ब्रह्माकृता ६ शिवस्तुतिः
(शिवरहस्यान्तर्गते ईशाख्ये)
ब्रह्मोवाच ।
सदयं हृदयं तवैव शम्भो
दयनीयोंऽयमिति स्मराधुना माम् ।
इयता मम तावकं मनो मे
मम तावत्प्रभवेत मुक्तये ॥ २३॥
सहमानस्त्वमेवेशो महेशो भक्तवत्सलः ।
संहरात्र महामन्युं दक्षं च सुरसत्तमान् ॥ २४॥
रक्ष जीवितदानेन लोकगुप्त्यर्थमीश्वर ।
त्वयैव सृष्टा निखिला लोकाः सर्वे चराचराः ॥ २५॥
विष्णुस्त्वत्कृपया शम्भो पालकोऽभूत्त्वदाज्ञया ।
सुरा इन्द्रादयः सर्वे अनिलानलवार्भुवः ॥ २६॥
सूर्यचन्द्रेन्द्रवरुणा वासवोश्विसुधन्विनः ।
मरुतः पितरः साध्या नागा विद्याधरादयः ॥ २७॥
किं पूरुषाप्सरःसङ्घा निरृतिर्धनपो यमः ।
मुनयो मानवा दैत्या यक्षरक्षोगणा नराः ॥ २८॥
नद्यश्च सागराः सप्तद्वीपाश्च वनराजयः ।
गरुडाः पतगाः सर्पा लोकाः सर्वे चराचराः ॥ २९॥
ग्रहर्क्षाश्च ध्रुवश्चापि रुद्रा भूताः पिशाचकाः ।
गुह्यश्च सिद्धगन्धर्वा नारदाद्या महर्षयः ॥ ३०॥
दिग्गजाः शिशुमाराद्याः कूर्माः शेषादयोऽखिलाः ।
धर्माधर्मौ तथा शास्त्रं वेदाश्च श्रुतयोऽपि च ॥ ३१॥
पुराणजालं निखिलं वैष्णवं शाम्भवं तथा ।
आगमाश्च त्वया प्रोक्ताः सर्वमेतत् त्वयावृतम् ॥ ३२॥
त्वयैव पालितं शम्भो त्वय्यन्ते लयमेष्यति ।
जगच्चक्रमिदं शम्भो भूतं भव्यं भवत्तथा ॥ ३३॥
त्वद्दयापात्रभूतं हि विवृद्धं भवतु प्रभो ।
त्वत्कोपदग्धं सकलं भूयाच्च सचराचरम् ॥ ३४॥
रक्ष देवान् सदक्षांश्च त्वत्कोपानलपीडितान् ।
महामन्यो मन्युमिमं संहरात्र मखं प्रति ॥ ३५॥
सती माया तव विभो मायी त्वं परमेश्वरः ।
कालः करोति निखिलं कालः संहरते प्रजाः ॥ ३६॥
कालेन वर्धते सर्वं कालकाल तवाज्ञया ।
कालं कञ्चित्प्रतीक्षस्व सती प्रकृतिरीश्वरी ॥ ३७॥
जाता हैमवती शम्भो त्वामायाति पतिं सती ।
भाव्येवं भूतभव्येश त्रिकालज्ञोऽसि शङ्कर ॥ ३८॥
त्वत्पादपङ्कजं स्मृत्वा सर्वदुःखक्षयो भवेत् ।
दुःखं सतीवियोगोत्थं निवर्तय महेश्वर ॥ ३९॥
त्वं वेत्सि योऽसि सोऽसीति जानास्यात्मानमात्मना ।
त्वमात्मा सर्वभूतानामन्तः शास्ता सनातनः ॥ ४०॥
ब्रह्म त्वं निर्गुणः साक्षी चेता नेता परात्परः ।
ऋतं सत्यं परं धाम भूमा सीमा विराट् स्वराट् ॥ ४१॥
सम्राट् प्रजापतिर्धाता वेदवेद्यो महेश्वरः ।
प्रणवः प्राण ईशानस्त्वत्तो नान्योऽस्ति कश्चन ॥ ४२॥
॥ इति शिवरहस्यान्तर्गते ब्रह्माकृता ६ शिवस्तुतिः सम्पूर्णा ॥
- ॥ श्रीशिवरहस्यम् । ईशाख्यः द्वादशमांशः । ७ महादेवप्रसादनम् । २३-४२ ॥
- .. shrIshivarahasyam . IshAkhyaH dvAdashamAMshaH . 7 mahAdevaprasAdanam . 23-42 ..
Notes:
Brahma ब्रह्मा eulogizes Śiva शिव; who had appeared at the devastated Dakṣādhvara दक्षाध्वर, to appease and pacify Him.
Proofread by Ruma Dewan