श्रीधर्मपुरी रामलिङ्गेश्वर सुप्रभातम्
सुप्रभातंस्तोत्रम् प्रपत्ती च
श्रीमद्धर्मपुरीनाथरामचन्द्रप्रतिष्ठित ।
उत्तिष्ठरामलिङ्गेश रक्षितव्यं जगत्रयम् ॥ १॥
उत्तिष्टोत्तिष्टगौरीश उत्तिष्ठ वृषवाहन ।
उत्तिष्ठजगदधार उदयाद्रिं गतो रविः ॥ २॥
ऐशान्यकोणगतमन्दिरगोगणेश
भक्तैर्भवान् प्रथमतः खलु वन्दनीयः ।
दन्तैकघातविनिपातितदुष्टदैत्य
श्रीरामलिङ्गसुत ते ननु सुप्रभातम् ॥ ३॥
दाक्षयणीतिप्रथमं धृतनामधेये
श्रीपार्वतीति तदनु प्रथिते ह्यपर्णे ।
विश्वेश्वरीतिपतिदत्ततदर्धदेहे
श्रीरामलिङ्गदयिते तव सुप्रभातम् ॥ ४॥
देवाधिदेवफणिभूषण नीलकण्ठ
शम्भोमहेश शशिभूषण वेदवेद्य ।
रक्ष्याःसदा सकललोक जनांस्त्वमेव
श्रीरामलिङ्गभगवन् तव सुप्रभातम् ॥ ५॥
पित्राज्ञयावनगतेन सभार्यकेण
रामेणधर्मनिरतेन हि धर्मपुर्याम् ।
त्वंगौतमी ??कतया कृतलिङ्गरूपः
श्रीरामलिङ्गभगवन् तव सुप्रभातम् ॥ ६॥
एकादशैश्चलघुरुद्रमहातिरुद्रैः
रुद्रानुवाकचमकादिक वेदघोषैः ।
आयान्तिविप्रविबुधाश्च तवार्चनाय
श्रीरामलिङ्गभगवन् तव सुप्रभातम् ॥ ७॥
गोदावरीसुजलपूर्णघटान्गृहीत्वा
भक्ताललाटसमलंकृतभस्मरेखाः ।
द्वारेऽत्रसन्ति भवतो ह्यभिषेचनार्थं
श्रीरामलिङ्गभगवन् तव सुप्रभातम् ॥ ८॥
ब्राह्मीमुहूर्तमनुगम्यविहङ्गमास्तु
अश्वत्थवृक्षमधिरुह्यजनान् स्वरावैः ।
तेचैव दर्शनफलं ननु बोधयन्ति
श्रीरामलिङ्गभगवन् तव सुप्रभातम् ॥ ९॥
तिथ्यादिकंशुकमुखात् पठतीह जीवः
तेनारदः पिकमुखात् कुरुतेऽत्र गानम् ।
भृङ्गीच नृत्यति मुदाऽत्र मयूररूपः
श्रीरामलिङ्गभगवन् तव सुप्रभातम् ॥ १०॥
चन्द्रार्कनेत्र भवतः खलु सेवनाय
चन्द्रोऽभवच्चशिरस्तव भूषणं हि ।
पादौहि रञ्जयति ते स्वकरै स्त्विहार्कः
श्रीरामलिङ्गभगवन् तव सुप्रभातम् ॥ ११॥
यत्त्वन्बरंतव तनुत्वमुपेत्य भक्त्या
भक्तप्रकीर्तितभवत् स्तुतिगीतिरावम् ।
तुष्यत्तनोतिच दिशाः श्रुतिघोषरूपं
श्रीरामलिङ्गभगवन् तव सुप्रभातम् ॥ १२॥
यस्त्वच्छरीरपदवींगमितोऽनलोऽसौ
त्वन्मन्दिरंस्वकिरणैस्तु प्रकाशयंश्च ।
त्वांसेवतेऽत्र खलु निश्चलदीपरूपः
श्रीरामलिङ्गभगवन् तव सुप्रभातम् ॥ १३॥
योमारुतस्तव तनुत्वमुपेत्य भक्तः
त्वांसेवितुं त्विह हिपूरितवेणु यष्टिः ।
शम्भोकरोति तव कीर्तिमयं स गानं
श्रीरामलिङ्गभगवन् तव सुप्रभातम् ॥ १४॥
यागौतमेन कृतगोहतिपापनाशा
गोदावरीतव जटोद्भववाहिनी च ।
त्वांसेवितुं पुरमिमां तु गताहि सैषा
श्रीरामलिङ्गभगवन् तव सुप्रभातम् ॥ १५॥
वाराणसीपुरपतेस्तवदर्शनार्थम्
विश्वश्वरेतितपतः खलु भक्तवृन्दान् ।
संरक्षितुंत्विह समुद्भवलिङ्गरूपः
श्रीरामलिङ्गभगवन् तव सुप्रभातम् ॥ १६॥
मात्रास्वरक्षणकृते ह्यवारितो यः
विघ्नान्धकारविनिवारकभानुरेषः।
तेदर्शनार्थमगजासुत ईक्षतेऽत्र
श्रीरामलिङ्गभगवन् तव सुप्रभातम् ॥ १७॥
तेजोहि यत्तव निपातितमग्निमूर्तौ
स्कन्दस्तदेवविनिघातिततारकोऽभूत् ।
षाण्मातुरःस भवतेऽत्र निरीक्षते हि
श्रीरामलिङ्गभगवन् तव सुप्रभातम् ॥ १८॥
यात्वाज्ञयैव खलु ते महिषासुराख्यं
सिंहस्थ्तिताह्यगमयत् यमराजसद्म ।
दुर्गामुदाऽत्र तव दर्शनलोलुपैषा
श्रीरामलिङ्गभगवन् तव सुप्रभातम् ॥ १९॥
त्वत्तुल्यपुत्रमभिकामयिताशिलादः
यत्त्वत्प्रसादमधिगम्यस यं ह्यवाप ।
त्वद्दर्शनायस तु ते पुरतोऽस्ति नन्दी
श्रीरामलिङ्गभगवन् तव सुप्रभातम् ॥ २०॥
यश्चाम्बुधेस्तुमथने कृतवान् सहायं
योवासुकी च गळभूषणतां गतस्ते ।
सोऽयंफणी तव सुदर्शनलोलुपोऽत्र
श्रीरामलिङ्गभगवन् तव सुप्रभातम् ॥ २१॥
यद्विश्वनाथकृतशङ्कर सुप्रभातं
प्रातस्तुये निलयमेत्य पठन्ति भक्त्या ।
तेरामलिङ्गसदनुग्रपात्रभूताः
आजीवनंहि सदभीष्टफलं लभन्ते ॥ २२॥
इति सुप्रभातं समाप्तम् ।
अथश्री धर्मपुरी श्रीरामलिङ्गेश्वरसुप्रभाताण्तर्गतं स्तोत्रम् ।
धनुषीकृतमेरुगिरीन्द्रविभो
वरचापगुणीकृतनागपते।
स्वशरीकृतविष्णुहतत्रिपुर
जयरामप्रतिष्ठितलिङ्ग शिव ॥ १॥
शिशुचन्द्रविभूषितमौळितट
घनसर्पलसद्भुजदण्डविभो।
गिरिजाप्रगतस्वकवामतनो
जयरामप्रतिष्ठितलिङ्ग शिव ॥ २॥
निजभक्तवचःपरितुष्ट हर
निजशूलविभीतयमादितते।
निजपादपवित्रितगोत्रमणे
जयरामप्रतिष्ठितलिङ्ग शिव ॥ ३॥
मदमत्तगजाजिनवस्त्रधर
स्थिरबद्धजटा भृतदेवनदे ।
धृतकान्तवपुःपरमात्मविभो
जयरामप्रतिष्ठितलिङ्ग शिव ॥ ४॥
त्रिपुरान्तकचान्धकराक्षसहन्
प्रळायान्तकभीतकृतान्त विभो ।
वरताण्डवनन्दितभक्ततते
जयरामप्रतिष्ठितलिङ्ग शिव ॥ ५॥
शिपिविष्टदिगम्बर शूलकर
शशिशेखरनागविभूषतनो ।
अवताज्जगतींनिजभक्तयुतां
जयरामप्रतिष्ठितलिङ्ग शिव ॥ ६॥
ननुधर्मपथं स्वयमाचरितुं
धृतरामवपुर्हरिणाप्रणुतः ।
शिवकेशवयोर्न हि भेद इति
जयरामप्रतिष्ठितलिङ्ग शिव ॥ ७॥
मनसावचसा वपुषा सततं
करणैश्चत्रिभिस्तव नाम जपन् ।
भवतोहि नरो निलयं लभते
जयरामप्रतिष्ठितलिङ्ग शिव ॥ ८॥
कृतयाऽर्चनयाहृतपापचयाः
जितयोगिहृदस्तवभक्त वराः ।
पटवोनिलयाधिगमे हर ते
जयरामप्रतिष्ठितलिङ्ग शिव ॥ ९॥
भवभस्म विलेपितदेहधरः
शतरुद्रविधानक पूजयिता ।
सच तुष्टिकरस्तव भक्तवरो
जयरामप्रतिष्ठितलिङ्ग शिव ॥ १०॥
हरिपादसमुद्भवदेवनदी
निजनाथगृहाधिगमेऽभिरता ।
भुवनत्रयंखलु पावयितुं
हरते निलयं गमिता सा ॥ ११॥
भवमूडमतिं तव भक्तममुं
हरपश्य सदा दयया वरद ।
निजभक्तमनोरथसिद्धिकर
जयरामप्रतिष्ठितलिङ्ग शिव ॥ १२॥
इति स्तोत्रं सम्पूर्णम् ।
अथश्री धर्मपुरी श्रीरामलिङ्गेश्वरसुप्रभाताण्तर्गता प्रपत्तिः ।
योब्रह्मादि समस्त देवविनुतो लिङ्गात्मकस्यात्मजः
यंलब्ध्वा हि मुदान्विता सुतनयं गौरी जगन्मातृका ।
यस्येष्टानुगुणंसमस्तविपदो दूरीकृता भक्तगाः
वन्देतं वररामलिङ्गतनयं श्रीविघ्ननाथं सदा ॥ १॥
अयिकरिकर्णिकमूषिकवाहन पर्वतजासुत साम्बप्रिय
नुतजनपोषकषण्मुखसेवित शङ्करचुम्बितफालतट ।
वरचतुराननदेवगणार्चितदानवभञ्जक दासरत
जयगणनायक विघ्नविनाशक धर्मपुरीजनपाल विभो ॥ २॥
यैषादुष्टनिवारणे सुनिरता भक्तार्तिनिर्हारिणी
यस्यास्त्विष्टतयाहि लब्धविभवा निष्किञ्चनाः प्राणिनः ।
मूढान्ज्ञानवतः करोति सततं या स्वप्रसादान्मुदा
वन्देधर्मपुरीस्थितां भगवतीं तां रामलिङ्गेश्वरीम् ॥ ३॥
हरनिजमूर्धजपाशजटोद्भवगौतमजासिकतोद्भव भोः
वररघुवंशकळानिधिकीर्तितराघवसेवितलिङ्गतनो।
निजवरभक्तकृताघविनाशकदासजनार्थितदानरते
जयरजनीकरभूषितशेखर धर्मपुरीविलसन्निलय ॥ ४॥
ध्यानेलीनयतीन्द्रवृन्दहृदयं सम्मोदयंश्चैकतः
वामाङ्गस्थितपार्वतीमपिनिजां संलालयंश्चान्यतः ।
स्वर्लोकाद्भुवनत्रयं जिगमिषुं गङ्गां तथा धारयन्
योभक्तान् खलु रक्षतीह वरदस्तं रामलिङ्गं भजे ॥ ५॥
भस्मोद्धूलितविग्रहोऽपिसततं भक्तेभ्य ऐश्वर्यदः
नाम्नारुद्रकमूर्तिरप्यविरतं शान्तस्वभावश्च यः ।
दारायत्तशरीरकोऽपिनियतैः संस्तूयते ऽहर्निशं
वन्देधर्मपुरी स्थितं भवहरं त्वां रामलिङ्गेश्वर ॥ ६॥
यागङ्गा चतुराननस्य कलशात् श्रीविष्णुपादं गता
यालोकत्रयपावनाय भवतो मूर्ध्नि स्थिता पावनी ।
सैषाते ह्यभिषेचनाय गमिता गोदवरीत्वं त्विह
वन्देधर्मपुरी स्थितं त्वघहरं त्वां रामलिङ्गेश्वर ॥ ७॥
ब्रह्मादिदेवमकुटाग्रमणिप्रदीप्तौ
याभ्यांहि पावित तनुर् हिमवान् नितान्तम् ।
यौरावणस्य भुकदर्पविनाशहेतू
तौरामलिङ्ग चरणौ शरणं प्रपद्ये ॥ ८॥
वेदान्तिभिःशिव भवान् प्रणतो हि ब्रह्म
यःसाङ्ख्याकै स्तु पुरुषः प्रकृतेर् विभिन्नः ।
विष्णुर्विरिञ्चिरिति नैकबुधै स्त्वमेकः
त्वांरामलिङ्ग शुभदं शरणं प्रपद्ये ॥ ९॥
योराजन्नसुलोचनः फणिधरः रामारमः शङ्करः ।
प्रार्थीराज्यप्रसाददःशशिधरः यो विश्वनाथो जयः ।
योऽसौहैमवती सुकान्तवरदः भागीरथी शेखरः
वन्देत्वां नटराज रामवरदं हीन्दूत्तमाङ्गाद्विक ॥ १०॥
ब्रह्मात्वमेव जगतः खलु सृष्टि कार्ये
विष्णुस्त्वमेव ननु सूद्धरणे च तस्य ।
रुद्रस्त्वमेवविलयी करणे च तस्य
त्वांरामलिङ्ग शुभदं शरणं प्रपद्ये ॥ ११॥
भूम्यादयोहि भवतस्तनवोऽष्टमूर्ते
निस्स्वार्थतांप्रकटयन्ति न केवलं तु ।
तेचैव लोकसुहिताय भवन्ति नूनं
त्वांरामलिङ्ग शुभदं शरणं प्रपद्ये ॥ १२॥
हेपार्वतीश वरद त्वयि भक्तिशून्यः
वेदान्तशास्त्रनिखिलागमपण्डितोयः ।
तज्जीवनंगिरिश तस्य निरर्थकं स्यात्
त्वांरामलिङ्ग शुभदं शरणं प्रपद्ये ॥ १३॥
गाणाधिपत्यमधिगन्तुमहोनु दन्ती
यत्तेप्रदक्षिणविधिं कृतवान् सुभक्तः ।
तेभक्तिशून्यमितरत्तु निरर्थकं तत्
त्वांरामलिङ्ग शुभदं शरणं प्रपद्ये ॥ १४॥
मारःशरीकृत सु पुष्पनिपातनेन
त्वत्क्रोधजन्यनिटलेक्षणवह्निदग्धः ।
मत्तस्यभक्तिरहितस्य फलं नुचैतत्
त्वांरामलिङ्ग शुभदं शरणं प्रपद्ये ॥ १५॥
नादिंह्यजो तव समैक्षत लिङ्गमूर्तेः
नान्तंच विष्णुरपि ते शिव मूर्तिमत्त्वम् ।
वेत्तुंतु कैस्तव विलासमहो नु साध्यं
त्वांरामलिङ्ग शुभदं शरणं प्रपद्ये ॥ १६॥
रामोहि धर्मनिरतो भवतश्च भक्तः
भक्तस्त्वधर्मनिरतस्त्वथरावणोऽपि ।
धर्मोऽभवद्धिविजयी भवतः प्रसादात्
त्वांरामलिङ्ग शुभदं शरणं प्रपद्ये ॥ १७॥
कैरातकेनवपुषा सुपरीक्षतः सन्
प्रापार्जुनोहि तव पाशुपतं कृपाळो ।
येनारिनशनविधावभवत्समर्थः
त्वांरामलिङ्ग शुभदं शरणं प्रपद्ये ॥ १८॥
रामस्तुशत्रुमवधीच्च तवार्चनेन
कृष्णःप्रियसुतमवाप तवार्चनेन
विष्णुःसुदर्शनमवाप तवार्चनेन
त्वांरामलिङ्ग शुभदं शरणं प्रपद्ये ॥ १९॥
सम्प्राप्यमृत्युसमयं तु मृकण्डुसूनुः
त्यक्तोयमेन भवतो नु दयां स लब्ध्वा ।
भक्तार्तिनाशनविधौत्वमहो निबद्धः
त्वांरामलिङ्ग शुभदं शरणं प्रपद्ये ॥ २०॥
दुग्धाम्बुधेःसुमथितात्तु सुरासुरैश्च
तस्माद्धिजातगरळं भवता निपीय ।
हेनीलकण्ठ जगतो विहिता सुरक्षा
त्वांरामलिङ्ग शुभदं शरणं प्रपद्ये ॥ २१॥
यःस्त्री मिषाद्धरिरमोहयदङ्ग भोस्त्वां
प्रासूतसैष भुवनारिविनाशपुत्रम् ।
सर्वाःक्रियास्तव हि लोकहिता भवन्ति
त्वांरामलिङ्ग शुभदं शरणं प्रपद्ये ॥ २२॥
बाल्यात्त्वमेवशिव मे ननु चात्मबन्धुः
नत्वां विना मम सखा हुदयङ्गतो यः ।
त्वय्येवदत्तहृदयस्तु करोमि सर्वं
त्वांरामलिङ्ग शुभदं शरणं प्रपद्ये ॥ २३॥
हेरामलिङ्ग भगवन् तव सेवनेषु
किंवा कृतं त्वयि मया त्व विचिन्त्य दोषम् ।
यस्मात्तवस्मृति पथाद्धि विसृष्ट एषः
तत्प्राप्तुमीश करवाणि किमद्य हृद्यम् ॥ २४॥
याचेत्वहं न हि धनं ननु नीलकण्ठ
कीर्तिंच नैव न तु विस्तृत सार्वभौमम् ।
याचेतु केवलमहं भवतः कृपां तां
यांचिन्तयामि भुवनाधिपतेरनूनाम् ॥ २५॥
श्रीरामलिङ्ग भगवान् वरपाठकेभ्यो
नित्यंत्वभीष्ट शुभ सौख्य फलं ददातु ।
लक्ष्मीःसमाविशतु भक्तगृहाणि भद्रा
सर्वत्रचास्तु विजयः सकलस्तु तेषाम् ॥ २६॥
॥ इति संस्कृतसाहित्यरत्नबिरुदाञ्चितस्य बुधकोटिनुतस्य
प्रथितकविपण्डितगणाग्रणीवरस्याखिलशिष्यकोटिवृन्दार्चित-
पादपद्मयुगळस्याचार्यकोरिडेराजन्नशास्त्रिणः द्वितीयपुत्रेण
कोरिडेविश्वनाथ शर्मणा विरचिता श्रीधर्मपुरीरामलिङ्गेश्वर
प्रपत्तिःसमाप्ता ॥
Composedby Koride Vishwanatha Sharma, Dharmapuri, Telangana
Proofread by Koride Vishwanatha Sharma.