मुत्तुस्वामि-दीक्षित अष्टोत्तरशतनामस्तोत्रम्
कमलालय-सञ्जातं रामस्वामि-कुलोद्वहम् ।
बालाम्बिका-कृपाप्राप्तं सुब्बम्मानन्द-वर्धनम् ॥ १॥
श्रुतिस्मृति-पुराणेतिहास-साहित्य-पारगम् ।
स्वपित्रार्जित-सङ्गीत-शास्त्रज्ञानं महामतिम् ॥ २॥
गृहागत-गुरुश्रेष्ठं विनीतं देशिकानुगम् ।
शमदमादि-सम्पन्नं सर्वशास्त्र-विशारदम् ॥ ३॥
कृतवाराणसी-वासं श्रीविद्या-सम्प्रदायकम् ।
भागीरथी-कराल्लब्ध-वीणालङ्कृत-हस्तकम् ॥ ४॥
योगशास्त्र-विशेषज्ञं विधूत-कलिकल्मषम् ।
श्रीचिदानन्द-नाथाख्यं भस्म-रुद्राक्ष-भूषितम् ॥ ५॥
पूर्णाचल-गुहप्राप्त-मिष्टं गेयकृदुत्तमम् ।
विभक्तिक्रम-सम्पूर्ण-श्रीगुरुगुह-वैभवम् ॥ ६॥
काञ्चीपुरे गीतरत्नैः विभूषित-मणित्रयम् ।
कालहस्ति-ज्ञानवल्ली-प्राणेशार्पित-गायनम् ॥ ७॥
अभ्रसभेश-सद्भक्तं अरुणाचल-चिन्तकम् ।
त्यागेशार्पित-सर्वस्वं रमापुर-कृतालयम् ॥ ८॥
सुन्दरमूर्तिनादिष्ट-भक्तियोग-पथे स्थितम् ।
कमलाम्बा-कटाक्षेण ब्रह्मानन्दे सुनिष्ठितम् ॥ ९॥
जितेन्द्रियं सदातृप्तं त्यक्त-हीन-नराश्रयं
वाणी-संरक्षितं लक्ष्मी-बहुमानित-जीवितम् ॥ १०॥
हैयङ्गवीन-हृदयं सर्वभूतहिते रतम् ।
तेजस्विनं च वैराग्य-चूडामणिं यशस्विनम् ॥ ११॥
वरिवस्या-रहस्यज्ञं तन्त्रशास्त्रेषु कोविदम् ।
मन्त्रशास्त्र-सुधाम्भोधि-मथनोद्भव-गेयकम् ॥ १२॥
गीत-नर्तन-तालज्ञ-शिष्य-बृन्द-सुशोभितम् ।
शान्तं दान्तं स्थितप्रज्ञं भूपालैरभिनन्दितम् ॥ १३॥
कामक्रोधादि-संरम्भ-रहितं गतमायिकम् ।
चाञ्चल्यरहितं धीरं वासनात्रय-वर्जितम् ॥ १४॥
स्वस्वरूपानुसन्धान-भक्ति-पूरित-वाचकम् ।
चिद्रूपात्मकदेवस्य मनने कृतनिश्चयम् ॥ १५॥
जपमालाधरं नित्य-तपश्चर्या-दृढव्रतम् ।
शङ्करार्य-मताचारं षण्मतेषु कृतादरम् ॥ १६॥
शिवशक्ति-हरिस्कन्द-गणेशादि-प्रपूजकम् ।
भास्करादि-ग्रहोत्तंसोपासना-मार्गदर्शकम् ॥ १७॥
क्षेत्र-तीर्थ-प्रभावज्ञं क्षेत्र-दर्शन-तत्परम् ।
माधुर्य-सुषमा-युक्त-स्थल-कीर्तन-गायकम् ॥ १८॥
अक्षयेश-पुरो गानात् अपावृत-कवाटकम् ।
कावेरी-तीर-सञ्चार-पूत-चोल-प्रदेशकम् ॥ १९॥
नायकीयुत-रङ्गेश-मातृभूत-प्रशंसकम् ।
अखिलाण्डेश्वरी-नाथ-जम्बूपति-सुकीर्तनम् ॥ २०॥
अभिरामी-मनोहारि-शङ्खाभिषेक-दर्शनम् ।
मध्यार्जुन-महालिङ्ग-महिमोत्कर्ष-घोषणम् ॥ २१॥
स्मेरास्य-चम्पकारण्य-कृष्ण-लावण्य-मोहितम् ।
कृष्णमङ्गल-नामादि-दिव्यदेशाटन-प्रियम् ॥ २२॥
गोकर्ण-गर्ततीरादि-समीपस्थल-गामिनम् ।
द्विसप्त-भुवन-प्रख्य-रागमाला-विधायकम् ॥ २३॥
परिपूजित-मायूरं कुम्भघोणेश-वन्दनम् ।
अद्वैत-ज्ञान-सम्पूर्णं अज्ञानार्ति-चिकित्सकम् ॥ २४॥
गान्धर्व-विद्यया लोक-समुद्धरण-पण्डितम् ।
नादोपासन-संसक्तं नादामृत-सुपानकम् ॥ २५॥
वीणावादन-तत्त्वज्ञं वैणिक-गायकोत्तमम् ।
युक्त-गमक-संशोभि-गान-वर्षण-वारिदम् ॥ २६॥
वेङ्कटमखि-वंश्यात्त-रागाङ्गराग-पद्धतिम् ।
द्विसप्तति-रागरत्न-भूषिताखिल-दैवतम् ॥ २७॥
औत्तर-रागरीतिज्ञं सप्तताल-प्रयोजकम् ।
यमक-प्रास-यत्यादि-प्रसाधित-स्ववाङ्-मयम् ॥ २८॥
रागमुद्राति-वैचित्र्य-विस्मापित-सहृज्जनम् ।
राग-स्वरूप-विस्तार-विद्वज्जन-मनोहरम् ॥ २९॥
गज-गमन-गम्भीर-विलम्बगति-दर्शकम् ।
पाश्चात्यगीत-साहित्य- नूत्नगान-सुकल्पितम् ॥ ३०॥
जीवन्मुक्तं जितामर्षं सामरस्य-परायणम् ।
कृपा-कटाक्ष-सम्पात-मोक्षमार्ग-प्रकाशनम् ॥ ३१॥
मीननेत्रानुकारेण दिग्विजय-प्रतापिनम् ।
सौलभ्यादि-गुणग्राम-दासभूत-जगत्त्रयम् ॥ ३२॥
काञ्ची-यतीश्वराख्यात-सुब्रह्मण्य-सुकीर्तनम् ।
अमृतेशी-प्रसादेन कारितामृत-वर्षणम् ॥ ३३॥
कङ्कशैल-विहारश्री-स्कन्ददर्शन-हर्षितम् ।
काश्मीर-शारदारम्भ-सेतु-पर्यन्त-भावनम् ॥ ३४॥
पाशमोचन-मीनाक्षी-पूर्णानुग्रह-भाजनम् ।
दीपावली-दिन-प्राप्त-कैवल्यपदं उज्ज्वलम् ॥ ३५॥
प्रणम्य शिरसा वाचा पदे नत्वा मुहुर्मुहुः ।
वन्दे लोकगुरुं मुत्तुस्वामि-दीक्षित-सद्गुरुम् ॥ ३६॥
इति श्रीमुत्तुस्वामि-दीक्षित अष्टोत्तरशतनामस्तोत्रं सम्पूर्णम् ।
Note:
Muthusvami Dikshitar is one of the revered Trinity of Carnatic Music composers. Following the path of Sri Adi Shankaracharya, he has composed songs in praise of various gods, as manifestations of the same Parabrahmam. His Keertanas are entirely in Sanskrit (except 2-3 songs which are in Manipravala style) , and are infused with concepts of Advaita Vedanta and Srividya Upasana. His works provide guidance and joy to thousands of devotees and music-lovers.
Composed on the occasion of Shri Muthusvami Dikshitar's 250th birth anniversary (jayanthI) and encoded/proofread by Rajani Arjun Shankar