श्रीमहाराज्ञीस्तोत्रम् २ महाराज्ञीस्तवराजः
ॐ श्रीभैरव उवाच ।
अधुना कथयिष्यामि स्तोत्रराजं परात्परम् ।
मूलमन्त्रमयं दिव्यं तत्त्वभूतं मनोहरम् ॥
राज्ञीप्रियं पापहरं लक्षपूजाफलप्रदम् ।
जपलक्षसमं स्तोत्रं ध्यानकोटिसमं प्रिये ॥
राज्ञीस्तोत्रस्य देवेशि ब्रह्मा ऋषिरुदाहृतः ।
गायत्री छन्द इत्युक्तं श्रीराज्ञी देवतेरिता ॥
माया बीजं परा शक्तिः कामः कीलकमीश्वरि ।
भोगापवर्गसिद्ध्यर्थे विनियोगः प्रकीर्तितः ॥
ॐ अस्य श्रीमहाराज्ञीस्तवराजस्य श्रीब्रह्माऋषिः ।
गायत्री छन्दः, श्रीमहाराज्ञी भूतेश्वरी देवता,
ह्रीं बीजं, सौः शक्तिः, क्लीं कीलकं,
आत्मनो आत्मनो वाङ्मनःकायोपार्जितपापनिवारणार्थं
श्रीमहाराज्ञीप्रसादद्वारा भोगापवर्गसिद्ध्यर्थे,
पाठे विनियोगः ॥
ध्यानम् ।
उद्यद्दिवाकरसहस्ररुचिं त्रिनेत्रां
सिंहासनोपरिगतामुरगोपवीताम् ।
खड्गाम्बुजाढ्यकलशामृतपात्रहस्तां
राज्ञीं भजामि विकसद्वदनारविन्दाम् ॥
तारमिन्दुकलिकावतंसितं
वेदसागरमणिं मनोहरम् ।
यो जपेदुषसि रत्नमालया
राज्यमाशु लभते स साधकः ॥ १॥
भूतिमिन्दुनवबिम्बमण्डितां
नादविन्दुललितां जपेत्तु यः ।
वारमेकमुरुवारणस्थितो
जेष्यति स्मयमयानऽरीन्रणे ॥ २॥
रसां जपेद्यो भुवनेशि मन्त्री
त्वन्मन्त्रमध्ये मदनोपतप्तः ।
रम्भां समालिङ्ग्य विमानचारी
लीलां भजेन्नन्दनवाटिकायाम् ॥ ३॥
वह्निबीजमणिमाद्यसिद्धिदं
बिन्दुबिम्बशशिखण्डमण्डितम् ।
यो जपेन्निशि धनाभिलाषवान्
स क्षणाद्भवति वित्तदोपमः ॥ ४॥
कामराजममराभिवन्दितं यो
जपेन्निधुवनेऽक्षमालया ।
तस्य यान्ति वशतां सुराङ्गनाः
किं पुनर्जगति भूभृदङ्गनाः ॥ ५॥
शक्तिं भक्त्या यो जपेच्छक्तिपूजा-
काले कालीपादपद्मार्पितान्तः ।
नक्तं तस्य स्मेरववक्त्रा घृताची
वश्या वेश्या स्वर्गता वा शची च ॥ ६॥
भगवत्यै तथा राज्ञ्यै नाममन्त्रमिति स्मरेत् ।
यो देवि तस्य वश्याः स्युर्भैरवस्याष्टसिद्धयः ॥ ७॥
मायां नमोन्ते यदि साधकेन्द्रो
जपेन्महेशानि शिवालयस्थः ।
तत्रैव देवीं परमार्थराज्ञीं
पश्येत्स सद्यो वरसिद्धिदात्रीम् ॥ ८॥
ठद्वयं यदि जपेन्निशाक्षये
क्षीरभुक् स्वतटिनीतटस्थितः ।
जिष्णु विष्णुकमलासनेश्वरा
यान्ति देवि वशतां तदा क्षणात् ॥ ९॥
भूगेहवृत्तत्रयनागपत्र-
षडारयोन्यश्रकबिन्दुबिम्बे ।
निषेदुषीं राजकुलाधिदेवीं
राज्ञीं भजे राजकलावतंसाम् ॥ १०॥
देवि श्रीभूतधात्रीप्रवरगुणमये
निष्कले निर्गुणे मे माये मातः शरण्ये
गिरिवरतनये चिन्मये तत्त्वरूपे ।
दुर्गे चण्डि प्रमाथे त्रिपुरविजयिनि
स्मेरवक्त्रे वरेण्ये कारुण्याढ्ये प्रशस्ते
सुरदितिजनुते राज्ञि वै त्वं प्रसीद ॥ ११॥
इति स्तोत्रं मन्त्रस्फुरणकरुणानन्दनिलयं
पठेद्भक्त्या प्रातस्तव गिरिसुते योगनिलयम् ।
भवेत्सद्यो भूमौ नृपमुकुटनीराजितपदो-
ऽमृतो मुक्तिं वान्ते तव भवनमाप्नोति वरदे ॥ १२॥
इति राज्ञ्याः परं तत्त्वं पञ्चाङ्गमखिलं शिवे ।
सर्वस्वं च रहस्यं च सर्वसारस्वनप्रदम् ॥ १३॥
आनन्दवर्धनं गुह्यं परमैश्वर्यकारणम् ।
भोगापवर्गदं पुण्यं दारिद्र्यभयनाशनम् ॥ १४॥
राज्यप्रदं भक्तिकरं सर्वशत्रुनिबर्हणम् ।
पञ्चाङ्गमखिलं देव्या न वक्तव्यं दुरात्मने ।
तव भक्त्या मया ख्यातं गोपनीयं प्रयत्नतः ॥ १५॥
इति श्रीरुद्रयामले तन्त्रे दशविद्यारहस्ये श्रीमहाराज्ञीस्तवराजः ॥
श्रीमहाराज्ञीस्तोत्रम्