श्रीयोनिस्तवराजः
अथ योनि-ध्यानम् ।
अतिसुललितगात्रां हास्यवक्त्रां त्रिनेत्रां
जितजलदसुकान्तिं पट्टवस्त्रप्रकाशाम् ।
अभयवरकराढ्यां रत्नभूषातिभव्यां
सुरतरुतलपीठ रत्नसिंहासनस्थाम् ॥ १॥
हरिहरविधिवन्द्यां बुद्धिशुद्धिस्वरूपां
मदनरससमाक्तां कामिनीं कामदात्रीम् ।
निखिलजनविलासोद्दामरूपां भवानीं
कलिकलुषनिहन्त्रीं योनिरूपां भजामि ॥ २॥
श्रीदेव्युवाच -
भगवान् सर्वधर्मज्ञ कुलशास्त्रार्थपारग ।
सर्वं मे कथितं नाथ न त्वेकं परमेश्वर ॥ १॥
श्रीयोनेः स्तवराजं हि तथा कवचमुत्तमम् ।
श्रोतुमिच्छामि सर्वज्ञ यदि तेऽस्ति कृपा मयि ॥ २॥
सारभूतं महादेव निगमान्तर्गतं हर ।
यदि न कथ्यते देव प्राणत्यागं करोम्यहम् ॥ ३॥
दिवानिशि महाभाग ममाश्रुः पतितं भवेत् ।
अतस्तद् देवदेवेश कथ्यतां मे दयानिधे ॥ ४॥
श्रीमहादेव उवाच ।
शृणु पार्वति वक्ष्यामि देहत्यागं कथं कुरु ।
अत्यन्तगोपनीयं हि निगमे कथितं पुरा ॥ ५॥
ब्रह्माविष्णुग्रहादीनां न मया कथितं पुरा ।
अकथ्यं परमेशानि इदानीं कि करोमि ते ॥ ६॥
तव स्नेहेन बद्धोऽहं कथयामि तव प्रिये ।
मातर्देवि महाभागे यदि कस्मै प्रकाश्यते ।
शपथं कुरु मे दुर्गे यदि त्वं मत्प्रिया स्मृता ॥ ७॥
ब्रह्मा यदि चतुर्वक्त्रैः पञ्चवक्त्रैः सदाशिवः ।
वर्णितुं स्तवराजञ्च न शक्नोति कदाचन ।
सम्यग् वक्तुं न शक्नोमि संक्षेपात् कथयामि ते ॥ ८॥
श्री महादेव उवाच ।
अस्य श्री योनिस्तवराजस्य कुलाचार्य-ऋषिः कौलिकछन्दः ।
श्रीयोनिरूपा दशविद्यात्मिका देवता सर्वसाधने विनियोगः ॥
ॐ योनिरूपे महामाये सर्वसम्पत्प्रदे शुभे ।
कृपया सर्वसिद्धिं मे देहि देवि जगन्मयि ॥ १॥
सर्वस्वरूपे सर्वेशे सर्वशक्ति समन्विते ।
कृपया सर्वसिद्धिं मे देहि देवि जगन्मयि ॥ २॥
महाघोरे महाकालि कुलाचारप्रिये सदा ।
कृपया सर्वसिद्धिं मे देहि देवि जगन्मयि ॥ ३॥
घोरदंष्ट्रे चोग्रतारे सर्वशत्रुविनाशिनि ॥
कृपया सर्वसिद्धिं मे देहि देवि जगन्मयि ॥ ४॥
योनिरूपा महाविद्ये सर्वदा मोक्षदायिनी ।
कृपया सर्वसिद्धिं मे देहि देवि जगन्मयि ॥ ५॥
जगद्धात्रि महाविद्ये जगदुद्धारकारिणि ।
कृपया सर्वसिद्धिं मे देहि देवि जगन्मयि ॥ ६॥
जगद्धात्रि महामाये योनिरूपे सनातनि ।
कृपया सर्वसिद्धिं मे देहि देवि जगन्मयि ॥ ७॥
जय देवि जगन्मातः सृष्टिस्थित्यन्तकारिणी ।
कृपया सर्वसिद्धिं मे देहि देवि जगन्मयि ॥ ८॥
सिद्धिदात्रि महामाये सर्वसिद्धि-प्रदायिनि ।
कृपया सर्वसिद्धिं में देहि देवि जगन्मयि ॥ ९॥
महालक्ष्मि महादेवि महा-मोक्ष-प्रदायिनि ।
कृपया सर्वसिद्धिं मे देहि देवि जगन्मयि ॥ १०॥
गौरी लक्ष्मीश्च मातङ्गी दुर्गा च नव-चण्डिका ।
बगलामुखी भुवनेशी भैरवी च तथा प्रिये ।
छिन्नमस्ता च काली च योनि-रुपा सनातनी ।
कृपया सर्वसिद्धिं मे देहि देवि जगन्मयि ॥ ११॥
काली कपालिनी कुल्ला कुरु-कुल्ला विरोधिनी ।
नायिका विप्रचित्ताद्या अन्या या नायिका स्मृताः ।
वसन्ति योनिमाश्रित्य ताभ्योऽपीह नमो नमः ॥ १२॥
अणिमाद्यष्टसिद्धिश्च वसत्यस्याः समीपतः ।
नमस्तेऽस्तु नमस्तेऽस्तु योग-मोक्ष-प्रदायिनि ॥ १३॥
सर्वशक्तिमये देवि सर्वकल्मषनाशिनि ।
हे योने! हर विघ्नं मे सर्वसिद्धिं प्रयच्छ मे ॥ १४॥
आधारभूते सर्वेषा पूजकानां प्रियंवदे ।
स्वर्गपाताल वासिन्ये योनये च नमो नमः ॥ १५॥
विष्णुसिद्धिप्रदे देवि शिवसिद्धिप्रदायिनी ।
ब्रह्मसिद्धिप्रदे देवि रामचन्द्रस्य सिद्धिये ।
शक्रादीनाञ्च सर्वेषां सिद्धिदायै नमो नमः ॥ १६॥
फलश्रुतिः ।
इति ते कथितं देवि सर्वसिद्धिप्रदायकम् ।
स्तोत्र योनेर्महेशानि प्रकाशयामि ते प्रिये ॥ १॥
सर्वसिद्धिप्रदं स्तोत्रं यः पठेत् कौलिकः प्रिये ।
लिखित्वा पुस्तके देवि रक्तद्रव्यैश्च सुन्दरि ॥ २॥
तस्या-साध्यानि कर्माणि वश्यादीनि कुलेश्वरि ।
नास्ति नास्ति पुनर्नास्ति नास्त्येव भुवनत्रये ।
यः पठेत् प्रातरुत्थाय गाणपत्यं लभेन्नरः ॥ ३॥
रात्रौ कान्तासमायोगे यः पठेत् साधकोत्तमः ।
स्तवेनानेन संस्तुत्य साधकः किं न साधयेत् ॥ ४॥
सालङ्कृतां स्वकान्ताञ्च लीलाहावविभूषिताम् ।
रक्तवस्त्रपरीधानां कृत्वा सम्पूज्य साधकः ।
भोजयित्वा ततो देवि स्वयं भुञ्जीत तत्परः ॥ ५॥
मत्स्यमांसादिकान् भुक्त्वा क्रोडे कृत्वा स्वयोषितम् ।
रात्रौ यदि जपेन्मन्त्रं सा दुर्गा स सदाशिवः ।
भवत्येव न सन्देहो मम वक्त्राद्विनिर्गतम् ॥ ६॥
येन दत्तं मयि स्तोत्रं स एव मद्गुरुः स्मृतेः ।
तस्यैव यदि भक्तिः स्यात् स भवेज्जगदीश्वरः ॥ ७॥
नमोस्तु स्तवराजाय नमः स्तवप्रकाशिने ।
यत्रास्ते स्तवराजोऽयं तत्रास्ते श्रीसदाशिवः ॥ ८॥
इति शक्तिकागमसर्वस्वे हरपार्वतीसंवादे श्रीयोनिस्तवराजः समाप्तः ।
Source- Shakti Agama
Encoded and proofread by Durga Sharma