श्रीरामकृष्णस्मरणम्
नमः श्रीरामकृष्णाय सर्वमङ्गलहेतवे ।
सर्वसिद्धिप्रदात्रे च मूर्तये ब्रह्मणे नमः ॥ १॥
लीलावतारः श्रीरामकृष्णः शेषयुगे हरिः ।
कलेर्जीवान्समुद्धर्तुं वैकुण्ठाद्वसुधातले ॥ २॥
एष मातरि चन्द्रायां ब्राह्मण्यां भगवान् स्वयम् ।
ब्रह्मज्ञस्य ब्राह्मणस्य पितुः श्रीक्षुदिरामतः ॥ ३॥
प्रादुर्भूतः कर्मकार पुष्करिण्यां सनातनः ।
स्वर्णगौरः शुभ्रवस्त्रो भूषणादिविवर्जितः ॥ ४॥
कामिनीकाञ्चनत्यागी कालिकासाधने रतः ।
पृथिव्यां सन्ति ये धर्मांस्तेषां ये धर्मयाजकाः ॥ ५॥
तत्सर्वमतमाश्रित्य तत्तत्सिद्धिमवाप्तवान् ।
कालिकापुत्ररूपोऽसौ निर्विकल्पसमाधिमान् ॥ ६॥
जगदम्बा स्तन्यपायी स्वसुतं जननी यथा ।
कृपया कालिकादेव्याः स्वस्य साधन शक्तितः ॥ ७॥
साधारणकन्यकेव काली प्रत्यक्षतां गता ।
प्रायेनैवं साधनायां गता द्वादशवत्सराः ॥ ८॥
ततः सिद्धस्वरूपेण स्वधाम्नि दक्षिणेश्वरे ।
विराजितः स्वीयां लीलां पार्षदानामदर्शयत् ॥ ९॥
उक्तं श्रीरामकृष्णेन यत्कथामृतमुत्तमम् ।
भूर्लोकस्या जनास्तेन जानन्ति मधुसूदनम् ॥ १०॥
ईदृग्युगावतारेषु नैकस्मिन्नपि दृश्यते ।
केवलं श्रीरामकृष्णे सर्वकारणकारणे ॥ ११॥
दृश्यते श्रीरासमण्या मन्दिराभ्यन्तरे तदा ।
स्त्रीबालबालिशानाञ्च यद्वाक्यममृतायते ॥ १२॥
अत्यन्तासज्जनेभ्योऽपि यद्दत्तं ठाकुरेण हि ।
तेनानुभूतं तैः सर्वैस्तद्विष्णोः परमं पदम् ॥ १३॥
सर्वत्र सर्वभावेन सर्वजातिषु सर्वदा ।
साधुसज्जनसंन्यासी संसारीब्रह्मचारिभिः ॥ १४॥
सुपूजितो रामकृष्णः पृथिव्यां सर्वमानवैः ।
तेन सर्वयुगश्रेष्ठाऽवतारोऽयं भवेद्ध्रुवम् ॥ १५॥
दन्ते विधृत्य तृणकं पदयोर्निपत्य
कृत्वोत्तमाङ्गनतमेतदहं ब्रवीमि ।
भो भ्रातरः सकलमेव विहाय दुरात्
श्रीरामकृष्ण चरणे कुरुतानुरागम् ॥ १६॥
श्रीरामकृष्ण चरणानुरागात् प्राप्नुवन्ति यत् ।
सर्वे भवन्तः शृण्वन्तु सावधानमिदं वचः ॥ १७॥
मुक्तिर्नापि सुखायते विबुधपूराकाशपुष्पायते
दुर्दान्तेन्द्रिय कालकुण्डलिचयः प्रोत्खातदन्तायते ।
पृथ्वी पूर्णसुखायते विधिसुरेशादिश्च कीटायते
यत्कारुण्य कटाक्षवैभववतस्तं रामकृष्णं भज ॥ १८॥
सम्पूज्य तद्भक्तवर्गान् पृथिव्यां सर्वसज्जनाः ।
भजन्तु भक्तिभावेन रामकृष्णपदाम्बुजम् ॥ १९॥
नरनारीसमीपे मे गलवस्त्रकृताञ्जलेः ।
श्रीरामेन्द्रसुन्दरस्य द्विजस्येदं निवेदनम् ॥ २०॥
इति श्रीरामेन्द्रसुन्दरभक्तितीर्थ विरचितं
``श्रीश्रीरामकृष्णस्मरणम्'' सम्पूर्णम् ।
Proofread by Aruna Narayanan