ब्राह्मणान् प्रोक्तं शिवलिङ्गदानोपदेशम्
(शिवरहस्यान्तर्गते उग्राख्ये)
राजोवाच
धनमस्ति यथेष्टं मे मम दित्सापि जायते ।
कथं द्रव्यव्ययः कार्यो दानपात्रं च कीदृशम् ॥ ७१५॥
इति तद्वचनं श्रुत्वा धर्मज्ञा वीतमत्सराः ।
धर्मतत्वं विचार्याद्रव्यलोभपराङ्मुखाः ॥ ७१६॥
ब्राह्मणा ऊचुः
बहूनि सन्ति दानानि तेषु सर्वेषु चोत्तमम् ।
लिङ्गदानं परं दानं तत्तु सर्वार्थसाधकम् ॥ ७१७॥
लिङ्गदानेन भगवान्यथा तुष्यति शङ्करः ।
तथा नान्येन दानेन तुष्टो भवति शङ्करः ॥ ७१८॥
सर्वकामप्रदं दानं लिङ्गदानमिति श्रुतम् ।
लिङ्गदानं ततः कार्यं विधिवद्यत्नपूर्वकम् ॥ ७१९॥
तुलादानादिदानानि सर्वाण्यपि नराधिप ।
शिवलिङ्गप्रदानस्य कलां नार्हन्ति षोडशीम् ॥ ७२०॥
प्राप्तव्यं लिङ्गदानेन धर्माद्यर्थचतुष्टयम् ।
लिङ्गदानसमं दानमत एव न दृश्यते ॥ ७२१॥
सुवर्णममितं शुद्धं यस्य दानस्य दक्षिणा ।
तादृशं दानमुत्कृष्टं लिङ्गदानं श्रुतिश्रुतम् ॥ ७२२॥
शिवलिङ्गप्रदो वंश्यान्मातृतः पितृतः शतम् ।
गृहीत्वा याति सन्तुष्टः श्रीमहादेवसन्निधिम् ॥ ७२३॥
शैवेभ्य एव दातव्यं लिङ्गदानं प्रयत्नतः ।
पुरा दानरतैर्भूपैर्लिङ्गदानानि केवलम् ॥ ७२४॥
कृतानि बहुधा राजन् शिवसन्निधिकाङ्क्षिभिः ।
लिङ्गदानफलं वक्तुं ब्रह्मणापि न शक्यते ॥ ७२५॥
परं तु तत्फलं वक्तुं समर्थः पार्वतीपतिः ।
अतः कुरु नरश्रेष्ठ लिङ्गदानमनुत्तमम् ॥ ७२६॥
लिङ्गदानेन सुप्रीतो भविष्यति महेश्वरः । ७२७.१
॥ इति शिवरहस्यान्तर्गते राजाप्रति ब्राह्मणान् प्रोक्तं शिवलिङ्गदानोपदेशं सम्पूर्णम् ॥
- ॥ श्रीशिवरहस्यम् । उग्राख्यः सप्तमांशः । अध्यायः २९ शिवगौरीसंवादे काशीप्रभावकथनम् । ७१५-७२७.१॥
- .. shrIshivarahasyam . ugrAkhyaH saptamAMshaH . adhyAyaH 29 shivagaurIsaMvAde kAshIprabhAvakathanam . 715-727.1..
Notes:
About being asked by the Rājā राजा, the Brāhamaṇa-s ब्राह्मणाः deliver Upadeśa उपदेश about the Śivaliṅgadāna शिवलिङ्गदान.
Proofread by Ruma Dewan