वज्रयोगिन्याः स्तुतिप्रणिधानम्
ॐ नमः श्री वज्रयोगिन्यै, नमोबुद्धधर्मसङ्घेभ्यः,
नमो गुरुबुद्धबोधिसत्त्वेभ्यः, नमो लोचनादिदशवज्रविलासिनीभ्यः,
नमो यमान्तकादिदशक्रोधवीरेभ्यः सप्रज्ञेभ्यः ।
ॐ ओ आ हूं इति कायवाकचित इन्द्रियविज्ञानानि, वाकचित्तानि मनोविज्ञानानि,
परचित्तज्ञानाभिज्ञा, परकायप्रवेशाभिज्ञा पुण्डरीकेषु नाभिस्थे
रक्तसूर्य मण्डलः ॥ १॥
धर्मोदया पद्ममध्ये सिन्दूरारुणरूपिणी ।
त्रिशृङ्गा हि त्रिकोणा वा चतुःपीठसमन्विता ॥ २॥
ह्रीङ्कारं मध्यभागेऽस्याः पीतवर्णः प्रकीर्तितः ।
तद्भवा पीतवर्णा च अवधूत्या(ती) स्वयं स्थिता ॥ ३॥
ललनायां तु सुश्यामा रसनायां च गौरिका ।
प्रत्यालीढपदा नाम्ना मध्ये पीता मनोरमा ॥ ४॥
त्रिमार्गे संस्थिता देवी त्रिकायवज्रयोगिनी ।
सेयं नाम्ना भवेदेका सर्वसम्बुद्धडाकिनी ॥ ५॥
त्रैलोक्ये दिव्यरूपा च सर्वाशापरिपूरिका ।
स्वकर्तिना कर्तितं च वामहस्ते स्वमस्तकम् ॥ ६॥
दक्षिणेऽस्या स्थिता कर्तिर्जगतो दुःखच्छेदिनी ।
अस्या वामे स्थिता श्यामा नाम्ना सा वरवर्णिनी ॥ ७॥
कर्परः सव्यहस्ते च कर्तिर्वामे च संस्थिता ।
दक्षिणे चैव पीता वै वज्रवैरोचनी स्थिता ॥ ८॥
कर्तिका दक्षिणे हस्ते वामे कपालधारिणी ।
प्रत्यालीढपदा देवी नग्निका तु विशेषतः ॥ ९॥
करौ च द्वौ तयोः पादौ विपरीतौ तथा स्थितौ ।
बुद्धानां जननी मध्या सम्यक्सम्बुद्धरूपिणी ॥ १०॥
अक्षया सुभगा नित्यं हन्त्री च मृत्युजन्मनोः ।
धर्मसम्भोगनिर्माणमहासुखस्वरूपिणी ॥ ११॥
सेयं त्रिभुवने देवी राजये चन्द्रवत्सदा ।
कबन्धादवधूत्याश्च प्रविशेत्स्वमुखेष्वसृक् ॥ १२॥
ललनारसनाभ्यां च निःसृत्य शिरसि तथा ।
करूणारक्तरूपेण पिबन्ती सर्वशान्तये ॥ १३॥
दुःखं संप्रेक्ष्य लोकानां चतुर्मारनिषूदिनी ।
दौर्मनस्यादि कर्त्या च कर्तन्ती सर्वमेव तत् ॥ १४॥
स्तुता हि जिनमातस्त्वं सुप्रसीद भवार्णवे ।
स्वार्थं कर्तुं परार्थं च भवाम्यहं यथा क्षमः ॥ १५॥
तत्त्वया देवी कर्तव्यमनुग्रहं मयि सृज ।
बालोऽहमज्ञरूपी च कायवाकचित्तदोषतः ॥ १६॥
गुरुभक्तिं न जानेऽहं त्वद्भक्तिं च विशेषतः ।
इत्याकलय लोकेशि कृपा मयि विधीयताम् ॥ १७॥
कायवाकचेतसां साम्यं कुरु मे त्वं प्रसादतः ।
येन मुञ्चामि संसारं षड्गतिं न विशाम्यहम् ॥ १८॥
यथा च वज्रवद्देहो यावन्मुक्तो भवाम्यहम् ।
मारैः सर्वैः परित्यक्तो यथा कायो भवेन्मम ॥ १९॥
लीलया सिद्धिभागाः स्युर्निर्विघ्नः सर्वसिद्धिभाक् ।
सर्वसाधनसिद्धि स्यात् कायश्चैवाजरामरः ॥ २०॥
त्रासनं सर्वमाराणां सर्वाशापरिपूरणम् ।
देहि मे त्वं वरां सिद्धिं हित्वा चैव गमागमम् ॥ २१॥
मनो विलीयतां देवि पञ्चेन्द्रियानुसंयुतम् ।
सिद्ध्येच्च वज्रसत्त्वायुर्यौवनारोग्यसत्सुखम् ॥ २२॥
त्वत्प्रसादान्महामुद्रा सर्वेषामेव सम्भवेत् ।
देवासुरमनुष्याश्च यत्र यत्र च संस्थिताः ।
सुखिनस्ते च सर्वे स्युर्बुद्धत्वफललाभिनः ॥ २३॥
इति श्रीगुह्यसमयतन्त्रे त्रिकायवज्रयोगिन्याः स्तुतिप्रणिधानं सम्पूर्णम् ।
इति सिद्धाचार्यकृतं श्रीविरूपादानाम् सम्पूर्णम् ॥