द्विजप्रोक्तं शिवार्चनोपदेशम् ३
(शिवरहस्यान्तर्गते उग्राख्ये)
द्विज उवाच ।
विभूतिधारणं कृत्वा शिवैकशरणोऽधुना ।
सर्वाघौघनिवृत्त्यर्थं रुद्रमावर्तय द्विज ॥ ५७१॥
शिवमन्त्रसमूहोऽयं रुद्राध्यायः शिवात्मकः ।
अतस्तद्रुद्रपाठेन नश्यत्यघकुलं क्षणात् ॥ ५७२॥
नामैकमपि रुद्रस्य सर्वपापविनाशकम् ।
स्वर्गापवर्गफलदं शैवं जप्तं न संशयः ॥ ५७३॥
कृत्वाप्यघकुलं नित्यं शिवैकशरणो द्विज ।
यदि रौद्रं जपेन्मन्त्रं सर्वपापैः प्रमुच्यते ॥ ५७४॥
रुद्रस्मरणमात्रेण महापातककोटयः ।
विनश्यन्त्यनलक्रान्ताः शलभा इव तत्क्षणे ॥ ५७५॥
तावदेव हि पापानि यावन्न स्मर्यते शिवः ।
स्मृते शिवे पातकानि विनश्यन्ति बहून्यपि ॥ ५७६॥
अशैवा ये भविष्यन्ति ते महापातकालयाः ।
पापानि स्वालयं त्यक्त्वा तिष्ठन्ति न कदाचन ॥ ५७७॥
पुण्यालयेषु शैवेषु पुण्यान्येव न संशयः ।
न तिष्ठन्ति हि शैवेषु पातकानि कदाचन ॥ ५७८॥
पुण्यैकनिलयः शैवो नाश्रयः पुण्यपापयोः ।
पुण्यपापाश्रयो नैकस्तेजस्तिमिरयोरपि ॥ ५७९॥
यदा यत्रोज्ज्वलं तेजो न तत्र तिमिरं तदा ।
ततो यदा यत्र पुण्यं तदा तत्र न पातकम् ॥ ५८०॥
ततो यदा यत्र पुण्यं तदा तत्र न पातकम् ।
मृद्घटे सङ्गृहीतस्य जलस्य क्षरणं यथा ॥ ५८१॥
तथा शैवकृताघानि क्षरन्त्येव क्षणे क्षणे ।
अद्यप्रभृति भो विप्र शैवो भूत्वा शिवं यज ॥ ५८२॥
शिवः शैवकृतां पूजां प्रीत्या गृह्णाति सादरम् ।
शैवो भूत्वा बिल्वपत्रैर्यः पूजयति शङ्करम् ॥ ५८३॥
सर्वपापविनिर्मुक्तो भुक्तिं मुक्तिं च विन्दति ।
शिवलिङ्गार्चनेनैव तुष्टो भवति शङ्करः ॥ ५८४॥
सन्तुष्टः पार्वतीनाथः प्रयच्छत्येव वाञ्छितम् ।
शैवो भूत्वा महादेवं पूजय श्रद्धयान्वहम् ॥ ५८५॥
शिवपूजां कुरु प्रीत्या पातकेभ्यो भयं त्यज ।
कर्मणा मनसा वाचा भवानीरमणं यज ॥ ५८६॥
॥ इति शिवरहस्यान्तर्गते द्विजप्रोक्तं शिवार्चनोपदेशं ३ सम्पूर्णम् ॥
- ॥ श्रीशिवरहस्यम् । उग्राख्यः सप्तमांशः । अध्यायः २३। ५७१-५८६॥
- .. shrIshivarahasyam . ugrAkhyaH saptamAMshaH . adhyAyaH 23 . 571-586..
Notes:
Dvija द्विज delivers a detailed Upadeśa उपदेश about the merits worship of Rudra-Śiva रुद्र-शिव.
Proofread by Ruma Dewan