दितिकृता श्रीविघ्नेशस्तुतिः
॥ श्रीगणेशाय नमः ॥
दितिरुवाच ।
नमस्ते विघ्नराजाय भक्तविघ्नविदारण ।
अभक्तेभ्यो महाविघ्नप्रदाय तु नमो नमः ॥ १२॥
काश्यपाय परेशाय विनायकाय ढुण्ढये ।
लम्बोदराय ते सर्वभोगभोक्त्रे नमो नमः ॥ १३॥
दीनानां पतये तुभ्यं दीनदीनाय ते नमः ।
दीनपालकनाथाय हेरम्बाय नमो नमः ॥ १४॥
परेशाय गणेशाय परात्परतमाय ते ।
परात्पराणां कर्त्रे ते महोदराय वै नमः ॥ १५॥
अनादये च सर्वेषामादिमूर्तिधराय च ।
आदिपूज्याय सर्वेषामन्तःस्थाय नमो नमः ॥ १६॥
शिवपुत्राय विष्णोश्च पुत्राय परमात्मने ।
वरेण्यसूनवे तुभ्यं शेषपुत्राय ते नमः ॥ १७॥
सर्वपूज्याय ज्येष्ठाय ज्येष्ठानां ज्येष्ठमूर्तये ।
ज्येष्ठराजतमायैव मात्रे पित्रे नमो नमः ॥ १८॥
ब्रह्मणां पतये तुभ्यं ब्रह्मभ्यो ब्रह्मदायिने ।
ब्रह्मणां ब्रह्मरूपायैकदन्ताय नमो नमः ॥ १९॥
गजाननाय देवायासुराय समभाविने ।
योगाकाराय योगिभ्यो योगदाय नमो नमः ॥ २०॥
किं स्तौमि त्वां गणाधीश शान्तीनां शान्तिरूपिणम् ।
वेदादयः शिवाद्याश्च यत्र शान्तिं प्रलेभिरे ॥ २१॥
अतस्त्वां प्रणमाम्येव सर्वेऽशं तेन विघ्नप ।
सन्तुष्टो भव मे भक्त्या स्वल्पया नाथ ते नमः ॥ २२॥
यदि त्वं वरदो मेऽसि तदा मे पुत्र आदरात् ।
भव स्वामिन् दयासिन्धो तेनाऽहं तारिता त्वया ॥ २३॥
आसुरी प्रकृतिः प्रोक्ता वेदेषु द्विरदानन ।
साऽहं कया महाभक्त्या भजिष्यामि निरन्तरम् ॥ २४॥
त्वं मे पुत्रो यदा नाथ भविष्यसि सुसिद्धिदः ।
तव मातुः कथं मायामयो बन्धः कदाचन ॥ २५॥
भक्तिं त्वच्चरणे ढुण्ढे देहि नित्यं विशेषतः ।
आसुरीं बन्धहीनां मां कुरुष्व त्वत्पदप्रियाम् ॥ २६॥
एवमुक्त्वा गणाधीशं ननाम दक्षनन्दिनी ।
दितिस्तां गणराजश्च जगाद हर्षसंयुतः ॥ २७॥
(फलश्रुतिः)
विघ्नेश उवाच ।
त्वया कृतमिदं स्तोत्रं मदीयं मत्प्रियं भवेत् ।
पठते शृण्वते देवि सर्वसिद्धिप्रदायकम् ॥ २८॥
तव पुत्रो भविष्यामि आसुरीभावनाशकः ।
त्वं भजिष्यसि मां नित्यं भक्त्या भावपरायणा ॥ २९॥
एवमुक्त्वांऽतर्दधेऽसौ विघ्नेशो ब्रह्मनायकः ।
दितिः स्वगृहमागत्य प्रणनाम पतिं स्वकम् ॥ ३०॥
इति दितिकृता श्रीविघ्नेशस्तुतिः सम्पूर्णा ॥
षोडशस्तोत्रं
- ॥ मुद्गलपुराणं सप्तमः खण्डः । अध्यायः १४ । ७.१४ १२-३०॥
- .. mudgalapurANaM saptamaH khaNDaH . adhyAyaH 14 . 7.14 12-30..
Proofread by Yash Khasbage, Preeti Bhandare