कावेरीपूजा
॥ श्री गणेशाय नमः ॥ श्री गुरुभ्यो नमः ॥
सङ्कल्पः ।
विशेषेण मत्सम्बन्धिसमस्तपापक्षयार्थं
सौमङ्गल्यसौभाग्यसन्तानसौख्यायुरारोग्यसिद्ध्यर्थञ्च श्री कावेरी
पूजां करिष्ये ॥ घण्टानादादिध्यानान्तं कृत्वा ॥ इमम्मे सुशोमया ।
आपो वा इदं सर्वं आप ॐ ॥
देवता आवाहनम् ।
ॐ भूः कावेरीं आवाहयामि ॥ ॐ भुवः इत्यादिना कावेरीमावाह्य ॥
मरुद्वृधे महालक्ष्मीस्सह्यकन्या सरस्वती ।
अगस्त्यपत्नी कावेरी लोपामुद्रा वरप्रदा ॥
कमण्डलुसमुत्पन्ना सर्वतीर्थाधिदेवता ।
विरजा दक्षिणा गङ्गा ब्रह्मविष्णुशिवात्मिका ॥
चतुर्विधफलोद्धात्री चतुराननकन्यका ।
सर्वाभीष्टप्रदात्री च नाम्नां षोडशकं स्मृतम् ॥
एभिर्नामपदैर्नित्यं पूजयेद्भक्तिमान्नरः ॥
ध्यानम् ।
ॐ अच्छस्वच्छलसद्दुकूलवसनां पद्मासनाद्ध्यासिनीं
हस्तन्यस्तवराभयाब्जकलशां राकेन्दुकोटिप्रभाम् ।
भास्वद्भूषणगन्धमाल्यरुचिरां चारुप्रसन्नाननां
श्री गङ्गादिसमस्ततीर्थनिलयां ध्यायामि कावेरिकाम् ॥
आवाहनम् ।
श्रीकण्ठविश्वेश्वरसन्निभानि लिङ्गानि यद्रोधसि लक्षकोट्यः ।
जलप्रवाहेपि च कोटिकोट्यः कवेरजायाश्शिवमूर्तयस्स्युः ॥
पयांसि तीर्थानि शिलाश्च देवता दिवौकसो वालुकतां प्रपन्नाः ।
अतो नदी सह्यगिरिप्रसूता सरित्सुमुख्यामनुजैरलभ्या ॥
रत्नासनम् ।
आदावादि विधातृमानससुता पश्चात्कवेरात्मजा
भूयःकुम्भभवस्य तस्य दयिता तस्मान्नदीरूपिणी ।
श्रीरङ्गातुलकुम्भघोणविलसन्मायूरमद्ध्यार्जुन
श्वेतारण्यमुखस्थलेषुमहिता सह्याद्रिजा दृश्यते ॥
पाद्यम् ।
मरुद्वृधे महादेवी महाभागे मनोहरे ।
सर्वाभीष्टप्रदे लोकमातः पाद्यं ददामि ते ॥
मरुद्वृधेमान्यजलप्रवाहे कवेरकन्ये नमतां शरण्ये ।
मान्ये जगत्पूज्यतमप्रभावे कावेरिकावेरि मम प्रसीद ॥
अर्घ्यम् ।
सह्यपादोद्भवे देवि श्रीरङ्गोत्सङ्गामिनि ।
कावेरीनामविख्याते गृहाणार्घ्यं नमोऽस्तुते ॥
प्राचीनवाक्कीर्तित पुण्यकीर्ते कल्याणिभक्तेप्सितदानधुर्ये ।
कुम्भोद्भवप्रेरितगुम्भितार्थे कावेरिकावेरि मम प्रसीद ॥
आचमनम् ।
श्रीसह्यशैलतनये सर्वासह्य निवारिणि ।
प्रसादं कुरु मे देवि प्रसन्नाभव सर्वदा ॥
संसारविस्रंसिनि संस्कृतानां सर्वाघसंहारिणि सर्ववन्द्ये ।
समस्तलोकैकशरण्यमूर्ते कावेरिकावेरि मम प्रसीद ॥
पञ्चामृतस्नानम् ।
तुलामासेतु कावेरी सर्वतीर्थाश्रिता नदी ।
पञ्चपातक संहर्त्री वाजिमेधफलप्रदा ॥
भक्तानुकम्पे मुनिभाग्यलक्ष्मि नित्ये जगन्मङ्गळदानशीले ।
निरञ्जने दक्षिणदेशगङ्गे कावेरिकावेरि मम प्रसीद ॥
शुद्धोदकस्नानम् ।
कावेरीतीरजन्मानः मृगपक्षिमहीरुहाः ।
तद्वारिशीतवातैश्च स्पृष्टामुक्तिं प्रयान्ति वै ॥
मोक्षश्रियोपासित पादपद्मे नित्येहरीशद्रुहिणस्वरूपे ।
सदाशिवेधातृवरप्रसादे कावेरिकावेरि मम प्रसीद ॥
वस्त्रम् ।
कवेरकन्येकावेरि निम्नगानाथनायिके ।
वस्त्राणिवसभूवस्त्रे भुक्तिमुक्तिप्रदायिनि ॥
देवर्षिपूज्ये विमले नदीशेपरात्परेभावित नित्यपूर्णे ।
समस्तलोकोत्तमतीर्थमातः कावेरिकावेरि मम प्रसीद ॥
यज्ञोपवीतम् ।
सर्वयज्ञाश्रयतटे सर्वयज्ञसहायिनि ।
यज्ञाङ्गसम्भवे देवि सर्वयज्ञफलप्रदे ॥
कलिप्रभूताखिलदोषनाशेविशुद्धविज्ञानजलप्रवाहे ।
कदम्बकल्हारकदम्बपूर्णे कावेरिकावेरि मम प्रसीद ॥
मङ्गळद्रव्यम् ॥ हरिद्रां कुङ्कुमम् ।
जयदेवि जगन्मातर्लोपामुद्रे पुरातने ।
जयभद्रे भवोद्धारि मङ्गळे मङ्गळप्रदे ॥
प्रसीदकारुण्य गुणाभिरामे प्रसीद कल्याणतरप्रवाहे ।
प्रसीद कामादिहरेपवित्रे कावेरिकावेरि मम प्रसीद ॥
गन्धम् ।
चन्दनागरुकस्तूरी हिमवालुककेसरैः ।
राङ्कवैस्साङ्कवैर्युक्तं गन्धं स्वीकुरु सह्यजे ॥
आद्ये परे चिन्मयपुण्यपादे पचेळिमप्रौढकवेरभाग्ये ।
अनन्यसाधारण वैभवाढ्ये कावेरिकावेरि मम प्रसीद ॥
अक्षतान् ।
यस्यां सकृत्स्नानमात्रान्नरोऽक्षय्यफलं लभेत् ।
नक्षत्रमाल्यवच्छुभ्रामक्षतैरर्चयाम्यहम् ॥
आभरणम् ।
किरीटहारकेयूरकुण्डलाङ्गदकङ्कणैः ।
हम्सकैर्मेखलाद्यैश्च भूषयेत्वां मरुद्वृधाम् ॥
ताटङ्कादिकम् ।
ताटङ्कं कण्ठसूत्रञ्च सिन्दूरं कज्जलादिकम् ।
सौमङ्गल्यप्रदेदेवि गृहाणागस्त्यवल्लभे ॥
पुष्पाणि ।
तुलसीबिल्वमन्दारकुशाग्रशतपत्रकैः ।
इन्दीवरैःकोकनदैर्हल्लकैःकमलैरपि ॥
कल्हारैःपुण्डरीकैश्च पुष्पैस्सौगन्धिकादिभिः ।
जातीचम्पकपुन्नागमल्लिकाकेतकादिभिः ॥
सुरभिद्रोणवासन्ती गन्धराजकदम्बकैः ।
पुष्पैस्सह्यसुतेमातर्वेण्यलङ्करणं कुरु ॥
बहुजन्मकृतानेकवासनावासितात्मभिः ।
दिव्यैस्सुमवरैःपूज्यां पूजयेत्पुष्पजातिभिः ॥
अथाङ्गपूजा ।
मरुद्वृधायै नमः - पादौ पूजयामि । महालक्ष्म्यै-
गुल्फौ । सह्यकन्यकायै - जङ्घे । सरस्वत्यै-जानुनी ।
अगस्त्यपत्न्यै - मध्यम् । कावेर्यै - नाभिम् । लोपामुद्रायै -
हृदयम् । वरप्रदायै - स्तनौ । कमण्डलुसमुत्पन्नयै -
बाहू । सर्वतीर्थाधिदेवतायै - कण्ठम् । विरजायै - नासिकाम् ।
दक्षिणगङ्गायै - श्रोत्रे । ब्रह्मविष्णुशिवात्मिकायै - नेत्रे ।
चतुर्विधफलोद्धात्र्यै - वक्त्रम् । चतुरानन कन्यकायै -
शिरः । सर्वाभीष्टप्रदात्र्यै नमः - सर्वाण्यङ्गानि पूजयामि ॥
॥ श्रीकावेर्यष्टोत्तरशतनामावळिः ॥
ॐ अनन्त-गुण-गम्भीरायै नमः ।
ॐ अर्कपुष्कर-सेवितायै नमः ।
ॐ अमृतस्वादु-सलिलायै नमः ।
ॐ अगस्त्यमुनि-नायिकायै नमः ।
ॐ आशान्त-कीर्ति-तिलकायै नमः । ५।
ॐ आशुगागम-वर्द्धिन्यै नमः ।
ॐ इतिहास-पुराणोक्तायै नमः ।
ॐ ईतिबाधा-निवारिण्यै नमः ।
ॐ उन्मत्तजन-दूरस्थायै नमः ।
ॐ ऊर्जितानन्द-दायिन्यै नमः । १०।
ॐ ऋषिसङ्घ-सुसंवीतायै नमः ।
ॐ ऋणत्रय-विमोचनायै नमः ।
ॐ लुप्त-धर्म-जनोद्धारायै ।
ॐ लूनभाव-विवर्जितायै नमः ।
ॐ एधिताखिल-लोकश्रियै नमः । १५।
ॐ ऐहिकामुष्मिक-प्रदायै नमः ।
ॐ ओङ्कारनाद-निनदायै नमः ।
ॐ ओषधीकृत-जीवनायै नमः ।
ॐ औदार्यगुण-निर्दिष्टायै नमः ।
ॐ औदासीन्य-निवारिण्यै नमः । २०।
ॐ अन्तःकरण-संसेव्यायै नमः ।
ॐ अच्छ-स्वच्छ-जलाश्रयायै नमः ।
ॐ कपिलाख्य-नदी-स्निग्धायै नमः ।
ॐ करुणा-पूर्ण-मानसायै नमः ।
ॐ कावेरी-नाम-विख्यातायै नमः । २५।
ॐ कामितार्थ-फल-प्रदायै नमः ।
ॐ कुम्भघोण-क्षेत्र-नाथायै नमः ।
ॐ कौतुकप्रथम-प्रभायै नमः ।
ॐ खगराज-रथोत्साह-रङ्गस्थल-सुशोभितायै नमः ।
ॐ खगावळि-समाक्रान्तकल्लोलावळिमण्डितायै नमः ३०।
ॐ गजारण्य-सुविस्तीर्ण-प्रवाह-जनमोहिन्यै नमः ।
ॐ गायत्र्याख्य-शिला-मद्ध्यायै नमः ।
ॐ गरुडासन-भक्तिदायै नमः ।
ॐ घन-गम्भीर-निनाद-निर्जरप्राप्त-निर्झरायै नमः ।
ॐ चन्द्रपुष्कर-मध्यस्थायै नमः । ३५।
ॐ चतुरानन-पुत्रिकायै नमः ।
ॐ चोलदेश-जनोद्धार-ग्रीष्मकाल-प्रवाहिन्यै नमः ।
ॐ चुञ्चक्षेत्र-समानीतायै नमः ।
ॐ छद्मदोष-निवारिण्यै नमः ।
ॐ जम्बूद्वीप-सरिच्छ्रेष्ठ-नदी-नद-गरीयस्यै नमः । ४०।
ॐ झङ्कारनाद-संस्पृष्ट-षट्पदाळि-समाकुलायै नमः ।
ॐ ज्ञानैक-साधन-परायै नमः ।
ॐ ञप्तिमात्रर्ति-हारिण्यै नमः ।
ॐ टिट्टिभारावस-व्याज-दिविज-स्तुति-पात्रिण्यै नमः ।
ॐ ठङ्कारनाद-सम्भेद-झर्झरीकृत-पर्वतायै नमः । ४५।
ॐ डाकिनी-शाकिनी-सङ्घनिवारण-सरित्तटायैनमः ।
ॐ ढक्का-निनादपारीण-पार्वतीश-समाश्रितायै नमः ।
ॐ णान्तवाच्य-द्विजाष्टाङ्गयोग-साधन-तत्परायै नमः ।
ॐ तरङ्गावळि-संविद्ध-मृदु-वालुक-शोभितायै नमः ।
ॐ तपस्विजन-सत्कार-निवेशित-शिलासनायै नमः । ५०।
ॐ तापत्रय-तरून्मूल-गङ्गादिभिरभिष्टुतायै नमः ।
ॐ थान्त-प्रमथ-संसेव्य-साम्ब-सान्निध्य-कारिण्यै नमः ।
ॐ दया-दाक्षिण्य-सत्कारशील-लोक-सुभावितायै नमः ।
ॐ दाक्षिणात्य-जनोद्धार-निर्विचार-दयान्वितायै नमः ।
ॐ धन-मान-मदान्धादि-मर्त्य-निर्वर्तन-प्रियायै नमः । ५५।
ॐ नमज्जनोद्धार-शीलायै नमः ।
ॐ निमज्जज्जन-पावनायै नमः ।
ॐ नागारिकेतु-निलयायै नमः ।
ॐ नाना-तीर्थाधि-देवतायै नमः ।
ॐ नारीजन-मनोल्लासायै नमः । ६०।
ॐ नानारूप-फल-प्रदायै नमः ।
ॐ नारायण-कृपा-रूपायै नमः ।
ॐ नादब्रह्म-स्वरूपिण्यै नमः ।
ॐ पराभूत-समस्ताघायै नमः ।
ॐ पशु-पक्ष्यादि-जीवनायै नमः । ६५।
ॐ पापतूलाग्नि-सदृशायै नमः ।
ॐ पापिष्ठजन-पावनायै नमः ।
ॐ फणीन्द्र-कीर्तित-कलायै नमः ।
ॐ फलदान-परायणायै नमः ।
ॐ बहुजन्म-तपो-योग-फलसम्प्राप्त-दर्शनायै नमः । ७०।
ॐ बाहुरूप-द्विपार्श्वस्थ-स्वमातृक-जलार्थिनां-कळमक्षेत्र-
शाल्यन्न-दान-निर्जित-वित्तपायै नमः ।
ॐ भगवत्कृत-सन्तोषायै नमः ।
ॐ भास्करक्षेत्र-गामिन्यै नमः ।
ॐ भागीरथी-समाक्रन्त-तुलामास-जलाश्रयायै नमः ।
ॐ मज्जद्दुर्जन-प्राग्जन्म-दुर्जयांहः प्रमार्जन्यै नमः । ७५।
ॐ माघ-वैशाखादि-मास-स्नान-स्मरण-सौख्यदायै नमः ।
ॐ यज्ञ-दान-तपः-कर्मकोटि-पुण्य-फल-प्रदायै नमः ।
ॐ यक्ष-गन्धर्व-सिद्धाद्यैरभिष्टुत-पदद्वयायै नमः ।
ॐ रघुनाथ-पदद्वन्द्व-विराजित-शिलातलायै नमः ।
ॐ रामनाथपुरक्षेत्र-कामधेनु-समाश्रितायै नमः । ८०।
ॐ लवोदक-स्पर्शमात्र-निर्वाण-पद-दायिन्यै नमः ।
ॐ लक्ष्मी-निवास-सदनायै नमः ।
ॐ ललना-रत्न-रूपिण्यै नमः ।
ॐ लघूकृत-स्वर्ग-भोगायै नमः ।
ॐ लावण्य-गुण-सागरायै नमः । ८५।
ॐ वह्निपुष्कर-सान्निद्ध्यायै नमः ।
ॐ वन्दिताखिल-लोकपायै नमः ।
ॐ व्याघ्रपाद-क्षेत्र-परायै नमः ।
ॐ व्योमयान-समावृतायै नमः ।
ॐ षट्काल-वन्द्य-चरणायै नमः । ९०।
ॐ षट्कर्म-निरत-प्रियायै नमः ।
ॐ षडास्य-मातृ-संसेव्यायै नमः ।
ॐ षडूर्मि-जित-सोर्मिकायै नमः ।
ॐ सकृत्स्मरण-संशुद्ध-तापत्रय-जनाश्रितायै नमः ।
ॐ सज्जनोद्धार-सन्धानसमर्थ-स्व-प्रवाहिन्यै नमः । ९५।
ॐ सरस्वत्यादि-देवीभिरभिवन्दित-निर्झरायै नमः ।
ॐ सह्यशैल-समुद्भूतायै नमः ।
ॐ सह्यासह्य-जन-प्रियायै नमः ।
ॐ सङ्गमक्षेत्र-सामीप्यायै नमः ।
ॐ स्ववशार्थ-चतुष्टयायै नमः । १००।
ॐ सौभरिक्षेत्र-निलयायै नमः ।
ॐ सौभाग्य-फल-दायिन्यै नमः ।
ॐ संशयाविष्ट-दूरस्थायै नमः ।
ॐ साङ्गोपाङ्ग-फलोदयायै नमः ।
ॐ हरि-ब्रह्मेशलोकेश-सिद्धवृन्दार-वन्दितायै नमः । १०५।
ॐ क्षेत्र-तीर्थादि-सीमान्तायै नमः ।
ॐ क्षपानाथ-सुशीतळायै नमः ।
ॐ क्षमातलाखिलानन्द-क्षेम-श्री-विजयावहायै नमः । १०८।
॥ इति श्रीकावेरी अष्टोत्तरशतनामावळिः ॥
उत्तराङ्गपूजा ।
धूपम् ।
रङ्गत्रयोत्सङ्गविराजमाने ब्रह्माद्रिकूटाश्रिततीर्थगर्भे ।
समस्तसिद्धाश्रमरम्यतीर्थे कावेरिकावेरि मम प्रसीद ॥
दशाङ्गोगुग्गुळोपेतस्सुगन्धोघ्राणतर्पणः ।
मरुद्वृधेऽम्बकावेरि धूपोयन्ते समर्पितः ॥
दीपम् ।
तुलागतेर्केतटिनि वराभिर्गङ्गादिभिस्सेवितपादपद्मे ।
त्रिकोटितीर्थाश्रम पुष्कराढ्ये कावेरिकावेरि मम प्रसीद ॥
आपोज्योतिस्त्वमस्यम्ब कुम्भसम्भवतेजसा ।
तेजःप्रदात्रि कावेरि दीपोयं प्रतिगृह्यताम् ॥
नैवेद्यम् । पाणीयम् । आपोशनम् ।
ददासि तुल्याभिरनर्घधान्यान्यशेषचोळीयजनस्यदेवि ।
भुक्तिप्रदेमुक्तिविधानदक्षे कावेरिकावेरि मम प्रसीद ॥
अन्नं चतुर्विधं रुच्यं शाकव्यञ्जन संयुतम् ।
सफलं सघृतं भुङ्क्ष्व कावेरि तटितां वरे ॥
फलेति ताम्बूलम् ।
निजाभिधानश्रवणादृतानां निश्शेषपापक्षयकारिणीत्वम् ।
निदाघतृष्णादि निरास दक्षे कावेरिकावेरि मम प्रसीद ॥
नीराजनम् ।
पराशरागस्त्यवसिष्ठमुख्यैर्महर्षिभिर्मान्यतपोभिरम्ब ।
त्वमाश्रिताकर्मठसिद्धिहेतुः कावेरिकावेरि मम प्रसीद ॥
सर्वतीर्थैस्तुलामासे त्वन्नीराजनपादुका ।
नीराजयामि भक्त्यात्वां कावेर्यम्बमरुद्वृधे ॥
प्रदक्षिणम् ।
मायूरमद्ध्यार्जुनकुम्भघोणश्रीरङ्गचुञ्चुस्थलघट्टगात्वम् ।
सस्योद्भवे सिन्धुयुते स्वतन्त्रे कावेरिकावेरि मम प्रसीद ॥
प्रदक्षिणं करोमित्वां पुरुषार्थप्रदायिनि ।
दक्षिणावर्तकश्रीनिवासप्रीते मरुद्वृधे ॥
नमस्कारान् ।
ब्रह्मादिभिर्देववरैस्त्रिसन्ध्यं वसिष्ठपूर्वैर्मुनिभिर्वरिष्ठैः ।
नित्यं गजारण्यगतैर्निषेव्ये कावेरिकावेरि मम प्रसीद ॥
नमस्ते तटितां मुख्ये निगमागम संस्तुते ।
पाहिपाह्यम्ब कावेरि प्रपन्नं मां कृपादृशा ॥
सुवासिनीभ्यः वायनदानानि ।
सुवासिनीनाञ्च निजाश्रितानां पतिप्रियत्वञ्च सुतादिवर्गम् ।
दास्यस्युदारं बहुभोगभाग्यं कावेरिकावेरि मम प्रसीद ॥
निजप्रवाहाप्रवलब्धपुण्यप्रसिद्धसत्कर्मफलोदयेन ।
नृणामभीष्टार्थविधायिनीत्वं कावेरिकावेरि मम प्रसीद ॥
पापक्षयं पारिशुध्यमायुरारोग्यमेवच ।
सौभाग्यमपिसन्तानं ज्ञानं देहि मरुद्वृधे ॥
इति सम्प्रार्थ्य ॥ छत्रचामरादिनासम्पूज्य विसर्जयेत् ॥
॥ इति व्रतचूडामणौ कावेरी पूजाविधिः ॥
Encoded and proofread by Nidhish Aaryan nidhish.184 at gmail.com