श्री विन्ध्यवासिनि दशपदी
श्रीविन्ध्यवासिन्यै नमः ।
सौवर्णाम्बुजमध्यगां त्रिनयनां सौदामिनीसन्निभां
शखं चक्रवराभयानि दधतीमिन्दोः कलां बिभ्रतीम् ।
ग्रैवेयाङ्गदहारकुण्डलधरामाखण्डलाद्यैः स्तुतां
ध्यायेद् विन्ध्यनिवासिनीं शशिमुखीं पार्श्वस्थपञ्चाननाम्'' ॥
सिंहस्था मृगराजगा च विजया दुर्गा च पद्मावती
नागाधीश्वरविष्टरा च ललिता लक्ष्मीः सरोजस्थिता ।
मातङ्गी च सुरत्नपीठपदवी स्तुत्याश्च सर्वाः परं
सौवर्णाम्बुजमध्यगा विजयते तासां हि विन्ध्येश्वरी ॥ १॥
हस्तास्याङ्घ्रिदशा परं त्रिनयना देवी महाकालिका
दुर्गा सिद्धिकरी जया शशिधरा ध्याता त्रिनेत्रा सताम् ।
आराध्या भुवनेश्वरी शिवशिवा युक्ता त्रिभिर्लोचनैः
सौम्या बाहुचतुष्टया त्रिनयना विन्ध्येश्वरी शङ्करी ॥ २॥
नीलाश्मद्युतिकालिकां भगवती कालाभ्रुतुल्या जया
विद्युद्दामसमा दिवाकरनिभा दुर्गा च पद्मावती ।
ध्यातव्या च सरस्वती मतिमतां शीतांशुतुल्यप्रभा
दृश्या विन्ध्यनिवासिनी कलियुगे सौदामिनीसन्निभा ॥ ३॥
खड्गादिं दघती करैः सुविदिता श्यामाऽसतां भीषणा
मालाकुम्भकपालनीरजकरा पद्मावती संस्तुता ।
बालानां भुवनेश्वरी नहि तथा सौम्या सपाशाङ्कुशा
शखं चक्रवराभयानि दधती विन्ध्येश्वरी वैष्णवी ॥ ४॥
देवी बद्धहिमांशुरत्नमुकुटा मूर्धेन्दुरेखा जया
मातङ्गी शशिखण्डधा शशिधरा दुर्गा च कामेश्वरी ।
ध्यातव्या भुवनेश्वरीन्दुमुकुटा चन्द्रार्धपद्मावती
विन्ध्ये काऽपि निरीक्ष्यते सहृदयैरिन्दोः कलां बिभ्रती ॥ ५॥
काली सर्वविभूषणावृतवपुः कह्लारमालाश्रिया
मातङ्गी करुणातरङ्गितदृशा स्तुत्या भवानी सती ।
भास्वद्देहलता सुरत्ननिवहैः पद्मावती, विन्ध्यगा
ग्रैवेयाङ्गदहारकुण्डलधरा भूषामृदुर्माधवी ॥ ६॥
आदौ संस्तुतवांस्तथा कमलजो बोधाय कालीं हरेः
सिद्ध्यर्थं सुजनैर्जया सुरवृता कन्याभिरासेविता ।
ध्यातव्या ह्यणिमादिभिश्च किरणैः काम्यैर्भवानी वृता
विन्ध्यस्था शरणं स्वतो भुवि परञ्चाखण्डलाद्यैः स्तुता ॥ ७॥
भक्तानां वितनोति सौख्यनिकरं लक्ष्मीः प्रसन्नानना
मातुः पालनशिक्षणं वितनुते वक्त्रारविन्दश्रिया ।
संसारे भुवनेश्वरी स्मितमुखी स्तोतुश्च दाने सदा
विन्ध्याद्रौ पृथुलोचना शशिमुखी तापौषधिर्दर्शनात् ॥ ८॥
सिंहस्कन्धगता जया मृगपतिस्कन्धे च दुर्गा स्थिता
सर्वज्ञेश्वरभैरवाङ्कनिलया पद्मावती सुप्रिया ।
सिंहः पार्श्वगतः शिवोऽथ दयितः पञ्चाननो द्वावपि
प्रीतिं विन्ध्यगतोभयीं वितनुते पार्श्वस्थपञ्चानना ॥ ९॥
आख्याने प्रथमे स्तुता सुविधिना काली द्वितीये ततो
लक्ष्मीश्चापि सरस्वती च महती सर्वा तृतीयेऽन्ततः ।
मातङ्गी भुवनेश्वरी च विजया दुर्गा भवानी शिवा
तासां विन्ध्यनिवासिनी सकरूणा गङ्गासखीलोचना ॥ १०।
विन्ध्याचलनिवासिन्याः स्थानं सर्वोत्तमोत्तमम् ।
सासम्मुखगतानां हि प्रीणाति विन्ध्यवासिनी ॥ ११॥
श्रीविन्ध्यवासिनी माता गीता दशपदीस्तुतिः ।
वितनोतु सतां मोदं सर्वमङ्गलसंयुतम् ॥ १२॥
इति श्री विन्ध्यवासिनि दशपदी सम्पूर्णा ।
॥ इति शम् ॥
Proofread by Kavitha Aanand