श्रीरामानुजस्तवश्लोकाः
अनेकाचार्यैरनुगृहीताः
॥ श्रीः ॥
॥ श्रीमते रामानुजाय नमः ॥
काषायशोभिकमनीयशिखानिवेशं
दण्डत्रयोज्वलकरं विमलोपवीतम् ।
उद्यद्दिनेशनिभमुल्लसदूर्ध्वपुण्ड्रं
रूपं तवास्तु यतिराज ! दृशोर्ममाग्रे ॥ १॥
नमः प्रणवशोभितं नवकषायखण्डाम्बरं
त्रिदण्डपरिमण्डितं त्रिविधतत्त्वनिर्वाहकम् ।
दयाञ्चितदृगञ्चलं दलितवादिवाग्वैभवं
शमादिगुणसागरं शरणमेमि रामानुजम् ॥ २॥
एतानि तानि भुवनत्रयपावनानि
संसाररोगशकतीकरणौषधानि ।
जिह्वातले मम लिखानि यथा शिलायां
रामानुजेति चतुराण्यमृताक्षराणि ॥ ३॥
(केषाञ्चित् पूर्वाचार्याणाम्)
सनातनसरस्वतीकुमुदसम्पदुज्जृम्भकैः
अपाकृततमोभरैः अपहृताभितापाङ्कुरैः ।
वचोनिचयचन्द्रिकाविलसितैस्स विष्णोः पदे
विशुद्धिमभिदर्शयन् वितनुतां यतीन्दुः श्रियम् ॥ ४॥
महीयांसं हर्षं मनसि वितरीतुं तनुभृतां
उदीतौ द्वौ ताराप्रियतमयतिक्ष्मापरिबृढौ ।
कालादानाद्यो भजति लघुतां पश्यत जनाः
परो दोषापेतः प्रथयति ततो हन्त गुरुताम् ॥ ५॥
(श्रीकौशिककवितार्किकसिंहमिश्राः
आचार्यचम्पूग्रन्थे)
श्रीमान् रामानुजार्यो जगति विजयतामग्रयायी यतीनां
यन्नामोल्लापमात्रात् नरपतितनयां प्रात्यजत् ब्रह्मरक्षः ।
यस्याभाति त्रिदण्डी चिदचिदपि परं चेति तत्त्वत्रयस्य
स्थित्यादिस्थापनार्थं पृथगभिकलिता केतुदण्डत्रयीव ॥ ६॥
यत्कीर्तिः स्वमतप्रवेशसुहृदामङ्गेषु पुण्ड्रायते
स्वान्ते सत्त्वगुणायतेऽथ भगवद्ध्यानाख्यगङ्गायते ।
सन्तोषादधिरोहतां हरिपदं तत्सूत्रयन्त्रायते
जीयादेष यतीश्वरो भुवि चिरं भूयाच्च नस्सपदे ॥ ७॥
वल्मीकप्रभवो मुनिः स्वयमिह प्रोक्तो बुधेन्द्रैः कविः
वल्मीकप्रभवेन्द्र एष यमिनां श्रेष्ठः श्रुतः पण्डितः ।
व्यासस्सोऽपि पराशरेण जनितः श्रीकेशवार्यैः गुरुः
शेषश्च स्वयमित्यबोधि धरणौ को वा यतीन्दोस्समः ॥ ८॥
(श्रीषङ्गीश श्रीनिवासाचार्याः - श्रीयतिपतिवैभवदीपिकायाम्)
उदयगिरिसमृद्धो यः कराग्रेण पृथ्वीं
अपहततिमिरौघामद्भुतार्थप्रकाशाम् ।
अकृत निगममूर्तिः गोनिधिर्मुक्तिनेता
जयति स यतिराजो भास्करो लोकबन्धुः ॥ ९॥
(श्रीमद्भिनवदेशिकवीरराघवाचार्यस्वामिनः,
श्रुतप्रकाशिकाभूमिकायाम्)
इति अनेकाचार्यैरनुगृहीताः श्रीरामानुजस्तवश्लोकाः सम्पूर्णाः ।
॥ श्रीमते रामानुजाय नमः ॥
Proofread by Aruna Narayanan