श्रीमहालसा सहस्रनामस्तोत्रम्
श्रीगणेशाय नमः । श्रीमहालसायै नमः ।
ऋषय ऊचुः -
साधो जीव चिरं सूत त्वं न आनन्ददाः कथाः ।
कथयस्वामृतप्रख्या भवतापहराः शुभाः ॥ १॥
अथान्यत्कथयास्मभ्यं मनःश्रुतिसुखं सखे ।
भुक्तिमुक्तिप्रदं विष्णुप्रीतिदं स्तोत्रमुत्तमम् ॥ २॥
सूत उवाच -
साधु पृष्टं द्विजश्रेष्ठाः स्मारितोऽहं हितैषिभिः
व्यासान्मया श्रुतं ब्रह्मा नारदायाब्रवीत्पुरा ॥ ३॥
कदाचिन्नारदो योगी त्रिलोकान्पर्यटन्मुनिः ।
गायन्विष्णुं दधद्वीणां सत्यलोकं ययौ मुदा ॥ ४॥
विविक्तेऽजं स्थितं वीक्ष्य जपन्तं वाग्यतं विभुम् ।
पप्रच्छ कुतुकान्नत्वा ब्रह्माणं स पुनःपुनः ॥ ५॥
नारद उवाच -
देव कर्तास्य विश्वस्य पातासि त्वमजः परः ।
त्वमेकान्ते किं जपसि तेन मे संशयो महान् ॥ ६॥
ब्रह्मा उवाच -
साधु पृष्टं त्वया वत्स संशयो माऽस्तु ते मुने ।
यतश्चराचरमभूतत्सर्वं सत्यं यतोह्यहम् ॥ ७॥
नाभ्यब्जादभवं विष्णोराराध्यो जनकः स मे ।
सृष्टिमोहापनुत्यै तं स्तोत्रेण स्तौमि नित्यशः ॥ ८॥
तस्य धर्मस्थितिकरा मूर्तयोऽसुरनाशकाः ।
अधर्मोपशमा वक्तुमलं नाहं भवोऽपि न ॥ ९॥
पुरा देवासुरैर्यत्नान्मथिते क्षीरनीरधौ ।
द्विःसप्त रत्नान्यभवन्छ्रीः सुधेन्दुर्मणिः सुरा ॥ १०॥
दैत्या जर्हुः सुधाकुम्भं ततोऽभूद्दुर्मना वृषा ।
शरणं मामनुप्राप्तो मयाऽपि हरिरीडितः ॥ ११॥
तुष्टोऽसौ मोहिनी नाम स्त्री बभूव महालसा ।
महती चालसा दूरात्तान्वीक्षन्ती सुरासुरान् ॥ १२॥
अनिर्देश्यवपुः सत्यज्ञानानन्दमयी शुभा ।
तां दृष्ट्वा मुमुहुश्चोचुस्ते देवि विभजाखिलम् ॥ १३॥
तयाऽथ तर्पिता देवाः सुधया सुरयाऽसुराः ।
रवीन्दुमध्यगं राहुं ज्ञात्वामृतकरं हरिः ॥ १४॥
छित्त्वा चक्रेण द्विरूपं दृष्ट्वा शीर्ष्ण्यदधात्पदम् ।
तामहं स्तौमि वरदां मोहिनीं श्रीमहालसाम् ॥ १५॥
नाम्नां सहस्रैर्जननीं सृष्टिज्ञानप्रदां पराम् ।
तद्गोप्यमति ते पुत्र कथये शृणु नारद ॥ १६॥
विष्णुमूर्तिरजा देवी मोहिनी श्री महालसा ।
सर्वदेवमयी माता त्रिगुणा परमेश्वरी ॥ १७॥
तस्या नाम्नां सहस्रं ते दिव्यं वच्मि शुणुष्व तत् ।
पुष्टिदं तुष्टिदं भुक्तिमुक्तिदं मोहनाशनम् ॥ १८॥
मातृकाक्रमसाहस्रं सर्वनामामृतं शुभम् ।
भक्तियुक्तः शुचिर्भूत्वा जपेत् श्रीमूर्तिसन्निधौ ॥ १९॥
हृदि ध्यात्वाऽधिदेवं च विष्णुमेतज्जपेन्मनुम् ।
चिच्छक्तिधर्मकामार्थमोक्षेषु विनियोज्यते ॥ २०॥
अस्य श्री महालसासहस्रनामस्तोत्रमन्त्रस्य शिवऋषिः ।
श्रीविष्णुमूर्तिमोहिनी श्रीमहालसा देवता । अनुष्टुप् छन्दः ।
ह्रीं बीजम् । क्लीं शक्तिः । सर्वज्ञा सर्वशक्तिश्चेति कीलकम् ।
चिच्छक्तिधर्मकामार्थमोक्षप्राप्त्यर्थं श्रीमहालसाप्रीत्यर्थे जपे
विनियोगः ।
अथ ध्यानं -
अरुणामतिपीतवाससां धृतकार्तस्वरचारुभूषणाम् ।
अतिरम्यवपुश्चतुर्भुजामनिशं नौमि महालसां शुभाम् ॥
उद्यद्भानुसहस्रदीप्तिवपुषां जाम्बूनदालङ्कृताम् ।
ब्रह्मेन्द्रादिसुरैः स्वमौलिमणिभिर्नीराजितश्रीपदाम् ॥
भक्ताभीष्टफलप्रदां च दधतीं हस्तैश्च कौक्षेयक-
शूलामित्रशिरांसि राहुमथिनीं घ्यायेत्सदा मोहिनीम् ॥
इति ध्यानं-
ओङ्काररूपा नम्या च नयनानन्ददायिनी ।
नित्या नतिप्रिया नन्दा महादेवी महेश्वरी ॥ १॥
महालसा विष्णुशक्तिर्महामाया महालया ।
सिद्धिर्धीरमृता नन्दाऽऽनन्दाऽऽकूतिरनिन्दिता ॥ २॥
आढ्याऽऽर्याऽभयाऽशक्याऽजयाऽजेयाऽमलाऽमरा ।
अमूर्तिरदितिश्चार्याऽऽदित्यमाताऽगुणाऽवनिः ॥ ३॥
आनन्दिन्यसुरघ्न्यर्ची रूपवत्यमृतप्रसूः ।
आकाररूपाऽयोध्याऽसुरच्छिदमरवल्लभा ॥ ४॥
अखण्डितायुरनघा चालिराजिरहस्करा ।
आमयघ्न्यलकाऽनेका चाहल्याऽभीतिरक्षया ॥ ५॥
अन्नपूर्णाऽनसूयाऽग्र्याऽशुभघ्नी चाजवन्दिता ।
आद्याऽभयप्रदाऽरूपाऽजरा चामलविग्रहा ॥ ६॥
आराध्याऽऽशापुरी चार्तिनाशिन्यमरवन्दिता ।
अनाकाराऽतुलाऽभीष्टा चाशेषाऽभीप्सितप्रदा ॥ ७॥
अप्रमेयाऽरुणाऽलक्ष्याऽद्वैताऽमूर्ताऽच्युताऽऽकृतिः ।
अष्टसिद्धिप्रदाऽनर्घ्यकौस्तुभा मुक्तकन्धरा ॥ ८॥
अनन्तशक्तिरज्ञेया चाणुरूपाऽरुणाकृतिः ।
अवाच्याऽनन्तरूपा चापूर्वाऽनाद्यादिरीश्वरी ॥ ९॥
इष्टेष्टदा तथेन्द्राणी चेशेशानीन्द्रमोहिनी ।
इलेशानमदघ्नी च ईशानवरदेन्दिरा ॥ १०॥
इच्छेषत्फुल्लकमललोचनेन्दीवरप्रदा ।
इडेभास्यनुतेशानप्रिया चेन्दुनिभानना ॥ ११॥
इडेन्द्रादिस्तुतेन्द्राणी वरदेड्येन्दिरेश्वरी ।
उत्तमोत्कृष्टवर्णोर्वी चोमोर्वश्युदयप्रभा ॥ १२॥
ऊतिरुद्यद्भानुकोटिप्रभा चोभयतोमुखी ।
उरगेन्द्रशयोत्केलिरुरुशक्तिरुरुप्रदा ॥ १३॥
ऊर्ध्वकेशी चोरुदेहा चोष्ठोद्धृतवसुन्धरा ।
ऊर्णावासोन्नताकाररूपोन्नद्धमदापहा ॥ १४॥
ऋतुपर्णार्चिता ऋद्धिरृतुपुष्पा ऌकारिका ।
एकैश्वर्यप्रदा चैन्द्री चैन्दव्योङ्कारसंस्थिता ॥ १५॥
ओषध्यन्नप्रदात्री च औषधिश्चौर्ववन्दिता ।
अन्तर्वत्यम्बिका चाम्बालिकाम्बुधिशयाम्बुधिः ॥ १६॥
अन्तकघ्नी चान्तकर्त्री चान्तिमान्तकरूपिणी ।
अम्बुदाम्बरसंस्थाङ्का चाशेषस्वरभूषिता ॥ १७॥
काम्या कामप्रदा कृष्णा कल्याणी कल्पकारिणी ।
काली कला कलिहरा काशिः कलिमलापहा ॥ १८॥
कम्बुग्रीवा कलाकेलिः कमलाक्षी कलानिधिः ।
कावेरी कुलकान्ता च कौमारी कलिका कथा ॥ १९॥
केतकी कुलजा कन्या कलकण्ठी कवित्वदा ।
कामबीजवती कान्तिः कोटिः केलिः कुहू कृतिः ॥ २०॥
कमला कलभोरुश्च कामाक्षी कमनीयभ्रूः ।
कलङ्करहिता कान्ता कुशला कुटिलालका ॥ २१॥
काष्ठा कला कुरुक्षेत्रभूमिः कलितदानवा ।
कुल्या कलावती कीर्तिः केशिघ्नी कीर्तिदायिनी ॥ २२॥
कविप्रीता च करुणा कृपा काश्मीरवासिनी ।
कादम्बरी कलरवा कुचमण्डलमण्डिता ॥ २३॥
कौशिकीकृतमाला च कौशाम्बी कोशवर्धिनी ।
कुशावर्ता कामधेनुः कपिला च कुलोद्भवा ॥ २४॥
कुङ्कुमाङ्कितदेहा च कुमारी कुङ्कुमारुणा ।
काशपुष्पप्रतीकाशा कालमारी च कालिका ॥ २५॥
किरणा कल्पलतिका कल्पसङ्ख्या कुमुद्वती ।
काश्यपी कुतुका कुध्रा कृशाङ्गी कायवर्जिता ॥ २६॥
कामिनी कुन्तहस्ता च कुलविद्या च कौलिकी ।
काव्यशक्तिः केलिपरा कलहा कान्तिलोचना ॥ २७॥
काञ्ची कनकधारा च कलिः कनककुण्डला ।
कमलस्रग्धरा कामवरदा कमलाकृतिः ॥ २८॥
काञ्चीकलापरम्या च कमलासनसंस्तुता ।
कम्बीजा कौत्सवरदा कामरूपनिवासिनी ॥ २९॥
खड्गिनी खड्गहस्ता च खट्वाङ्गवरधारिणी ।
खेटहस्ता खड्गधरा खनिः खस्था खलापहा ॥ ३०॥
खगमाता खगाख्यातिः खगेन्द्रवरवाहना ।
खुराभिघातसैन्यघ्नी खेचरी खेटकामदा ॥ ३१॥
खरदूषणहन्त्री च खरस्पर्शा खरूपिणी ।
गीता गीतप्रिया गीतिर्गायत्री गौतमीगुरुः ॥ ३२॥
गुणाध्यक्षा गुणवती गोपीचन्दनचर्चिता ।
गङ्गा गोप्ती गुणाढ्या गौर्गणेशा गीश्च गोपिका ॥ ३३॥
गोवर्धनधरा गुर्वी गोकुलाभयदायिनी ।
गण्डकी गौतमी गाथा गया गौरी गणेशसूः ॥ ३४॥
गोदावरी गोस्वरूपा गौतमाख्यमुनिस्तुता ।
गानप्रिया च गम्भीरा गेया गन्धर्वसेविता ॥ ३५॥
गान्धर्वी गीतकीर्तिश्च गेयविद्याविशारदा ।
गम्भीरनाभिर्गरिमा गुणरूपा गुणोद्धता ॥ ३६॥
गोपालरूपिणी गोष्ठी गहना गोधनप्रदा ।
गन्धप्रिया गोपसखी गारुडी गोहिता गतिः ॥ ३७॥
गोप्या गुरुतमा गम्या गोदा गुरुसुतप्रदा ।
घण्टानादप्रिया घोरा घोरदैत्यविनाशिनी ॥ ३८॥
घण्टा घोरवपुर्धृष्टदैत्यवक्षस्थला घृणिः ।
घटस्तनी घण्टिका च घटोघ्नी घटजन्मसूः ॥ ३९॥
घोषा घृताहुतिर्घासा घोरघर्घरनादिनी ।
ङ्काराकृतिसंविष्टा चतुष्कोणसबिन्दुका ॥ ४०॥
चारुश्चन्द्रप्रभा चञ्चुश्चतुराश्रमपूजिता ।
चतुर्वेदमयी चित्तिश्चित्स्वरूपा चराचरा ॥ ४१॥
चित्रिणी चक्रिणी चित्रा चित्राभरणभूषिता ।
चाणूरमर्दिनी चण्डा चण्डहर्त्री च चण्डिका ॥ ४२॥
चिदात्मिका चतुर्वर्गफलदा चतुराकृतिः ।
चकोराक्षी चारुहासा चमरी चतुरानना ॥ ४३॥
चतुःषष्टिःश्रीसुतन्त्रपूजनीया च चित्सुखा ।
चिन्त्या चक्षुश्चन्द्रभागा चपला चलकुण्डला ॥ ४४॥
चतुःषष्टिकलाज्ञानदायिनी चाक्षुषी मनुः ।
चर्मण्वती चन्द्रिका च चन्द्रमाता च चापिनी ॥ ४५॥
छत्रछाया छत्रवती छात्रबुद्धिप्रदा छविः ।
छायाग्रहहरा छाया छद्मदैत्यविनाशिनी ॥ ४६॥
जया जयन्ती जयदा जगत्त्रयहितैषिणी ।
जातरूपमयी ज्योत्स्ना जनता जातवत्सला ॥ ४७॥
जगती जङ्गमा ज्येष्ठा जन्मदा ज्वलितद्युतिः ।
जगज्जीवा जगद्वन्द्या जरामृत्युविनाशिनी ॥ ४८॥
जैत्री जीमूतसङ्काशा जीवना जीवनप्रदा ।
जितश्वासा जितारातिर्जनित्री जनमोहिनी ॥ ४९॥
जलमूर्तिर्जगद्बीजा जननी जन्मनाशिनी ।
जगद्धात्री जितेन्द्रा च ज्योतिर्जाया जनेष्टदा ॥ ५०॥
जीर्णा च जनमाता च जन्या जनकनन्दिनी ।
जालन्धरहरा जातिर्जनलोकनिवासिनी ॥ ५१॥
जयाजय्या जयकरी जरायुर्जवना जविः ।
जाम्बूनदविभूषा च ज्वाला जम्भवधोद्यता ॥ ५२॥
झल्लरी झङ्कृनिर्झम्पा झणझ्झणितनूपुरा ।
झङ्काररूपा झटितिवरदा झर्झरी झरिः ॥ ५३॥
ङ्काराकृतिसंव्यक्तिः कर्णिकाकुसुमाक्षरा ।
टङ्कहस्ता टङ्कृती च टीका टङ्कारभीषणा ॥ ५४॥
ठरूपा ठाकृतिर्डिम्भा डामरी डमरुप्रिया ।
ढौकिताशेषपाताला ढुण्ढिपूज्या ढरूपिणी ॥ ५५॥
णकाराकृत्यनुस्यूतेभदन्ताक्षमालिनी ।
ताम्रपर्णी तीर्थमयी तापसी तापसप्रिया ॥ ५६॥
त्रैलोक्यपूजिता तारा त्रिपदा तोमरा त्रुटिः ।
तन्तुस्त्रयीतनुस्तापी त्रिपथा त्र्यम्बकस्तुता ॥ ५७॥
तुला तामरसाभास्या त्रिलोकस्था त्रिविक्रमा ।
तमालदलरुक् तन्वी तरुणी तामसी तरी ॥ ५८॥
तत्त्वतुष्टा तत्त्वरूपा तमोहन्त्री त्रिशक्तिधृक् ।
तपस्विनी तपोयुक्ता तपस्विकुलवन्दिता ॥ ५९॥
तापापहन्त्री च तार्क्ष्यमाता तृप्तिस्त्रपा तृषा ।
तपःसिद्धिस्तपोनिष्ठा तृप्ता तापितदानवा ॥ ६०॥
थाथाथैथैथरीथारतालविद्याविशारदा ।
दया दयानिधिर्दुःखहन्त्री दान्ता द्रुतेष्टदा ॥ ६१॥
दात्री दीनार्तिशमनी दैत्यदर्पविनाशिनी ।
द्वारका दरपाणिर्दृग्दिव्या दिग्दमितेन्द्रिया ॥ ६२॥
दक्षा च दक्षिणा दीक्षा दीक्षिता दक्षपूजिता ।
दीर्घकेशी दीर्घनिद्रा दयालुर्दनुजापहा ॥ ६३॥
दारिद्र्यनाशिनी द्यौश्च दिङ्मण्डलविकासिता ।
द्रौपदी देवमाता च दुर्धर्षा दीधितिप्रदा ॥ ६४॥
दशाननहरा दोला द्युतिर्दीप्ता दितिर्दनुः ।
दिवागतिर्दर्पहरा दीप्तपावकलोचना ॥ ६५॥
दिव्यसौख्यप्रदा दीप्तिर्दिक्पालवरदा दशा ।
दावाग्निनाशिनी दूतिर्देवदुःखविनाशिनी ॥ ६६॥
धर्मदा धनदा धारा धराधरा धनुर्धरा ।
धेनुका ध्वजिनी धीरा धूलिर्ध्वान्तहरा ध्वनिः ॥ ६७॥
ध्येया ध्याना ध्यानशीला धूतपापा धुरन्धरा ।
धृतिर्धूर्धार्मिकी धुर्या धनधान्यविवर्धिनी ॥ ६८॥
धर्मिष्ठा धर्मफलदा ध्यानगम्या च धारणा ।
धरणिर्धवला नीतिर्निष्ठा नाकगतिप्रदा ॥ ६९॥
नागरूपा नागवल्ली नीला नागेन्द्रपूजिता ।
नारसिंही नदी नन्दा नन्द्यावर्तप्रिया तथा ॥ ७०॥
निधिर्निधिपुरस्था च न्यायसूर्न्यायकोविदा ।
नाभिस्तुता नयवती नरकार्तिहरी तथा ॥ ७१॥
नाभिर्नासा नूतनाङ्गा नरकघ्नी तथा नुतिः ।
नागपाशधरा नित्या नानामङ्गलदायिनी ॥ ७२॥
नारी नारायणी नौका नीलमेघसमप्रभा ।
नटी नीलाम्बरा नक्रपोथिनी नलिनी नतिः ॥ ७३॥
निशुम्भघ्नी नर्मदा च नक्षत्राख्या च नन्दिनी ।
पद्मिनी पद्मकोशाक्षी पुण्डलीकवरप्रदा ॥ ७४॥
पुराणपरमा प्रीतिः प्रेष्ठा पीताम्बरा परा ।
पुण्या प्रज्ञा पयोष्णी च पम्पा पद्मा पयस्विनी ॥ ७५॥
पीवरा पुरुषा पुष्टिः परमात्मस्वरूपिणी ।
पापघ्नी प्रियकर्त्रीच पवित्रा परमेश्वरी ॥ ७६॥
पुत्रिणी परमानन्दा पद्महस्ता पिकस्वरा ।
पुरुषार्थप्रदा प्रौढा प्राप्तिः पर्वतनन्दिनी ॥ ७७॥
पतिव्रता पतिमयी प्रिया च प्रीतिमञ्जरी ।
पातालवासिनी पूर्तिः पाञ्चाली प्राणिनां प्रसूः ॥ ७८॥
पराशक्तिः पाशहस्ता प्रसिद्धा पद्मजार्चिता ।
प्रवरातीरसंस्था च पुत्रपौत्रप्रदायिनी ॥ ७९॥
पितामही पितृमाता प्राची पूर्णा परात्मिका ।
परापवादसंहन्त्री पतगेन्द्रकृतासना ॥ ८॰॥
पतगेन्द्रशया पाकहन्त्री च परशुप्रिया ।
फणिमाता च फलदा फलभुक् फेनदैत्यहृत् ॥ ८१॥
फुल्लाम्बुजासना फुल्ला फुल्लपद्मकरा बलिः ।
बलिदा बालिका बाला बदरी बलशालिनी ॥ ८२॥
बलभद्रप्रिया बुद्धिर्बाहुदा बलिसंस्तुता ।
बालेन्दुशिखरा बन्दी बालग्रहविनाशिनी ॥ ८३॥
ब्राह्मी बृहत्तमा बाणा ब्रह्माणी ब्रह्मणस्पतिः ।
बृहद्भानुर्ब्रह्मरूपा ब्रह्मस्था च बृहस्पतिः ॥ ८४॥
बालसौख्यप्रदा लीला बाणासुरकरापहा ।
बलिमाता बृहद्धाम्नी बादरायणसंस्तुता ॥ ८५॥
भयघ्नी भीमरूपा भीर्भूतस्था भीमनन्दिनी ।
भूतिर्भवानी भयदा भीषणा भवभीषणा ॥ ८६॥
भूपतिर्भूधरधरा भूतावेशनिवासिनी ।
भालनेत्रा भैरवी च भूतिदा भ्रामरी भ्रमिः ॥ ८७॥
भूर्भुवःस्वः स्वरूपा च भीमा भवभयापहा ।
भीमभ्राजन्मणिग्रीवा भ्रातृपूज्या च भार्गवी ॥ ८८॥
भ्राजिष्णुर्भासुरा भास्या भानुकोटिसमप्रभा ।
भक्तिगम्या भ्रमघ्नी च भक्तकामदुहा च भूः ॥ ८९॥
भवभीतिहरा भव्या भ्रान्तिर्भगवती मही ।
महालक्ष्मीर्महाकाली महिषासुरघातिनी ॥ ९०॥
मत्तमातङ्गगमना मधुसूदनरूपिणी ।
मधुप्रिया मधुरवाङ्मधुघ्नी मथुरा मधुः ॥ ९१॥
मालतीकुसुमारामा मदमन्थरगामिनी ।
मातङ्गी मानदा माता मातृमण्डलवासिनी ॥ ९२॥
माया मान्यापुरी मुख्या मोक्षदा मीनरूपिणी ।
मन्दारभूधरधरा मन्दारस्रग्धरा मखिः ॥ ९३॥
मातामही मातृमाता मध्यमा मानसी मनुः ।
मेनकामुन्महेज्या च मोहिनीमन्त्रदेवता ॥ ९४॥
मधुस्रवा मतिर्मेधा मनीषा मृत्युमारिका ।
मृगत्वङ्मा मृगाक्षी च मोहहन्त्री मनस्विनी ॥ ९५॥
मनेप्सितप्रदा माता मदहृन्मदिरेक्षणा ।
यमुना यमभीतिघ्नी यमलार्जुनमध्यगा ॥ ९६॥
यमलोकहरा याम्या योगिनी यमला यतिः ।
यन्त्रोद्धारवती यात्रा योगनिद्रा यमप्रिया ॥ ९७॥
यशस्विनी योगिगम्या योग्या योगिजनप्रिया ।
योगाङ्गध्यानशीला च यज्ञभूर्यज्ञवर्धिनी ॥ ९८॥
योगपट्टधरा यज्ञा यज्ञाङ्गा यज्ञकामदा ।
यज्ञरूपा यज्ञकर्त्री यत्तत्पदनिबन्धिनी ॥ ९९॥
यशोदा यादवी यूतिर्युद्धज्ञा यदुवंशजा ।
यादवार्तिहरा युक्ता यक्षिणी यवनार्दिनी ॥ १००॥
रक्ताम्बरधरा रक्ता रक्तबीजवधोद्यता ।
रमणी राममूर्तिश्च रागिणी रक्तदन्तिका ॥ १०१॥
रतिप्रिया रतिकरी रक्तकेशी रणप्रिया ।
रक्तकेयूरवलया रतिरागविवर्धिनी ॥ १०२॥
रोलम्बपूर्णमाला च रमणीया रमापतिः ।
राका राकेशवदना रम्या रणितनूपुरा ॥ १०३॥
रक्षोघ्नी रतिदात्री च रागज्ञा रागवल्लभा ।
रत्नगर्भा रत्ननखी राक्षसी रजनीप्रिया ॥ १०४॥
रात्री राजीवनेत्रा च रणभूमी रणस्थिरा ।
लक्ष्मीर्लावण्यरूपा च ललिता लोललोचना ॥ १०५॥
लीलावती लक्षरूपा लङ्का च लवणोदधिः ।
लङ्केशहन्त्री लेखा च लङ्काराज्यप्रदा लता ॥ १०६॥
लीला लीलानरवपुर्लोला लक्ष्या लसत्तनुः ।
लवणासुरसंहन्त्री लेख्या लावण्यभूर्लिपिः ॥ १०७॥
लक्ष्मणा लक्षणाढ्या च लोलार्कपरिपूजिता ।
वरेण्या वसुधा वीरा वरिष्ठा च वरप्रदा ॥ १०८॥
वामना वैदिकी विद्युद्वाराही वेत्रवत्यपि ।
विश्वेशा वीरमाता च वीरश्रीर्वैष्णवी विभुः ॥ १०९॥
वेदिर्वेद्या वेदिता च विष्णुमाया वसुन्धरा ।
व्योमहन्त्री विश्वरूपा विद्या वाग्विश्ववेदिता ॥ ११०॥
वृद्धिर्वृत्तिर्वरा विश्वा व्योमरूपा वषट्कृतिः ।
वनमालाधरा व्याप्तिर्विख्याता विमला वसुः ॥ १११॥
व्यालरूपा वैद्यविद्या वासिष्ठी वीर्यदायिनी ।
वाताली वारूणी विष्वक्सेना वाचस्पतिर्वधूः ॥ ११२॥
विरिञ्चिजननी वेदमाता वह्निस्वरूपधृक् ।
वागुरा वधुरूपा च वालिहन्त्री वराप्सरा ॥ ११३॥
शाम्भवी शम्भुजननी शम्बरासुरघातिनी ।
शाम्बरी शमनी शान्तिः श्रेष्ठा श्रीर्श्रीकरी शमी ॥ ११४॥
शातकुम्भमयी शक्तिः श्यामा शीलवती शिवा ।
शालग्रामशिला शीता श्रीनिधिः श्रीमतिः शुभा ॥ ११५॥
शाकम्भरी शुचिः श्रद्धा शोणाक्षी शेषवन्दिता ।
शताक्षी शबला शान्ता शस्ता शोकविनाशिनी ॥ ११६॥
शत्रुमारी शत्रुरूपा शरधन्वधरा श्रुतिः ।
शरदिन्दुप्रभा शिक्षा शतघ्नी शान्तिदायिनी ॥ ११७॥
षण्मातृजननी षष्ठिः षष्टिहायनरूपिणी ।
षडङ्गज्ञा षड्विकाररहिता षोडशी कला ।
सर्वज्ञा सर्वशक्तिश्च सुलभा सरयूः सखी ॥ ११९॥
सुखदा सामगीतिश्च स्मृतिः सत्या समा सती ।
सरणी सुन्दरी सीता सुभद्रा च सरस्वती ॥ १२०॥
सुश्रोणिः सुमुखी सौम्या सुस्पर्शा सुमतिः सुधा ।
स्वच्छन्दा सुभगा साध्वी सुतन्तुः सुप्रभा समित् ॥ १२१॥
सुस्पृष्टा सात्विकी सारी सकलागमपूजिता ।
हंसा हैहयसंहन्त्री हर्षदात्री हरिप्रिया ॥ १२२॥
हविर्हलधरा हन्त्री ह्रीम्बीजा हरवन्दिता ।
हालाहलधरा होरा हयगा हतदानवा ॥ १२३॥
हयग्रीवतनुर्हैमी हंसोज्ज्वलशिरोरुहा ।
हुङ्कारहतदैत्याहिर्हयघ्नी हंसवाहना ॥ १२४॥
हाहागीतप्रिया हावभूमिर्हास्यप्रिया तथा ।
क्षेमङ्करी क्षितिः क्षीरसमुद्रशयना क्षमा ॥ १२५॥
ज्ञेया ज्ञानस्वरूपा च ज्ञानदा ज्ञानदीपिका ॥ १२६॥
॥ ज्ञानदीपिका ॐ नम इति ॥
ब्रह्मा उवाच -
इतीदं जगदम्बायाः स्तोत्रं नारद ते मया ।
दिव्यं महालसाख्यातं विष्णुमूर्तेः सुखप्रदम् ॥ १॥
यश्चेदं पठते नित्यं नरो भक्त्या प्रसन्नधीः ।
त्रिकालमेककालं वा देवीध्यानपरायणः ॥ २॥
चण्डिकायतने धीमाञ्छुचिश्च विजितेन्द्रियः ।
महालसाम्बिका तस्मै प्रयच्छेदीप्सितान्वरान् ॥ ३॥
रवौ षष्ठ्यां चतुर्दश्यामष्टम्यां वा समाहितः ।
जपेन्नवम्यामिष्टार्थं लभते नात्र संशयः ॥ ४॥
मार्गशीर्षे सिते चम्पाषष्ठ्यां देवीं हृदि स्मरन् ।
जपेन्माघे रवौ षष्ठ्यां सप्तम्यां प्रयतो नरः ॥ ५॥
अश्वत्थे राजवश्यार्थी गोष्ठे गोमान्धनी गृहे ।
क्षेत्रे धान्यमभीष्टं स्यात्पुत्रार्थी देवतालये ॥ ६॥
श्रीवृक्षे राज्यकामस्तु रोगघ्नः सूर्यसन्निधौ ।
वाक्कामोऽभिमुखं देव्याः सर्वकामस्तथैव च ॥ ७॥
शारदे नवरात्रे यः कृत्वा नित्यविधिर्व्रती ।
दशावृत्त्या पठेद्धीमान्देव्याराधनतत्परः ॥ ८॥
स्वप्ने मूर्तिं स पश्येद्धि वरदां श्रीमहालसाम् ।
शतावृत्त्या पठन्नेतत्सर्वान्कामानवाप्नुयात् ॥ ९॥
बिल्वपत्राब्जकुसुमैर्जातीचम्पककेतकैः ।
तुलसीमञ्जिरीभिर्वा पूगैरामलकैः शुभैः ॥ १०॥
फलैः पुष्पैस्तथा धान्यैः पूजयेन्नामभिः शुभाम् ।
सुखी गोमान्धनी पुत्री यशस्वी रोगवर्जितः ॥ ११॥
ज्ञातिप्रधानो भूत्वान्ते देवीसायुज्यमाप्नुयात् ।
इति ते स्तोत्रमाख्यातं गुह्याद्गुह्यतरं महत् ॥ १२॥
इदं गोप्यं पवित्रं च धर्म्यं धन्यं सुमङ्गलम् ।
मातृकाक्रमसाहस्रं सर्वनामसुदुर्लभम् ॥ १३॥
इति भविष्योत्तरपुराणे ब्रह्मनारदसंवादे महालसासहस्रनामस्तोत्रं सम्पूर्णम् ।