व्यासकृतं कावेरीस्तोत्रम्
श्रीगणेशाय नमः ।
मातस्सह्यसमुद्भवे भवभयप्रध्वंसिनि त्वत्तटे-
नित्यं संवसतां सतां करगता कैवल्यलक्ष्मीरिति ।
वादः कैमुतिकस्तवैष सकृदप्यावातिवीचीमरु-
न्नीचैर्यत्र भवन्ति तत्र वसतां सर्वे पुमथार्यतः ॥ १॥
भुग्नः पापभरेणमज्जतिजडो यः कश्चन त्वज्जले
संसाराम्बुनिधेर्नकेवलमसावुन्मज्जतिद्राग्स्त्वयम् ।
किन्तु स्वानवरान् परांश्चपुरुषानुत्तारयन्सह्यजे-
धन्यः किं बहना पुनाति सकलान् दृग्गोचरानप्यहो ॥ २॥
स्वल्पावग्रहशुष्कसस्य निचया ग्रीष्मोष्मसंशोषिता
शेषारामसरस्तटाकनिकराः के वा नदी मातृकाः ।
क्लिश्यन्ते बत ! नेतरे जनपदाश्चोलस्तु सन्तर्पितो
नित्यं सहयसुते त्वयाशतभवग्राहांस्तृणं मन्यते ॥ ३॥
मासं तापि कदापि चोलविषयः श्रीरङ्गनाथस्फुर-
??तल्पानल्पमुखानिलेन गरलज्ज्वालावली सोष्मणा ।
इत्थं देवि दयावतीव भवती ग्रीष्मेऽपि संवर्धते-
पूरैर्ढूरमितस्ततो विसृमरैराप्यायन्ती भुवम् ॥ ४॥
सप्रागात्मभुवः कमण्डलरथ त्रैविक्रमं तत्पदं-
ताह्ग्व्योमतटः सधूर्जटिजटाजूटः सगौरीगुरुः ।
स श्रीब्रह्मगिरिः ससह्यशिखरे धात्रीमयः श्रीहरिः
स्थानानीतिजयन्ति दक्षिणसुरस्रोतस्विनि त्वज्जने ॥ ५॥
सह्ये लोके दिवोन्ते तुहिनशिखरिणीत्यादिमध्यावसाने
ष्वासीत्स्वर्गापगा सा विधिहरिहरसंसर्गमासाद्यधन्या ।
पादे सह्यस्य धाता तदनुहरिहरावादरावासमुद्रा-
दम्ब!त्वामाश्रयन्तौ प्रतिपदमखिलानुग्रहं तन्वते ते ॥ ६॥
सह्यक्षोणीधरवरसुते सर्वतीर्थावतारं-
पारावारं सकिल भगवानेकदेशेऽधिशेते ।
आविष्कुर्वस्त्वयि तु परमं प्रेमशेषे शयानो-
रङ्गेशानो भगवति बहुत्रान्तरङ्गे तवास्ते ॥ ७॥
भवस्य त्वं देवि त्रिदशसरितोऽपि प्रियतरा-
विलोभ्येनां व्याजात्क्वचिदपिजडाजूटकुहरे ।
यतश्चोलोद्वे(लेदे)शे प्रतिपदमुपश्लिष्य सततं
गिरीशः प्रेम्णानुव्रजति भवतीमेव सरसाम् ॥ ८॥
वसाम त्वत्तीरे जननि विधिवत्सन्ततमुप-
स्पृशाम त्वन्नीरे चिरमनुसराम श्रुतिपथम् ।
भजाम श्री साम्बं सकलकरणैः सह्यतनये-
सदानन्दाद्वैतामृतसरसि मज्जाम च वयम् ॥ ९॥
तीर्थान्तरे सह्यसुते वसन्तः-
कथञ्चिदेनः क्षपयन्तु सन्तः ।
वृषासना वा गरुडासना वा-
वयं भवेम त्वयि संवसन्तः ॥ १०॥
बुधो दुण्डिर्नाम्ना जगति विदितो लक्ष्मणसुधी-
मणेः श्रीमद्व्यासान्वयजलधिचन्द्रादजनि यः ।
प्रणीतं तेनेदं पठतु सुजनः सह्यदुहितु-
र्महानद्याः स्तोत्रं शुभदमखिलाघौघशमनम् ॥ ११॥
इति श्री ढुण्डिराजव्यासविरचितं कावेरीस्तोत्रं सम्पूर्णम् ।
श्रीरस्तु पठता ।
Proofread by Prabha Maruvada