द्विजप्रोक्तं शिवार्चनोपदेशम् १
(शिवरहस्यान्तर्गते उग्राख्ये)
द्विजः (उवाच) ।
येनैकमपि दृष्टं स्यात् शिवलिङ्गं शिवात्मकम् ।
तस्याप्येनांसि नश्यन्ति विविधान्यपि तत्क्षणे ॥ ३९९॥
शिवलिङ्गान्यमेयानि रेवायां सन्ति सर्वतः ।
एतेषां दर्शने प्राप्ते विनश्यन्त्यघकोटयः ॥ ४००॥
वस्तुतः शिवलिङ्गस्य स्मरणेनापि सत्वरम् ।
पातकानि विनश्यन्ति विचित्राण्यमितानि च ॥ ४०१॥
शिवलिङ्गप्रदेशोत्थवायुस्पर्शोऽपि तत्क्षणे ।
विनाशयति पापानि घोराणि विविधान्यपि ॥ ४०२॥
शिवलिङ्गाश्रितं देशं यः प्राप्तुं यतते यदा ।
तदैवाखिलपापानि नश्यन्त्यस्ति हि सा श्रुतिः ॥ ४०३॥
अस्माकं शिवभक्तानां श्रुतिप्रमाण्यवादिनाम् ।
धर्माधर्मविचारार्थं श्रुतिरेवावलम्वनम् ॥ ४०४॥
शिवोक्ताः श्रुतयोऽस्माभिः शिवभक्तैः समादृताः ।
शिवलिङ्गानि दृष्टानि सायमद्य त्वयाधुना ॥ ४०५॥
अतः तव पातकानि न स्थास्यन्ति त्वयि ध्रुवम ।
यानि पापान्यनन्तानि प्रतिजन्मार्जितान्यपि ॥ ४०६॥
तानि सद्यो विनश्यन्ति सायं शङ्करदर्शनात् ।
सायङ्काले मनुष्याणां दुर्लभं शिवदर्शनम् ॥ ४०७॥
महेशदर्शनं सायं देवानामपि दुर्लभम् ।
यस्मिन्कृपा महेशस्य पूर्णा तिष्ठति सर्वदा ॥ ४०८॥
तस्य सायं महेशस्य दर्शनं भवति ध्रुवम ।
सर्वथा हतभाग्यानां पुरुषाणां दुरात्मनाम् ॥ ४०९॥
शिवस्य दर्शनं सायं प्रदोषे दुर्लभं ध्रुवम् ।
सायं दृष्ट्वा महादेवं यः पूजयति सादरम् ॥ ४१०॥
स सर्वपापनिर्मुक्तः शिवसायुज्यमेष्यति ।
प्रातमध्याह्नतः सायं निशि वा योऽर्चयेच्छिवम् ॥ ४११॥
स जन्मकोटिपापेभ्यः सद्यो मुच्येत सर्वथा ।
तावत्पापानि तिष्ठन्ति न यावच्छिवमर्चयेत् ॥ ४१२॥
पापक्षयो भाग्यवृद्धिरायुर्वृद्धिः क्षणे क्षणे ।
भवत्यवश्यं मर्त्यानां श्रीमहादेवपूजया ॥ ४१३॥
आयुरारोग्यमैश्वर्यं तत्वज्ञानमनामयम् ।
भवत्यवश्यं मर्त्यानां श्रीमहादेवपूजया ॥ ४१४॥
शत्रुनाशो दुःखनाशो मोहनाशश्च सर्वथा ।
भवत्यवश्यं मर्त्यानां श्रीमहादेवपूजया ॥ ४१५॥
विद्यावृद्धिः पुत्रवृद्धिर्वंशवृद्धिस्तथैव च ।
भवत्यवश्यं मर्त्यानां श्रीमहादेवपूजया ॥ ४१६॥
शिवलिङ्गार्चकासाध्यं न किञ्चिदपि सर्वथा ।
यत्प्रसादांशलेशस्य लेशेनापि जनार्दनः ॥ ४१७॥
वैकुण्ठं प्राप शत्रूंश्च जघानार्च्यैव शङ्करम् ।
यतन्ते यत्प्रसादार्थं विष्णुब्रह्मादयः सुराः ॥ ४१८॥
॥ इति शिवरहस्यान्तर्गते ऋषि द्विजप्रोक्तं शिवार्चनोपदेशं १ सम्पूर्णम् ॥
- ॥ श्रीशिवरहस्यम् । उग्राख्यः सप्तमांशः । अध्यायः २६ कुम्भघोणमहिमानुवर्णनम् । ३९९-४१८॥
- .. shrIshivarahasyam . ugrAkhyaH saptamAMshaH . adhyAyaH 26 kumbhaghoNamahimAnuvarNanam . 399-418..
Notes:
While speaking in context of Revāliṅgam रेवालिङ्गम् (Nārmadaliṅgam नार्मदलिङ्गम्), the Dvija द्विजः delivers Upadeśa उपदेश about merits of worshiping or even seeing / looking at a Śivaliṇga शिवलिङ्ग and about worshiping Mahādeva Śiva महादेव शिव.
Proofread by Ruma Dewan