श्रीविद्यागणेशाष्टोत्तरशतनामस्तोत्रम्
श्रीमद्विद्यागणेशस्य नाम्नामष्टोत्तरं शतम् ।
वक्ष्यामि शृणु देवेशि सावधानेन चेतसा ॥ १॥
सर्वपापप्रशमनं सर्वविघ्ननिवारकम् ।
सर्वरोगहरं दिव्यं साधकाभीष्टदायकम् ॥ २॥
ब्रह्मादयः सुराः सर्वे वसिष्ठाद्या मुनीश्वराः ।
विद्यागणाधिनाथस्य चक्राराधनतत्पराः ॥ ३॥
स्तोत्रेणानेन सम्पूज्य जप्त्वा रवेः पदे स्थिताः ।
सुखिनोऽद्यापि दृश्यन्ते सद्यः सन्तुष्टमानसाः ॥ ४॥
तादृशं परमं दिव्यं प्रत्यक्षफलदायकम् ।
यः पठेत् प्रातरुत्थाय चिन्तयेन्मूनि बालकम् ॥ ५॥
स सर्वदुरितान्मु(क्त्वा)क्तो सर्वान् कामानवाप्नुयात् ।
चक्रपूजाविधानेन प्रयाणे समुपस्थिते ॥ ६॥
शोभनेषु समस्तेषु कार्येध्वन्येषु बुद्धिमान् ।
स्तोत्रेणानेन सम्पूज्य जप्त्वाभीष्टमवाप्नुयात् ॥ ७॥
धान्यकामी लभेद्धान्यं धनकामी धनं लभेत् ।
सन्तानकामी सन्तानं क्षेत्रार्थी क्षेत्रमुत्तमम् ॥ ८॥
सर्वं लभेत् सर्वकामी निष्कामी तत्फलं लभेत् ।
(अथ स्तोत्रम् ।)
ॐ विद्यागणपतिर्विघ्नहरो गजमुखोऽव्ययः ॥ ९॥
विज्ञानात्मा वियत्कायो विश्वाकारो विनायकः ।
विश्वसृग्विश्वभुग्विश्वसंहर्ता विश्वगोपनः ॥ १०॥
विश्वानुग्राहकः सत्यः शिवतुल्यः शिवात्मजः ।
विचित्रनर्तनो वीरो विश्वसन्तोषवर्धनः ॥ ११॥
विमर्शी विमलाचारो विश्वाकारो विनायकः ।
स्वतन्त्रः सुलभः स्वर्चः सुमुखः सुखबोधकः ॥ १२॥
सूर्याग्निशशिदृक् सोमकलाचूडः सुखासनः ।
स्वप्रकाशः सुधावक्त्रः स्वयं व्यक्तः स्मृतिप्रियः ॥ १३॥
शक्तीशः शङ्करः शम्भुः प्रभुर्विभुरुमासुतः ।
शान्तः शतमखाराध्यश्चतुरश्चक्रनायकः ॥ १४॥
कालजित् करुणामूर्तिरव्यक्तः शाश्वतः शुभः ।
उग्रकर्मोदितानन्दी शिवभक्तः शिवान्तरः ॥ १५॥
चैतन्यधृतिरव्यग्रः सर्वज्ञः सर्वशत्रुभृत् ।
सर्वाग्रः समरानन्दी संसिद्धगणनायकः ॥ १६॥
साम्बप्रमोदको वज्री मानसो मोदकप्रियः ।
एकदन्तो बृहत्कुक्षिः दीर्घतुण्डो विकर्णकः ॥ १७॥
ब्रह्माण्डकन्दुकश्चित्रवर्णश्चित्ररथासनः ।
तेजस्वी तीक्ष्णधिषणः शक्तिवृन्दनिषेवितः ॥ १८॥
परापराश्च पश्यन्ती प्राणनाथः प्रमत्तहृत् ।
सङ् क्लिष्टमध्यमःस्पष्टो वैखरीजनकः शुचिः ॥ १९॥
धर्मप्रवर्तकः कामो भूमिस्फुरितविग्रहः ।
तपस्वी तरुणोल्लासी योगिनीभोगतत्परः ॥ २०॥
जितेन्द्रियो जयश्रीको जन्ममृत्युविदारणः ।
जगद्गुरुरमेयात्मा जङ्गमस्थावरात्मकः ॥ २१॥
नमस्कारप्रियो नानामतभेदविभेदकः ।
नयवित् समदृक् शूरः सर्वलोकैकशासनः ॥ २२॥
विशुद्धविक्रमो वृद्धः संवृद्धः ससुहृद्गणः ।
सर्वसाक्षी सदानन्दी सर्वलोकप्रियङ्करः ॥ २३॥
सर्वातीतः समरसः सत्यावासः सतां गतिः ।
इति विद्यागणेशस्य नाम्नामष्टोत्तरं शतम् ॥ २४॥
यः पठेच्छृणुयाद्वापि नित्यं भक्तिसमन्वितः ।
तस्य साधकवर्यस्य सर्वावस्थासु सर्वदा ।
नासाध्यमस्ति किमपि विद्याविघ्नेश्वरात्मनः ॥ २५॥
॥ इति महाशैवतन्त्रे अतिरहस्ये आकाशभैरवकल्पे शङ्करविरचिते
श्रीविद्यागणेशाष्टोत्तरशतनामस्तोत्रं सम्पूर्णम् ॥
Proofread by Sreenivasa Rao Bhagavatula