ऋषिभिः कृतं २ शिवस्तोत्रम्
ऋषय ऊचुः ।
नमः शिवाय रुद्राय कद्रुद्राय प्रचेतसे ।
मीढुष्टमाय सर्वाय शिपिविष्टाय रंहसे ॥ २७॥
प्रभूते विमले सारे ह्याधारे परमे सुखे ।
नवशक्त्याऽऽवृतं देवं पद्मस्थं भास्करं प्रभुम् ॥ २८॥
आदित्यं भास्करं भानुं रविं देवं दिवाकरम् ।
उमां प्रभां तथा प्रज्ञां सन्ध्यां सावित्रिकामपि ॥ २९॥
विस्तारामुत्तरां देवीं बोधनीं प्रणमाम्यहम् ।
आप्यायनीं च वरदां ब्रह्माणं केशवं हरम् ॥ ३०॥
सोमादिवृन्दं च यथाक्रमेण सम्पूज्य मन्त्रैर्विहितक्रमेण ।
स्मरामि देवं रविमण्डलस्थं सदाशिवं शङ्करमादिदेवम् ॥ ३१॥
इन्द्रादिदेवांश्च तथेश्वरांश्च नारायणं पद्मजमादिदेवम् ।
प्रागाद्यधोर्ध्वं च यथाक्रमेण वज्रादिपद्मं च तथा स्मरामि ॥ ३२॥
सिन्दूरवर्णाय समण्डलाय सुवर्णवज्राभरणाय तुभ्यम् ।
पद्माभनेत्राय सपङ्कजाय ब्रह्मेन्द्रनारायणकारणाय ॥ ३३॥
रथं च सप्ताश्वमनूरुवीरं गणं तथा सप्तविधं क्रमेण ।
ऋतुप्रवाहेण च वालखिल्यान्स्मरामि मन्देहगणक्षयं च ॥ ३४॥
हुत्वा तिलाद्यैर्विविधैस्तथाग्नौ पुनः समाप्यैव तथैव सर्वम् ।
उद्वास्य हृत्पङ्कजमध्यसंस्थं स्मरामि बिम्बं तव देवदेव ॥ ३५॥
स्मरामि बिम्बानि यथाक्रमेण रक्तानि पद्मामललोचनानि ।
पद्मं च सव्ये वरदं च वामे करे तथा भूषितभूषणानि ॥ ३६॥
दंष्ट्राकरालं तव दिव्यवक्त्रं विद्युत्प्रभं दैत्यभयङ्करं च ।
स्मरामि रक्षाभिरतं द्विजानां मन्देहरक्षोगणभर्त्सनं च ॥ ३७॥
सोमं सितं भूमिजमग्निवर्णं चामीकराभं बुधमिन्दुसूनुम् ।
बृहस्पतिं काञ्चनसन्निकाशं शुक्रं सितं कृष्णतरं च मन्दम् ॥ ३८॥
स्मरामि सव्यमभयं वाममूरुगतं वरम् ।
सर्वेषां मन्दपर्यन्तं महादेवं च भास्करम् ॥ ३९॥
पूर्णेन्दुवर्णेन च पुष्पगन्धप्रस्थेन तोयने शुभेन पूर्णम् ।
पात्रं दृढं ताम्रमयं प्रकल्प्य दास्ये तवार्ध्यं भगवन्प्रसीद ॥ ४०॥
नमः शिवाय देवाय ईश्वराय कपर्दिने ।
रुद्राय विष्णवे तुभ्यं ब्रह्मणे सूर्यमूर्तये ॥ ४१॥
सूत उवाच ।
यः शिवं मण्डलं देवं सम्पूज्यैवं समाहितः ।
प्रातर्मध्याह्नसायाह्ने पठेत्स्तवमनुत्तमम् ॥ ४२॥
इत्थं शिवेन सायुज्यं लभते नात्र संशयः ॥ ४३॥
इति श्रीलिङ्गमहापुराणे उत्तरभागे एकोनविंशाध्यायान्तर्गतं
ऋषिभिः कृतं शिवस्तोत्रं समाप्तम् ।
लिङ्गपुराण । उत्तरभाग । अध्याय १९/२७-४३॥
lingapurANa . uttarabhAga . adhyAya 19/27-43..
Proofread by PSA Easwaran