ऋषिभिः कृतं नीलस्तोत्रम्
ऋषय ऊचुः ।
त्वं देवः सर्वगोप्तॄणां विश्वगोप्ता सनातनः ।
विघ्नहर्ता ज्ञानदश्च धर्मरूपश्च मोक्षदः ॥ ५४॥
त्वमेव धनदः श्रीदः सर्वव्याधिनिषूदनः ।
जगतां शर्मकरणे प्रवृत्तः कनकप्रदः ॥ ५५॥
तेजसां धाम सर्वेषां सौरभेय महाबल ।
शृङ्गाग्रे धृतकैलासः पार्वतीसहितस्त्वया ॥ ५६॥
वेदस्तुत्यो वेदमयो वेदात्मा वेदवित्तमः ।
वेदवेद्यो वेदयानो वेदरूपो गुणाकरः ॥ ५७॥
गुणत्रयेभ्योऽपि परो याथात्म्यं वेद कस्तव ।
वृषस्त्वं भगवान्देव यस्तुभ्यं कुरुते त्वघम् ॥ ५८॥
वृषलः स तु विज्ञेयो रौरवादिषु पच्यते ।
यदा स्पृष्टः स तु नरो नरकादिषु यातनाः ॥ ५९॥
सेवते पापनिचयैर्निगाढप्रायबन्धनैः ।
क्षुत्क्षामं च तृषाक्रान्तं महाभारसमन्वितम् ॥ ६०॥
निर्दया ये प्रशोष्यन्ति मतिस्तेषां न शाश्वती ।
चतुर्भिः सहितं मर्त्या विवाहविधिना तु ये ॥ ६१॥
विवाहं नीलरूपस्य ये करिष्यन्ति मानवाः ।
पितॄनुद्दिश्य तेषां वै कुले नैवास्ति नारकी ॥ ६२॥
त्वं गतिः सर्वलोकानां त्वत्पिता परमेश्वरः ।
त्वया विना जगत्सर्वं तत्क्षणादेव नश्यति ॥ ६३॥
परा चैव तु पश्यन्ती मध्यमा वैखरी तथा ।
चतुर्विधानां वचसामीश्वरं त्वां विदुर्बुधाः ॥ ६४॥
चतुःशृङ्गं चतुष्पादं द्विशीर्षसप्तहस्तकम् ।
त्रिधा बद्धं धर्ममयं त्वामेव वृषभं विदुः ॥ ६५॥
तृप्तिदं सर्वभूतानां विश्वव्यापकमोजसा ।
ब्रह्म धर्ममयं नित्यं त्वामात्मानं विदुर्जनाः ॥ ६६॥
अच्छेद्यस्त्वमभेद्यस्त्वमप्रमेयो महायशाः ।
अशोच्यस्त्वमदाह्योऽसि विदुः पौराणिका जनाः ॥ ६७॥
त्वदाधारमिदं सर्वं त्वदाधारमिदं जगत् ।
त्वदाधाराश्च देवाश्च त्वदाधारं तथा मृतम् ॥ ६८॥
जीवरूपेण लोकांस्त्रीन्व्याप्य तिष्ठसि नित्यदा ॥
इति श्रीस्कन्दपुराणे नागरखण्डे एकोनषष्टितमाधिक-
द्विशततमाध्यायान्तर्गतं ऋषिभिः कृतं नीलस्तोत्रं समाप्तम् ।
स्कन्दपुराण । नागरखण्ड । अध्याय २५९/५४-६८/२॥
skandapurANa . nAgarakhaNDa . adhyAya 259/54-68/2..
Proofread by PSA Easwaran