ऋग्वेदप्रोक्ता शिवस्तुतिः
(शिवरहस्यान्तर्गते उग्राख्ये)
ऋग्वेद उवाच
सोमस्त्रिणेत्रो जनिता च दिवः
पृथिव्याश्च तथानिलाग्नयोः ॥ ४७.२॥
सूर्येन्द्रयो रश्चिमरुद्गणानां
सोमस्त्रिणेत्रो जनिता च विष्णोः ।
तस्मात्स विष्णोर्जनिता महेशः
सर्वप्रयत्नैः सततं भवद्भिः ॥ ४८॥
सेव्यः स सोमः स च मुक्तिदाता
स एव मोक्षाधिपतिश्च सत्यम् ।
तस्मान्महेशादपरं न जाने
मुक्यर्थिसेव्यं सुरवृन्दवन्द्यम् ॥ ४९॥
तस्मान्महेशं शरणं व्रजध्वं
सत्यं पुनः सत्यमिदं त्रिसत्यम् ।
स्वर्गापवर्गादिफलप्रदाता
महेश्वरान्यत्र न सर्वथैव ॥ ५०॥
असारसंसारसमुद्रमग्ना
न सर्वथा ते शिवभक्तिभाजः ।
तस्मान्महेशादपरं न जाने
मुक्यर्थिसेव्यं सुरवृन्दवन्द्यम् ॥ ५१॥
न शङ्करान्यः करुणानिधानं
न शङ्करान्योऽखिलवेदवेद्यः ।
तस्मान्महेशादपरं न जाने
मुक्यर्थिसेव्यं सुरवृन्दवन्द्यम् ॥ ५२॥
ये पूजयन्त्यन्वहमम्बिकेशं
ते गर्भभाजो न भवन्ति भूयः ।
तस्मान्महेशादपरं न जाने
मुक्यर्थिसेव्यं सुरवृन्दवन्द्यम् ॥ ५३॥
येषामनन्यं चरमं शरीरं
तेषां शिवे भक्तिरुदेति नित्यम् ।
तस्मान्महेशादपरं न जाने
मुक्यर्थिसेव्यं सुरवृन्दवन्द्यम् ॥ ५४॥
यन्माययायं विधिरद्य मोहितो
यन्मायया विष्णुरयं च मोहितः ।
तमेव भस्माङ्कितसर्ववगात्रा
भजध्वमद्यप्रभृति त्रिणेत्रम् ॥ ५५॥
संसारपाशौघविनाशहेतुं
गुणौघसेतुं मुनिमुक्तिहेतुम् ।
श्रीपार्वतीनाथमनन्यभाजो
भजध्वमद्यप्रभृति त्रिणेत्रम् ॥ ५६॥
यत्पादपद्मार्चनमात्रलभ्यो
मोक्षः समस्तैरपि दुर्लभोऽपि
श्रीपार्वतीनाथमनन्यभाजो
भजध्वमद्यप्रभृति त्रिणेत्रम् ॥ ५७॥
भजन्ति मोहेन शिवान्यमन्ये
सदा महापातकसङ्गदुष्टाः ।
भजन्ति धन्याः शिवमेकमीशं
विश्वाधिकः शङ्कर एव सत्यम् ॥ ५८॥
सत्यं ब्रवीमि ध्रुवमद्य सत्यं
सत्यं ब्रवीमि ध्रुवमद्य सत्यम् ।
रुद्राधिकत्वं प्रतिपादयामि
देवो न रुद्रादधिकोऽस्ति कश्चित् ॥ ५९॥
रुद्रस्य पुत्रः स हरिः स रुद्रा-
दाप्तः कथं स्यादधिकस्य पुत्रः ।
पुत्रः पितुः सेवक एव (नित्यं)
सोमस्त्रिणेत्रोऽस्य यतः पितास्य ॥ ६०॥
॥ इति शिवरहस्यान्तर्गते ऋग्वेदप्रोक्ता शिवस्तुतिः सम्पूर्णा ॥
- ॥ श्रीशिवरहस्यम् । उग्राख्यः सप्तमांशः । अध्यायः २२। ४७.२-६०॥
- .. shrIshivarahasyam . ugrAkhyaH saptamAMshaH . adhyAyaH 22 . 47.2-60..
Proofread by Ruma Dewan