द्विजप्रोक्ता दर्शनोपरान्त शिवस्तुतिः २
(शिवरहस्यान्तर्गते उग्राख्ये)
- -
तदानीं श्रीमहादेवः करुणासागरः प्रभुः ।
आविरासीद्वृषारूढः शिवाश्लिष्टवपुः शिवः ॥ ८०॥
शशाम शीतलो जातः प्रवज्लन्नपि पावकः ।
स ददर्श ततः शभ्भुं नानाप्रमथसेवितम् ॥ ८१॥
उमासंश्लिष्टवामाङ्गं वृषभारूढमव्ययम् ।
सोमसूर्याग्निनयनं सोमार्धकृतशेखरम् ॥ ८२॥
अभयप्रदमीशानं चेकितानमजं विभुम् ।
अनन्तचन्द्रप्रतिममनन्तरविसन्निभम् ॥ ८३॥
अनन्तवह्निप्रतिमं वस्तुतोऽप्रतिमं शिवम् ।
अतिसुन्दरमीशानममेयगुणसंश्रयम् ॥ ८४॥
मन्दारमालासंवीतं वृन्दारकगणार्चितम् ।
एतादृशं शिवं दृष्ट्वा प्रहृष्टहृदयो द्विजः ॥ ८५॥
मूर्धन्यञ्जलिमाधाय प्राह शम्भुं शिवार्चकः ॥ ८९॥
- -
द्विजः उवाच -
दानपात्रमहं शम्भो दानकालोऽयमीश्वर ।
दाता त्वन्नेतरो याच्यो याच्या भक्तिस्त्वयि प्रभो ॥ ९९॥
न याचे न याचे महादेव शम्भो
वरानन्यदेवानहं भक्तबन्धो ।
परन्त्वेकरूपां मदन्यैरलभ्यां
भवद्भक्तिमेकां परामीश याचे ॥ १००॥
ययैवेश भक्त्या तृणीकृत्य सर्वा-
नुपेन्द्रादिदेवानहं सर्वथापि ।
त्वदर्चापरो नित्यमव्यग्रचित्तो
निरातङ्कमेवं भवन्तं भजामि ॥ १०१॥
तवैतत्पदद्वन्द्वमिन्द्रादिवन्द्यं
सदोपेन्द्रहृत्पङ्कजारूढमीड्यम् ।
ममापि स्फुरवीश हृत्पद्ममध्ये
मुकुन्दाक्षिपद्मार्चितं वेदवेद्यम् ॥ १०२॥
महादेव विश्वेश विश्वैकवन्द्य
स्मरारे पुरारे महापातकारे ।
महेशेति नामामृतं त्वत्प्रसादा-
त्पिबत्वन्वहं साधु जिह्वा ममैषा ॥ १०३॥
विभो देव देवेश गौरीश शम्भो
यमारे गजारे भवारेऽन्धकारे ।
शिवेशेति नानामृतं त्वत्प्रसादा-
त्पिबत्वन्वहं साधु जिह्वा ममैपा ॥ १०४॥
उमाकान्त मौनेन्द्रविश्रामहेतो
जगज्जीवनानन्दधर्मैसेतो ।
निरीहेति नामामृतं त्वत्प्रसादा-
त्पिबत्वन्वहं साधु जिह्वा ममैपा ॥ १०५॥
निराकार निर्लिप्त चन्द्रार्धमौले
मुकुन्दादिवृन्दारकाराध्यमूर्ते ।
परेशेति नामामृतं त्वत्प्रसादा-
त्पिबत्वन्वहं साधु जिह्वा ममैपा ॥ १०६॥
मुनिस्वान्तपद्मप्रबोधैकभानो
स्फुरत्भालभागोत्थलीलाकृशानो ।
गिरीशेति नामामृतं त्वत्प्रसादा-
त्पिबत्वन्वहं साधु जिह्वा ममैपा ॥ १०७॥
गुणातीत कल्याणनानागुणाब्धे
वृषाधीशकेतो महापुण्यहेतो ।
सुरेशेति नामामृतं त्वत्प्रसादा-
त्पिबत्वन्वहं साधु जिह्वा ममैपा ॥ १०८॥
कृपापात्र चन्द्रानलोष्णांशुनेत्र
स्वभक्तैकमित्राद्रिकन्याकलत्र ।
उमेशेति नामामृतं त्वत्प्रसादा-
त्पिबत्वन्वहं साधु जिह्वा ममैपा ॥ १०९॥
शिव श्रीपतिस्वच्छनेत्रारविन्द-
स्फुरत्पादपद्मामितानन्तभोग ।
कृपाब्धेति (गिरीशेति) नामामृतं त्वत्प्रसादा-
त्पिबत्वन्वहं साधु जिह्वा ममैपा ॥ ११०॥
हरामेय निर्द्वन्द्व वेदान्तवेद्य
त्रिशूलिन्नुमाकान्त कर्पूरगौर ।
निरागेति नामामृतं त्वत्प्रसादा-
त्पिबत्वन्वहं साधु जिह्वा ममैपा ॥ १११॥
॥ इति शिवरहस्यान्तर्गते द्विजप्रोक्ता दर्शनोपरान्त शिवस्तुतिः २ सम्पूर्णा ॥
- ॥ श्रीशिवरहस्यम् । उग्राख्यः सप्तमांशः । अध्यायः २५। वावृत्तश्लोकाः॥
- .. shrIshivarahasyam . ugrAkhyaH saptamAMshaH . adhyAyaH 25 . vAvRRittashlokAH..
Proofread by Ruma Dewan