पुरुषोत्तमप्रोक्तं सर्वदेवतामन्त्रस्तोत्रम्
श्रीनारायणीश्रीरुवाच ।
कस्य मन्त्रस्य तस्यास्तु जपो विधिश्च कीदृशः ।
वद मे भगवन्नेतत् सर्वलोकाभिकाङ्क्षितम् ॥ ६५॥
श्रीपुरुषोत्तम उवाच ।
शृणु नारायणीश्रि! त्वं पदार्थाः शब्दबोधिताः ।
नित्यशब्दात्मको वेदो मन्त्रास्तत्रोत्तमा मताः ॥ ६६॥
श्रेष्ठास्तत्र हरेर्मन्त्राः लक्ष्मीमन्त्रा सदोत्तमाः ।
दुर्गायाश्च गणेशस्य रवेः शम्भोर्विभावसोः ॥ ६७॥
मन्त्राणां चोत्तमा मन्त्राः महालक्ष्म्या भवन्ति हि ।
श्यामायाः कम्भराया वै वदामि ते निबोध माम् ॥ ६८॥
प्रातरुत्थाय मां नत्वा स्नात्वा शुभासनस्थिता ।
स्मर स्वमस्तके लक्ष्मि दिव्यं कमलमुज्ज्वलम् ॥ ६९॥
सहस्रपत्रशोभाड्यं सकेसरसकर्णिकम् ।
तत्र श्रीसद्गरुं ध्यात्वा प्रसन्नं करुणामयम् ॥ ७०॥
श्रीमद्गोपालकृष्णाख्यं पितरं सद्गुरुं परम् ।
आचम्य चोर्ध्वपुण्ड्रं सचन्द्रं कृत्वा ततः परम् ॥ ७१॥
स्कन्धे कृत्वा पट्टके च हृदि धृत्वा परेश्वरीम् ।
अन्तःशुद्धिमती भूत्वा सन्ध्यावन्दनमाचर ॥ ७२॥
अश्वत्थपत्राकारेण पात्रेण सकुशाक्षतम् ।
सपुष्पचन्दनं चार्घ्यं महालक्ष्म्यै प्रदेहि तत् ॥ ७३॥
त्रिरर्घ्यं सम्प्रदायाऽथ तर्पयित्वा जलेन च ।
होमभूमिं प्रगत्वैव सर्वशृङ्गारशोभिता ॥ ७४॥
सर्वपूजादिसामग्रीसहिता चासनस्थिता ।
अङ्गन्यासान् कुरु लक्ष्मि तान्निबोध मयोदितान् ॥ ७५॥
``ओमनादिपरब्रह्मेश्वर्यै शिरसि मे नमः ।
ओमनादिकृष्णनारायण्यै भाले च मे नमः ॥ ७६॥
ओमनादिवासुदेवीलक्ष्म्यै मे नेत्रयोर्नमः ।
ओमनादिब्रह्मलक्ष्म्यै मुखे मे ते नमो नमः ॥ ७७॥
ओमनादिकम्भरालक्ष्म्यै च कण्ठेऽस्तु मे नमः ।
ओमनादिमहालक्ष्म्यै हृदये मे च ते नमः ॥ ७८॥
ओमनादिश्रीनरायण्यै नमस्ते ममोदरे ।
ओमनादिवैष्णव्यै ते नाभौ मम नमो नमः ॥ ७९॥
ओमनादिललितायै जघने ते च मे नमः ।
ओमनादिश्रियै चाऽस्तु नमः सक्थ्नोश्च मे सदा ॥ ८०॥
ओमनादिकमलायै नमो जान्वोश्च मेऽस्तु ते ।
ओमनादिरमायै ते नमोऽस्तु पादयोर्मम ॥ ८१॥
ओमनादिहरिण्यै ते करयोर्मे नमोऽस्तु ते ।
ओमनादिमहामात्रे सर्वतस्ते नमो नमः ॥ ८२॥
ओमनादिपद्मायै द्विहस्ततलयोस्ते नमः ।
ओमनादिरक्षित्र्यै ते पृष्ठदेशे नमो नमः ॥ ८३॥
ओमनादिहिरण्यायै रम्याङ्गेषु च ते नमः ।
ओमनादिसुवर्णायै भाग्यरेखासु ते नमः ॥ ८४॥
ओमनादिकुमार्यै ते शीलधर्मे नमो नमः ।
ओमनादिजनन्यै ते सर्वाङ्गेषु नमो नमः ॥ ८५॥
एवं न्यासान् विनिर्वर्त्य ध्यायस्व श्रीपुराधिपाम् ।
ध्यायस्व श्रीपुरं चापि श्रीपुरेशीश्वरं च माम् ॥ ८६॥
सुवर्णनिर्मितां मूर्तिमावाहय ततः परम् ।
आसनं सम्प्रदेहि त्वं पाद्यमर्घ्यं ततः परम् ॥ ८७॥
आचमनं जलं पञ्चामृतस्नानं प्रकारय ।
सुगन्धितैलसाराद्यैः प्रमर्दय परेश्वरीम् ॥ ८८॥
आभिषेकं कारयित्वा वस्त्रभूषार्पणं कुरु ।
सर्वं शृङ्गारं सौभाग्योत्तमं धूपं प्रदीपकम् ॥ ८९॥
नमस्कारं दण्डवच्चाऽरार्त्रिकं च प्रदक्षिणम् ।
नैवेद्यं विविधं भोज्यं भक्ष्यं चोष्यं च लेह्यकम् ॥ ९०॥
जलं शाकादि वै पेयं दुग्धसारं च पायसम् ।
जलपानं नागवल्लीदलताम्बूलकं फलम् ॥ ९१॥
प्रदेहि श्रीमहालक्ष्म्यै क्षमापराधनं वृणु ।
पुष्पाञ्जलिं परिहारं कृत्वा स्वोद्यममाचर ॥ ९२॥
ततश्च तुलसीमालां धृत्वा मन्त्रं जप प्रिये ।
महालक्ष्म्या महामन्त्रं जप लक्ष्मि मम प्रियम् ॥ ९३॥
सर्वार्थसाधकं सर्वानर्थानां नाशकं प्रभुम् ।
उदङ्मुखा प्राङ्मुखा वा जप श्रीसन्निधौ सदा ॥ ९४॥
``ॐ महालक्ष्म्यै विद्महै महाविष्णुपत्न्यै धीमहि ।
तन्नो महालक्ष्मीः प्रचोदयात् ।
ॐ श्रीं महालक्ष्म्यै नमः ॐ ह्रीं क्लीं श्रीं फट् स्वाहा'' ॥ ९५॥
षट्त्रिंशल्लक्षसङ्ख्यास्तु जपन् सिद्धिर्भविष्यति ।
तद्दशांशस्तु होमः स्यात् तद्दशांशं तु तर्पणम् ॥ ९६॥
तद्दशांशं तु भक्तानां भोजनं समुपाचर ।
एवं मन्त्रो भवेत् सिद्धः काम्यजपाँस्ततः कुरु ॥ ९७॥
लक्षमात्रं जपित्वा तु मनुष्यान् वशमानयेत् ।
नारीर्द्विलक्षजाप्येन त्रिलक्षैस्तु नृपाँस्तथा ॥ ९८॥
चतुर्लक्षैर्नागकन्याः पातालस्त्रीस्तु पञ्चभिः ।
षड्लक्षैर्भूसुन्दरीश्च सुराणीः सप्तलक्षकैः ॥ ९९॥
अष्टलक्षैर्देवताश्च गीर्वाणान्नवलक्षकैः ।
दशलक्षैश्च वै पितॄन्नेकादशैः सुरेश्वरान् ॥ १००॥
द्वादशलक्षजापैश्च सिद्धीर्वशा नयेत्तथा ।
लक्ष्मीवान् धनवान् स्याच्च स्मृद्धिमान् स भवेत्तथा ॥ १०१॥
यथेष्टं लभते सर्वमैश्वर्यं दैवतं तथा ।
ध्यायन्तस्तां जपन्तस्तां लभन्ते महतीं श्रियम् ॥ १०२॥
सम्प्राप्यते सिद्धिरेषा नाऽसद्भिस्तु कदाचन ।
इति श्रीलक्ष्मीनारायणीयसंहितायाः द्वापरयुगसन्तानात्मकस्य तृतीयखण्डे
११९-अध्यायान्तर्गतं पुरुषोत्तमप्रोक्तं सर्वदेवतामन्त्रस्तोत्रं सम्पूर्णम् ।
लक्ष्मीनारायणीयसंहिता । खण्ड ३। अध्याय ११९/६५-१०२॥
lakShmInArAyaNIyasaMhitA . khaNDa 3. adhyAya 119/65-102..
Proofread by PSA Easwaran