वृन्दाकृता श्रीगणेशस्तुतिः
॥ श्रीगणेशाय नमः ॥
वृन्दोवाच ।
नमस्ते विघ्नराजाय भक्तविघ्नहराय च ।
अभक्तेभ्यो विशेषेण विघ्नदाय नमो नमः ॥ ५॥
परेशाय पराणां ते परात्परतराय च ।
भक्तेशाय सदा भक्तिप्रियाय ते नमो नमः ॥ ६॥
ब्रह्मेशाय गणाधीश ब्रह्मणां ब्रह्मरूपिणे ।
ब्रह्मणां पतये तुभ्यं गणाधिपतये नमः ॥ ७॥
अमेयायाप्रतर्क्याय सदा स्वानन्दवासिने ।
शिवविष्णुमुखेभ्यश्च पददात्रे नमो नमः ॥ ८॥
अनाथाय च सर्वेषां नाथाय परमात्मने ।
वक्रतुण्डाय सर्वेषामादिपूज्याय ते नमः ॥ ९॥
विनायकाय वीराय शूर्पकर्णाय ढुण्ढये ।
गजाननाय चिन्तामणये हेरम्ब ते नमः ॥ १०॥
अनन्तगुणधाराय नानाखेलकराय ते ।
परेषां तु परेशाय मूषकध्वजिने नमः ॥ ११॥
पूर्णानन्दाय सर्वेषां मात्रे पित्रे नमो नमः ।
ज्येष्ठेभ्यो ज्येष्ठराजाय ज्येष्ठपदप्रदायिने ॥ १२॥
किं स्तौमि त्वां गणाधीश योगाकारं परात्परम् ।
अतस्त्वां प्रणमाम्येवं तेन तुष्टो भव प्रभो ॥ १३॥
गाणेशं देहि मे योगं गाणपत्यां च मां कुरु ।
क्षमस्व मेऽपराधं त्वं त्वदुल्लङ्घनभावजम् ॥ १४॥
अन्यत्त्वं मां गणाधीश मान्यां कुरु त्वदीयके ।
पूजने किञ्चिदल्पेन भावेन वरदायक ॥ १५॥
क्वाऽहं ते समतां नाथ सम्प्राप्नोमि कदापि न ।
तथा तपोमदेनैतत् कृतं क्षन्तुं त्वमर्हसि ॥ १६॥
एवं स्तुत्वा गणाधीशं प्रणनाम प्रजापते ।
वृन्दा तां प्रत्युवाचेदं वाक्यं वाक्यविशारदः ॥ १७॥
(फलश्रुतिः)
श्रीगणेश उवाच ।
मदीयं योगमाद्यं त्वं प्राप्स्यसे नात्र संशयः ।
गाणपत्या महाभागे भविष्यसि सदा सुते ॥ १८॥
भाद्रशुक्लचतुर्थ्यां ये महोत्सवपरायणाः ।
पूजयिष्यन्ति मां भक्त्या तत्र त्वां धारयाम्यहम् ॥ १९॥
एकविंशतिपत्राणि ह्यर्पयिष्यन्ति मानवाः ।
तत्र ते पत्रमेकं मे मान्यं देवि भविष्यति ॥ २०॥
उल्लङ्घनसमं पापं न भूतं न भविष्यति ।
स्वल्पोल्लङ्घनमात्रेण त्वं त्यक्ता च मया सदा ॥ २१॥
ये मामुल्लङ्घयिष्यन्ति तांस्त्यजामि निरन्तरम् ।
तत्रापि तपसा बद्धो वृन्दे त्वां मानयाम्यहम् ॥ २२॥
त्वया कृतमिदं स्तोत्रं भुक्तिमुक्तिप्रदं भवेत् ।
ब्रह्मभूयप्रदं पूर्णं पठते शृण्वते सदा ॥ २३॥
तुलसीं ये नरा मह्यमर्पयन्ति कदा सुते ।
तत्पापहरणं स्तोत्रं भविष्यति कृतं त्वया ॥ २४॥
उल्लङ्घनाघहं नित्यं भविष्यति विशेषतः ।
अनेन स्तुवतां नित्यं न सर्वं दुर्लभं भवेत् ॥ २५॥
इति वृन्दाकृता श्रीगणेशस्तुतिः सम्पूर्णा ॥
- ॥ मुद्गलपुराणं पञ्चमः खण्डः । अध्यायः ३२ । ५.३२। ५-२५॥
- .. mudgalapurANaM pa~nchamaH khaNDaH . adhyAyaH 32 . 5.32. 5-25..
Proofread by Yash Khasbage, Preeti Bhandare