श्रीरुद्रचण्डीस्तोत्रम्
ॐ श्रीगणेशाय नमः । ॐ श्री गुरवे नमः । ॐ नमः शिवाय ।
ॐ अस्य श्रीरुद्रचण्डीस्तोत्रमन्त्रस्य श्रीरुद्रऋषिः, अनुष्टुप्छन्दः,
श्रीरुद्रचण्डी देवता, ऐं बीजं, ह्रीं शक्तिः, क्लीं कीलकं,
श्रीरुद्रचण्डीदेवताप्रित्यर्थं श्रीरुद्रचण्डीस्तोत्रपाठे विनियोगः ॥
ऋष्यादिन्यासः ।
श्रीरुद्र-ऋषये नमः शिरसि ।
अनुष्टुप्छन्दसे नमः मुखे ।
श्री रुद्रचण्डीदेवतायै नमः हृदि ।
ऐं बीजाय नमः गुह्ये ।
ह्रीं शक्तये नमः नाभौ ।
क्लीं कीलकाय नमः पादयोः ।
श्रीरुद्रचण्डीप्रीत्यर्थं श्रीरुद्रचण्डीस्तोत्रपाठे विनियोगाय नमः सर्वाङ्गे ॥
करन्यासः ।
ॐ ह्रां अङ्गुष्ठाभ्यां नमः ।
ॐ ह्रीं तर्जनीभ्यां नमः ।
ॐ ह्रूं मध्यमाभ्यां नमः ।
ॐ ह्रैं अनामिकाभ्यां नमः ।
ॐ ह्रौं कनिष्ठिकाभ्यां नमः ।
ॐ ह्रः करतलकरपृष्ठाभ्यां नमः ॥
अङ्गन्यासः ।
ॐ ह्रां हृदयाय नमः । ॐ ह्रीं शिरसे स्वाहा । ॐ ह्रूं शिखायै वषट् ।
ॐ ह्रैं कवचाय हुं । ॐ ह्रौं नेत्रत्रयाय वौषट् । ॐ ह्रः अस्त्राय फट् ॥
ध्यानम् ।
ॐ रक्तवर्णां महादेवी लसच्चन्द्रविभूषितां
पट्टवस्त्रपरीधानां स्वर्णालङ्कारभूषितम् ।
वराभयकरां देवीं मुण्डमालाविभूषितां
कोटिचन्द्रसमासीनां वदनैः शोभितां पराम् ॥
करालवदनां देवीं किञ्चिजिह्वां च लोलितां
स्वर्णवर्णमहादेवहृदयोपरिसंस्थिताम् ।
अक्षमालाधरां देवीं जपकर्मसमाहितां
वाञ्छितार्थप्रदायिनीं रुद्रचण्डीमहं भजे ॥
मानसपूजनम् -
ॐ लं पृथ्वीतत्त्वात्मकं गन्धं समर्पयामि नमः ।
ॐ हं आकाशतत्त्वात्मकं पुष्पं समर्पयामि नमः ।
ॐ यं वायुतत्त्वात्मकं धूपं समर्पयामि नमः ।
ॐ रं अग्नितत्त्वात्मकं दीपं समर्पयामि नमः ।
ॐ वं जलतत्त्वात्मकं नैवेद्यं समर्पयामि नमः ।
ॐ सं सर्वतत्त्वात्मकं ताम्पूलं समर्पयामि नमः ।
रुद्रचण्डी गायत्री -
ॐ ह्रीं रुद्रचण्डिकायै विद्महे । पूर्णफलप्रदायिनै धीमहि ।
तन्नो देवी प्रचोदयात् ।
मूल मन्त्रः - ॐ ऐं ह्रीं ॐ क्रिं ह्लीं क्लीं ह्रीं ह्रीं । (नवाक्षरी)
ॐ रुद्रचण्डि नमस्तुभ्यं चण्डि वैरिविनाशिनि ।
सर्वपापहरे देवि सर्वदा वरदा भव ॥)
श्रीरुद्र उवाच ।
ॐ चण्डिकां हृदये न्यस्य शरणं यः करोत्यपि ।
अनन्तफलमाप्नोति देवि चण्डीप्रसादतः ॥ १॥
रविवारे यदा चण्डीं पठेदागमसम्मताम् ।
नवावृत्तिफलं तस्य जायते नात्र संशयः ॥ २॥
सोमवारे यदा चण्डीं पठेद्यस्तु समाहितः ।
सहस्रावृत्तिपाठस्य फलं जानीहि सुव्रते ॥ ३॥
कुजवारे जगद्धात्रि पठेदागमसम्मताम् ।
शतावृत्तिफलं तस्य बुधे लक्षफलं ध्रुवम् ॥ ४॥
गुरौ वारे महामाये लक्षयुग्मफलं ध्रुवम् ।
शुक्रे देवि जगद्धात्रि चण्डीपाठेन शाङ्करी ॥ ५॥
ज्ञेयं तुल्यफलं दुर्गे पठेद्यदि समाहितः ।
शनिवारे जगद्धात्रि कोट्यावृत्तिफलं ध्रुवम् ॥ ६॥
अत एव जगद्धात्रि (महेशानि) य्श्च चण्डीं समभ्यसेत् ।
स धन्यश्च कृतार्थश्च राजराजाधिपो भवेत् ॥ ७॥
आरोग्यं विजयं सौख्यं वस्त्ररत्नप्रवालकम् ।
पठनाच्छ्रवणाच्चैव जायते नात्र संशयः ॥ ८॥
धनं धान्यं प्रवालं च वस्त्रं रत्नविभूषितम् ।
चण्डीश्रवणमात्रेण कुर्यात्सर्वं महेश्वरी ॥ ९॥
मूलपाठः -
ॐ घोरचण्डी महाचण्डी चण्डमुण्डविखण्डिनी ।
चतुर्वक्त्रा महावीर्या महादेवविभूषिता ॥ १॥
रक्तदन्ता वरारोहा महिषासुरमर्दिनी ।
तारिणी जननी दुर्गा चण्डिका चण्डविक्रमा ॥ २॥
गुह्यकाली जगद्धात्री चण्डी च यामलोद्भवा ।
श्मशानवासिनी देवी घोरचण्डी भयानका ॥ ३॥
शिवा घोरा रुद्रचण्डी महेशी गणभूषिता ।
जाह्नवी परमा कृष्णा महात्रिपुरसुन्दरी ॥ ४॥
श्रीविद्या परमाविद्या चण्डिका वैरिमर्दिनी ।
दुर्गा दुर्गशिवा घोरा चण्डहस्ता प्रचण्डिका ॥ ५॥
माहेशी बगला देवी भैरवी चण्डविक्रमा ।
प्रमथैर्भूषिता कृष्णा चामुण्डा मुण्डमर्दिनी ॥ ६॥
रणखण्डा चन्द्रघण्टा रणे रामवरप्रदा ।
मारणी भद्रकाली च शिवा घोरभयानका ॥ ७॥
विष्णुप्रिया महामाया नन्दगोपगृहोद्भवा ।
मङ्गला जननी चण्डी महाक्रुद्धा भयङ्करी ॥ ८॥
विमला भैरवी निद्रा जातिर्बुद्धिः स्मृतिः क्षमा (रूपा मनोहरा) ।
तृष्णा क्षुधा तथा छाया शक्तिर्मायामनोहरा ॥ ९॥
तस्यै देव्यै नमो या वै सर्वरूपेण संस्थिता ।
प्राणप्रिया जातिमाया निद्रारूपा महेश्वरी ॥ १०॥
या देवी सर्वभूतेषु सर्वरूपेण संस्थिता ।
नमस्तस्यै नमस्तस्यै नमस्तस्यै नमो नमः ॥ ११।
महाचण्डी शिवा घोरा भयानका वरप्रदा (महाभीमा भयानका) ।
काञ्चनी कमला विद्या महारोगविमर्दिनी ॥ १२॥
गुह्यचण्डी घोरचण्डी चण्डी त्रैलोक्यदुर्लभा ।
देवानां दुर्लभा चण्डी रुद्रयामलसम्मता ॥ १३॥
अप्रकाश्या महादेवी प्रिया रावणमर्दिनी ।
मत्स्यप्रिया मांसरता मत्स्यमांसबलिप्रिया ॥ १४॥
मधुमत्ता (मदमत्ता) महानृत्या (महानित्या) भूतप्रमथसङ्गता ।
महाभागा महारामा धान्यदा धनरत्नदा ॥ १५॥
वस्त्रदा मणिराज्यादिप्रजाविषयवर्धिका(सदाविषयवर्धिनी) ।
मुक्तिदा सर्वदा चण्डी महापत्तिविनाशिनी ॥ १६॥
रुद्रध्येया रुद्ररूपा रुद्राणी रुद्रवल्लभा ।
रुद्रशक्ती रुद्ररूपा रुद्रभूषा(रुद्रानन)समन्विता ॥ १७॥
शिवचण्डी महाचण्डी शिवप्रेतगणान्विता ।
भैरवी परमा विद्या महाविद्या च षोडशी ॥ १८॥
सुन्दरी परमा पूज्या महात्रिपुरसुन्दरी ।
गुह्यकाली भद्रकाली महाकालविमर्दिनी ॥ १९॥
कृष्णा कृष्ण(तृष्णा)स्वरूपा सा जनसम्मोह(जगन्मोहन)कारिणी ।
अतिमात्रा महालज्जा सर्वमङ्गलदायिका(दायिनी) ॥ २०॥
घोरतन्द्रा भीमरूपा भीमा देवी मनोहरा ।
मङ्गला बगला सिद्धिदायिनी सर्वदा शिवा ॥ २१॥
स्मृतिरूपा कीर्तिरूपा योगीन्द्रैरपि सेविता ।
विष्णुप्रिया शक्रपूज्या योगीन्द्रैरपि सेविता ॥ २२॥
भयानका महादेवी भयदुःखविनाशिनी ।
चण्डिका शक्तिहस्ता च कौमारी सर्वकामदा ॥ २३॥
वाराही च वराहास्या इन्द्राणी शक्रपूजिता ।
माहेश्वरी महेशास्या महेशगणभूषिता ॥ २४॥
चामुण्डा नारसिंही च नृसिंही शत्रुनाहिनी(नृसिंहरिपुमर्दिनी) ।
सर्वशत्रुप्रशमनी सर्वारोग्यप्रदायिनी ॥ २५॥
फलश्रुतिः -
इमां चण्डी जगद्धात्रीं ब्राह्मणस्तु सदा पठेत् ।
नान्यस्तु पाठको देवि(सम्पठेद्देवि) पठने ब्रह्महा भवेत् ॥ २६॥
नारदः पाठकश्चैव कैलासे रत्नभूषिते ।
वैकुण्ठे ब्रह्मलोके च देवराजपुरे शिवे ॥ २७॥
यः शृणोति धरायां च मुच्यते सर्वपातकैः ।
ब्रह्महत्या च गोहत्या स्त्रीवधोद्भवपातकम् ॥ २८॥
श्वश्रूगमनपापं च कन्यागमनपातकम् ।
तत्सर्वं पातकं दुर्गे मातुर्गमनपातकम् ॥ २९॥
सुतस्त्रीगमनं चैव यद्यत्पापं प्रजायते ।
परदारकृतं पापं तत् क्षणादेव नश्यति ॥ ३०॥
जन्मजन्मान्तरात्पापाद्गुरुहत्यादिपातकात् ।
मुच्यते मुच्यते देवि गुरुपत्नीषुसङ्गमात् ॥ ३१॥
मनसा वचसा पापं यत्पापं ब्रह्महिंसने ।
मिथ्याजन्यं च यत्पापं तत्पापं नश्यति क्षणात् ॥ ३२॥
श्रवणं पठनं चैव यः करोति धरातले ।
स धन्यश्च कृतार्थश्च राजा राजाधिपो भवेत् ॥ ३३॥
यः करिष्यत्ववज्ञाय च रुद्रयामलचण्डिकाम् ।
पापैरेतैः समायुक्तो रौरवं नरकं व्रजेत् ॥ ३४॥
अश्रद्धां ये (अश्रद्धया )च कुर्वन्ति ते च पातकिनो नराः ।
रौरवं नरकं कुण्डं कृमिकुण्डं मलस्य वै ॥ ३५॥
शुक्रस्य कुण्डं स्त्रीकुण्डं यान्ति ते ह्यचिरेण वै ।
ततः पितृगणैः सार्धं विष्ठायां जायते कृमिः ॥ ३६॥
शृणु देवि महामाये चण्डीपाठं करोत्यपि (करोति यः) ।
गयायां (गङ्गायां) चैव यत्पुण्यं काश्यां विश्वेश्वराग्रतः ॥ ३७॥
प्रयागे मुण्डने चैव हरिद्वारे हरेर्गृहे ।
तुल्यपुण्यं (तस्य पुण्यं) भवेद्देवि सत्यं दुर्गे रमे शिवे ॥ ३८॥
त्रिगयायां त्रिकाश्यां वै यच्च पुण्यं समुत्थितम् ।
तच्च पुण्यं तच्च पुण्यं तच्च पुण्यं न संशयः ॥ ३९॥
भवानी च भवानी च भवानीत्युच्यते बुधैः ।
भकारश्च भकारश्च(भकारस्तु भकारस्तु) भकारः केवलः शिवः ॥ ४०॥
वाणी चैव जगद्धात्री वरारोहे भकारकः ।
प्रेतवद्देवि विश्वेशि भकारः प्रेतवत्सदा ॥ ४१॥
आरोग्यं च जयं दुःखनाशनं (पुण्यं नातः) सुखवर्धनम्(सुखविवर्धनम्) ।
धनं पुत्रं जरारोग्यं कुष्ठं गलितनाशनम् ॥ ४२॥
अर्धाङ्गरोगान्मुच्येत दद्रुरोगाच्च पार्वति ।
सत्यं सत्यं जगद्धात्रि महामाये शिवे शिवे ॥ ४३॥
चण्डे चण्डि महाघोरे(महारावे) चण्डिके(चण्डिका) व्याधिनाशिनि ।
मन्दे दिने महेशानि विशेषफलदायिनी ॥ ४४॥
सर्वदुःखादिमुच्येत भक्त्या चण्डीं शृणोति यः ।
ब्राह्मणो हितकारी च पठेन्नियतमानसः ॥ ४५॥
मङ्गलं मङ्गलं ज्ञेयं मङ्गलं जयमङ्गलम् ।
भवेद्धि पुत्रपौत्रैश्च कन्यादासादिभिर्युतः ॥ ४६॥
तत्त्वज्ञान्ं च निधने(ज्ञानेन निधन)काले निर्वाणमाप्नुयात् ।
मणिदानोद्भवं पुण्यं तुलाहिरण्यके तथा ॥ ४७॥
चण्डीस्मरण(श्रवण)मात्रेण पठनाद्ब्राह्मणोऽपि सः(च) ।
निर्वाणमेति देवेशि महास्वस्त्ययन्ं हि तत्(महास्वस्त्ययने हितः) ॥ ४८॥
सर्वत्र विजयं याति श्रवणाद्ग्रहदोषतः ।
मुच्यते च जगद्धात्रि राजराजाधिपो भवेत् ॥ ४९॥
इमां हि चण्डीं पठते मनुष्यः
शृणोति भक्त्या परमां शिवस्य ।
चण्डीं धरण्यामतिपुण्ययुक्तां
भक्त्यावगच्छेद् वरमन्दिरं शुभं (स वै न गच्छेत्परमन्दिरं किल) ॥ ५०॥
यो यन्मनोरथं दुर्गे तनोति धरणीतले ।
रुद्रचण्डीप्रसादेन किं न सिद्ध्यति भूतले ॥ ५१॥
इति सत्यं महादेवि सत्यं सत्यं वदाम्यहम् ।
नैव दुःखभयं किञ्चित् पाठात् श्रवणादुअतः ॥ ५२॥
गृह्यमेकं प्रवक्ष्यामि नैव जानन्ति केचन ।
स्मृतिभ्रंशाद् वरारोहे त्वैवापि न जायते ॥ ५३॥
इति सत्यं महेशानि सत्यं सत्यं वदाम्यहम् ।
नैव दुःखं नैव शोकं नैव रोगभयं तथा ॥ ५४॥
आरोग्यं मङ्गलं नित्यं करोति शुभमङ्गलम् ।
महेशानि वरारोहे ब्रवीमि सत्यमुत्तमम् (सदिदं वचः) ॥ ५५॥
अभक्ताय न दातव्यं मम प्राणाधिकं शुभम् ।
मम(तव) भक्ताय शान्ताय शिवविष्णुप्रियाय च ॥ ५६॥
दद्यात्कदाचिद्देवेशि सत्यं सत्यं महेश्वरि ।
अनन्तफलमाप्नोति शिवचण्डीप्रसादतः ॥ ५७॥
अश्वमेधं वाजपेयं राजसूयशतानि च ।
तुष्टाश्च पितरो देवास्तथा च सर्वदेवताः ॥ ५८॥
दुर्गायं मृन्मयीज्ञानं रुद्रयामलपुस्तकम् ।
मन्त्रमक्षरसंज्ञानं करोत्यपि (करोति हि) नराधमः ॥ ५९॥
अत एव महामाये (महेशानि) किं वक्ष्ये तव सन्निधौ ।
लम्बोदराधिकश्चण्डी पठनाच्छ्रवणात्तु यः ॥ ६०॥
तत् त्वमसीति वाक्येन मुक्तिमाप्नोति दुर्लभाम् ।
तथास्याः पठनाद् देवि संसृतिः स्यात् सुदुर्लभा ॥ ६१॥
सत्यं सत्यं महेशानि ! पुनः सत्यं मयोदितम् ।
कपिलाशतदानस्य फलं यत् प्रतिवासरम् ॥ ६२॥
तत्फलम् लभते नित्यं रुद्रचण्डी प्रसादतः ।
अन्यथा नैव सम्भाव्यं सत्यं सत्यं वदामि ते ॥ ६३॥
॥ इति श्रीरुद्रयामले हरगौरीसंवादे श्रीरुद्रचण्डीस्तोत्रं सम्पूर्णम् ॥