उच्छिष्टगणेशस्तवराजः अथवा विनायकलीलास्तुतिः
श्री गणेशाय नमः ।
नमामि देवं सकलार्थदं तं सुवर्णवर्णं भुजगोपवीतम् ।
गजाननं भास्करमेकदन्तं लम्बोदरं वारिभवासनं च ॥ १॥
केयुरिणं हारकिरीटजुष्टं चतुर्भुजं पाशवराभयानि ।
सृणिं च हस्तं गणपं त्रिनेत्रं सचामरस्त्रीयुगलेन युक्तम् ॥ २॥
षडक्षरात्मानमनल्पभूषं मुनीश्वरैर्भार्गवपूर्वकैश्च ।
संसेवितं देवमनाथकल्पं रूपं मनोज्ञं शरणं प्रपद्ये ॥ ३॥
वेदान्तवेद्यं जगतामधीशं देवादिवन्द्यं सुकृतैकगम्यम् ।
स्तम्बेरमास्यं ननु चन्द्रचूडं(नवचन्द्रचूडं) विनायकं तं शरणं प्रपद्ये ॥ ४॥
भवाख्यदावानलदह्यमानं भक्तं स्वकीयं परिषिञ्चते यः ।
गण्डस्रुताम्भोभिरनन्यतुल्यं वन्दे गणेशं च तमोऽरिनेत्रम्(तमालनीलम्) ॥ ५॥
शिवस्य मौलाववलोक्य चन्द्रं सुशुण्डया मुग्धतया स्वकीयम् ।
भग्नं विषाणं परिभाव्य चित्ते आकृष्टचन्द्रो गणपोऽवतान्नः ॥ ६॥
पितुर्जटाजूटतटे विलोक्य(सदैव) भागीरथीं तत्र कुतूहलेन ।
विहर्तुकामः स महीध्रपुत्र्या निवारितः पातु सदा गजास्यः ॥ ७॥
लम्बोदरो देवकुमारसङ्घैः(देवकुमारसिद्ध्यैः) क्रीडन्कुमारं जितवान्निजेन ।
करेण चोत्तोल्य ननर्त रम्यं दन्तावलास्यो भयतः स पायात् ॥ ८॥
आगत्य योच्चैर्हरिनाभिपद्मं ददर्श तत्राशु करेण तच्च ।
उद्धर्तुमिच्छन्विधिवादवाक्यं मुमोच भूत्वा चतुरो गणेशः ॥ ९॥
(उद्धर्तुमिच्छन्विधिचाटुवाक्यं श्रुत्वा मुमोचावतु नो गणेशः)
निरन्तरं संस्कृतदानपट्टे लग्नां तु गुञ्जद्भ्रमरावलीं(रावलिं) वै ।
तां श्रोत्रतालैरपसारयन्तं स्मरेद्गजास्यं(भजे गजास्यं) निजहृत्सरोजे ॥ १०॥
विश्वेशमौलिस्थितजह्नुकन्याजलं गृहीत्वा निजपुष्करेण ।
हरं सलीलं पितरं स्वकीयं प्रपूजयन्हस्तिमुखः स पायात् ॥ ११॥
स्तम्बेरमास्यं घुसृणाङ्गरागं सिन्दूरपूरारुणकान्तकुम्भम् ।
कुचन्दनाश्लिष्टकरं गणेशं ध्यायेत्स्वचित्ते सकलेष्टदं तम् ॥ १२॥
(कुचन्दनालिप्तकरं गणेशं ध्यायामि चित्ते सकलेष्टदं तम् ॥)
स भीष्ममातुर्निजपुष्करेण जलं समादाय कुचौ स्वमातुः ।
प्रक्षालयामास षडास्यपीतौ स्वार्थं मुदेऽसौ कलभाननोऽस्तु ॥ १३॥
सिञ्चाम नागं(तं वामनाङ्गं) शिशुभावमाप्तं केनापि सत्कारणतो धरित्र्याम् ।
वक्तारमाद्यं नियमादिकानां(निगमादिकानां) लोकैकवन्द्यं प्रणमामि विघ्नम् ॥ १४॥
(विघ्नं विघ्ननाशनमित्यर्थः)
आलिङ्गितं चारुरुचा मृगाक्ष्या सम्भोगलोलं मदविह्वलाङ्गम् ।
विघ्नौघविध्वंसनसक्तमेकं नमामि कान्तं द्विरदाननं(कान्तद्विरदाननम्) तम् ॥ १५॥
हेरम्ब उद्यद्रविकोटिकान्तः पञ्चाननेनापि विचुम्बितास्यः(पञ्चाननेनाप्यवलम्बितांसः) ।
मुनीन्सुरान्भक्तजनांश्च सर्वान्स पातु रथ्यासु सदा गजास्यः ॥ १६॥
द्वैपायनोक्तानि स निश्चयेन(द्वैपायनोक्तं सुविचार्य येन) स्वदन्तकोट्या निखिलं लिखित्वा ।
दन्तं(दत्तं) पुराणं शुभमिन्दुमौलिस्तपोभिरुग्रं(सुतमिन्दुमौलेस्तमग्र्यरूपं) मनसा स्मरामि ॥ १७॥
क्रीडातटान्ते(क्रीडाप्रवृत्ते) जलधाविभास्ये वेलाजले लम्बपतिः प्रभीतः(वेलाजलेऽथाम्बुपतिः) ।
विचिन्त्य कस्येति सुरास्तदा तं विश्वेश्वरं वाग्भिरभिष्टुवन्ति ॥ १८॥
वाचां निमित्तं स निमित्तमाद्यां(ह्यनिमित्तमाद्यं) पदं त्रिलोक्यामददत्स्तुतीनाम्(त्रिलोक्यां निखिलस्तुतीनाम्) ।
सर्वैश्च वन्द्यं न च तस्य वन्द्यः स्थाणोः परं रूपमसौ स पायात् ॥ १९॥
इमां स्तुतिं यः पठतीह भक्त्या समाहितप्रीतिरतीव शुद्धः ।
संसेव्यते चेन्दिरया नितान्तं दारिद्र्यसङ्घं स विदारयेन्नः ॥ २०॥
॥ इति श्रीरुद्रयामलतन्त्रे हरगौरीसंवादे उच्छिष्टगणेशस्तवराजः अथवा
उच्छिष्टगणेशस्तोत्रं समाप्तम् ॥
विनायकलीलास्तुतिः
Notes:
The UcchiṣṭaGaṇeśaStavarājaḥ athavā UcchiṣṭaGaṇeśaStotram उच्छिष्टगणेशस्तवराजः अथवा उच्छिष्टगणेशस्तोत्रम् is found in MantraMahārṇavaḥ मन्त्रमहार्णवः; and, is also known as VināyakalīlāStutiḥ विनायकलीलास्तुतिः elsewhere.
UcchiṣṭaGaṇeśaStavarājaḥ उच्छिष्टगणेशस्तवराजः is also found as the 5th part of the UcchiṣṭaGaṇapatiPañcāṅgam उच्छिष्टगणपतिपञ्चाङ्गम् or the UcchiṣṭaGaṇapatiPañcaratnam उच्छिष्टगणपति पञ्चरत्नम्; that can be accessed from the corresponding links given below.
Encoded and proofread by Ravin Bhalekar ravibhalekar@hotmail.com, NA, Ruma Dewan