सर्वमङ्गलमाङ्गल्यघटलक्ष्मीव्रतनिरूपणम्
(मार्गशीर्षे तथा वैशाखे कार्यम्)
मार्गशीर्षे च वैशाखे ऊर्जे वा शुक्लपक्षके ।
मण्डपोद्यानसंयुक्तामुद्यापनसमन्विताम् ॥ ७१॥
करिष्यन्ति नरा नार्यो यास्यन्ति ते परां गतिम् ।
पञ्चगव्येन क्षीरेण पुष्पगन्धोदकेन च ॥ ७२॥
मधुना स्नापयेत्त्वां सम्पूजयेत् फलपुष्पकैः ।
शृङ्गारयेद्वेषयेच्च विभूषयेन्नीराजयेत् ॥ ७३॥
भोजयेच्च ततः पुष्पाञ्जलिं दद्यात् सुमूर्तये ।
क्षमां याचेत च नमेत् प्रार्थयेद्गुरवेऽर्पयेत् ॥ ७४॥
``महालक्ष्म्यै नमः पादौ तव गुल्फौ नमः श्रियै ।
शोकहन्त्र्यै नमो जङ्घे रमायै जानुनी नमः ॥ ७५॥
ऊरू मङ्गलकारिण्यै वक्षःस्थल्यै नमः कटिम् ।
पद्मायै नम उदरमुरः कामश्रियै नमः ॥ ७६॥
करौ सौभाग्यलक्ष्म्यै ते बाहूदरमुखं श्रियै ।
कमलायै नमो नासां पद्मिन्यै लोचने नमः ॥ ७७॥
पुष्ट्यै ललाटमलकान् हिरण्यायै शिरो नमः ।
हरिण्यै सुखदालक्ष्म्यै ललितायै नमो नमः ॥ ७८॥
नारायण्यै वासुदेव्यै सम्पदायै नमोऽस्तु ते ।
सर्वमङ्गलमाङ्गल्यं देहि मे मातरीश्वरि ॥ ७९॥
सर्वमङ्गलमाङ्गल्यव्रतेन तव पद्मजे ।
ममेष्टं सर्वमेवाऽस्तु कृपया तव चाब्धिजे ॥ ८०॥
गीतमङ्गलनिर्घोषान् कारयेद्यजमानकः ।
सुवासिन्यः कन्यकाश्च कुर्युर्गीतानि तत्र च ॥ ८१॥
पूजयेयू रक्तवस्त्रै रक्तमाल्यानुलेपनैः ।
कुसुमैरक्षतैर्वार्भिर्नमस्कारैः प्रभोजनैः ॥ ८२॥
सिन्दूरकुङ्कुमतैलसारकस्तूरिकाऽञ्जनैः ।
एवं सम्पूज्य तां मूर्तिं दद्याच्छ्रीगुरवे शुभाम् ॥ ८३॥
गुरुं सम्पूजयेच्चापि कमलैश्चन्दनादिभिः ।
परिहारं ततः कुर्याद्भोजयेद्बालबालिकाः ॥ ८४॥
सर्वमङ्गलमाङ्गल्यलक्ष्मीव्रतमिदं परम् ।
यः कुर्यात्तस्य माङ्गल्यं बहुधा वै वसेद्गृहे ॥ ८५॥
सर्वपापविनाशश्च सौभाग्यारोग्यवर्धनम् ।
सर्वामोदप्रमोदेष्टानन्दसौख्यप्रदं व्रतम् ॥ ८६॥
इति श्रीलक्ष्मीनारायणीयसंहितायाः द्वापरयुगसन्तानात्मकस्य तृतीयखण्डे
१३७-अध्यायान्तर्गतं मार्गशीर्षे तथा वैशाखे कार्यं
सर्वमङ्गलमाङ्गल्य घटलक्ष्मीव्रतनिरूपणं सम्पूर्णम् ।
लक्ष्मीनारायणीयसंहिता । खण्ड ३। अध्याय १३७/७१-८६॥
lakShmInArAyaNIyasaMhitA . khaNDa 3. adhyAya 137/71-86..
Proofread by PSA Easwaran