पोडशार्थवादी पञ्चार्थवर्णकः ॥ ११४॥
ज्ञानान्तराध्यक्षबोधः समवायवशार्थभित् ।
भुक्तैकसा व्यकमोन्तो निर्विशेषगुणामृतः ॥ ११५॥
साङ्ख्यः समीक्ष्यः कपिलः पञ्चविंशतितत्त्ववित् ।
व्यक्ताव्यक्तज्ञविज्ञानी ज्ञानचैतन्य भेददृक् ॥ ११६॥
अस्वसंविदितज्ञानवादी सत्कार्यवादसात् ।
त्रिःप्रमाणोऽक्षप्रमाणः स्याद्वाहङ्कारिकाक्षदिक् ॥ ११७॥
क्षेत्रज्ञ आत्मा पुरुषो नरो ना चेतनः पुमान् ।
अकर्त्ता निर्गुणोऽमूर्तो भोक्ता सर्वगतोऽक्रियः ॥ ११८॥
द्रष्टा तटस्थः कूटस्थो ज्ञाता निर्बन्धनोऽभवः ।
बहिविकारो निर्मोक्षः प्रधानं बहुधानकम् ॥ ११९॥
प्रकृतिः ख्यातिरारूढप्रकृतिः प्रकृतिप्रियः ।
प्रधानभोज्योऽप्रकृतिर्विरम्यो विकृतिः कृती ॥ १२०॥
मीमांसकोऽस्तसर्वज्ञः श्रुतिपूतः सदोत्सवः ।
परोक्षज्ञानवादीष्टपावकः सिद्धकर्मकः ॥ १२१॥
चार्वाको भौतिकज्ञानो भूताभिव्यक्तचेतनः ।
प्रत्यक्षैकप्रमाणोऽस्तपरलोको गुरुश्रुतिः ॥ १२२॥
पुरन्दरविद्धकर्णो वेदान्ती संविदद्वयी ।
शब्दाद्वैती स्फोटवादी पाखण्डघ्नो नयौघयुक् ॥ १२३॥
१० अथ अन्तकृच्छतम् ।
अन्तकृत्पारकृत्तीरप्राप्तः परितमः स्थितः ।
त्रिदण्डी दण्डितारातिर्ज्ञानकर्मसमुच्चयी ॥ १२४॥
संहृतध्वनिरुच्छन्नयोगः (ध्वनिरुत्सन्न) सुप्तार्णवोपमः ।
योगस्नेहापहो योगकिट्टिनिर्लेपनोद्यतः ॥ १२५॥
स्थितस्थूलवपुर्योगो गोर्मनोयोगकार्यकः ।
सूक्ष्मवाक्चित्तयोगस्थः सूक्ष्मीकृतवपुःक्रियः ॥ १२६॥
सूक्ष्मकायक्रियास्थायी सूक्ष्मवाक्चित्तयोगहा ।
एकदण्डी च परमहंसः परमसंवरः ॥ १२७॥
नैः कर्म्यसिद्धः परमनिर्जरः प्रज्वलत्प्रभः ।
मोघकर्मा त्रुटत्कर्मपाशः शैलेश्यलङ्कृतः ॥ १२८॥
एकाकाररसास्वादो विश्वाकाररसाकुलः ।
अजीवन्नमृतोऽजाग्रदसुप्तः शून्यतामयः ॥ १२९॥
प्रेयानयोगी चतुरशीतिलक्षगुणोऽगुणः ।
निःपीतानन्तपर्यायोऽविद्यासंस्कारनाशकः ॥ १३०॥
वृद्धो निर्वचनीयोऽणुरणीयाननणुप्रियः ।
प्रेष्ठः स्थेयान् स्थिरो निष्ठः श्रेष्ठो ज्येष्ठः सुनिष्ठितः ॥ १३१॥
भूतार्थशूरो भूतार्थदूरः परमनिर्गुणः ।
व्यवहारसुषुप्तोऽतिजागरूकोऽतिसुस्थितः ॥ १३२॥
उदितोदितमाहात्म्यो निरुपाधिरकृत्रिमः ।
अमेयमहिमात्यन्तशुद्धः सिद्धिस्वयंवरः ॥ १३३॥
सिद्धानुजः सिद्धपुरीपान्थः सिद्धगणातिथिः ।
सिद्धसङ्गोन्मुखः सिद्धालिङ्ग्यः सिद्धोपगूहकः ॥ १३४॥
पुष्टोऽष्टादशसहस्रशीलाश्वः पुण्यशम्बलः ।
वृत्ताप्रयुम्यः परमशुक्लेश्योऽपचारकृत् ॥ १३५॥
क्षेपिष्ठोऽन्त्यक्षणसखा पञ्चलध्वक्षरस्थितिः ।
द्वासप्ततिप्रकृत्यासी त्रयोदशकलिप्रणुत् ॥ १३६॥
अवेदोऽयाजकोऽयज्योऽयाज्योऽनग्निपरिग्रहः ।
अनग्निहोत्री परमनिःस्पृहोऽत्यन्तनिर्दयः ॥ १३७॥
अशिष्योऽशासकोऽदीक्ष्योऽदीक्षकोऽदीक्षितोऽक्षयः ।
अगम्योऽगमकोऽरम्योऽरमको ज्ञाननिर्भरः ॥ १३८॥
महायोगीश्वरो द्रव्यसिद्धोऽदेहोऽपुनर्भवः ।
ज्ञानैकचिज्जीवघनः सिद्धो लोकाग्रगामुकः ॥ १३९॥
जिनसहस्रनामस्तवनफलम् ।
इदमष्टोत्तरं नाम्नां सहस्रं भक्तितोऽर्हताम् ।
योऽनन्तानामधीतेऽसौ मुक्त्यन्तां भक्तिमश्नुते ॥ १४०॥
इदं लोकोत्तमं पुंसामिदं शरणमुल्वणम् ।
इदं मङ्गलमग्रीयमिदं परमपावनम् ॥ १४१॥
इदमेव परमतीर्थमिदमेवेष्टसाधनम् ।
इदमेवाखिलक्लेशसङ्क्लेशक्षयकारणम् ॥ १४२॥
एतेषामेकमप्यर्हन्नाम्नामुच्चारयन्नघैः ।
मुच्यते किं पुनः सर्वाण्यर्थज्ञस्तु जिनायते ॥ १४३॥
इति पण्डित आशाधरविरचितं जिनसहस्रनामस्तोत्रं अथवा
जिनसहस्रनामस्तवनं सम्पूर्णम् ।
Proofread by Gautam Vora