लक्ष्मीप्रोक्तं प्रदोषकाले शिवोपासनोपदेशम्
- लक्ष्मीविष्णुसंवादे -
श्रीलक्ष्मीरुवाच -
सायङ्काले महादेवः पूजनीयोऽखिलैरपि ॥ ३२७॥
कुरु भस्मोद्धूलनादि सर्वपापविनाशकम् ।
बिल्वपत्रादि सम्पाद्य यज देवोत्तमं शिवम् ॥ ३२८॥
प्रणामानि(?) कुरु प्रीत्या शरणं व्रज शङ्करम् ।
सर्वेष्वपि प्रदोषेषु पूजनीयः सदा शिवः ॥ ३२९॥
इदानीं सप्तमीयोगो विशेषेणाद्य वर्तते ।
यः सप्तमीप्रदोषेषु शङ्करं पूजयिष्यति ॥ ३३०॥
न तस्य नरकावासो दारिद्र्यं च न सर्वथा ।
प्रदोषकाले भगवान् महादेवः सुराधिपः ॥ ३३१॥
करोति ताण्डवं देवीमुपवेश्य शुभासने ।
ताण्डवाभिरतं देवं ग्रहनक्षत्रमौलिनम् ॥ ३३२॥
हृदि ध्यात्वा महादेवं पूजयस्व(?) सुरोत्तम ।
अभिषिच्य महादेवं लिङ्गरूपिणमव्ययम् ॥ ३३३॥
क्षीरेणाज्येन शुद्धैश्च जलैर्नीहारसन्निभैः ।
गृहीत्वा चन्दनं रम्यं शिवलिङ्गं समर्चय ॥ ३३४॥
एतैर्नवैर्बिल्वपत्रैरभ्यर्चय महेश्वरम् ।
धूपदीपादिकं दत्वा नैवेद्यं च समर्पय ॥ ३३५॥
प्रणामानि (?) कुरु प्रीत्या शैवं पञ्चाक्षरं जप ।
कुरु नृत्यं महादेवप्रीत्यर्थं करताडनैः ॥ ३३६॥
प्रीणयस्व महादेवं शरणं याहि शङ्करम् ।
शिवपूजार्थमालस्यं यः करिष्यति मूढधीः ॥ ३३७॥
स विहाय क्षीरमन्नं विषं पिबति सर्वथा ।
यदि त्यक्ष्यसि सायाह्ने महादेवस्य पूजनम् ॥ ३३८॥
तदा त्वया मयाप्यद्य दुःखं प्राप्यं न संशयः ।
पत्रैर्जलैर्वा मन्त्रैर्वा पूजितः परमेश्वरः ॥ ३३९॥
तुष्टो भवति गौरीशस्तमेवार्चय शङ्करम् ।
धुत्तूरकुसुमेनापि पूजितः शङ्करः स्वयम् ॥ ३४०॥
ददाति परमं स्थानं योगिनामपि दुर्लभम् ।
तस्मादुत्थाय यत्नेन पूजयस्व सदाशिवम् ॥ ३४१॥
सम्पूज्य सायं विश्वेशं निष्पापो भव सत्वरम् ।
सायङ्काले महादेवं यो नार्चयति शङ्करम् ॥ ३४२॥
स एव सर्वपापानामाश्रयो भवति ध्रुवम् ।
सायं त्यक्त्वा शङ्करस्य देवदेवस्य पूजनम् ॥ ३४३॥
यस्तिष्ठत्यापदम्भोधिमग्नोऽसौ नात्र संशयः ।
ऐश्वर्यं तु मया प्राप्तं शङ्करस्यैव पूजया ॥ ३४४॥
तादृशेन कथं त्याज्यं त्वया शङ्करपूजनम् ।
यस्मादैश्वर्यकामेन मोक्षकामेन चानध ॥ ३४५॥
कर्तव्यमनियत्नेन शङ्करस्यैव पूजनम् ।
महापातकयुक्तो वा युक्तो वा सर्वपातकैः ॥ ३४६॥
मुच्यते पातकैः सर्वैः प्रदोषे शिवपूजया ।
हितमेव मयोक्तं ते नाहितं वच्मि सर्वथा ॥ ३४७॥
॥ इति शिवरहस्यान्तर्गते कालभैरवस्तुतिः सम्पूर्णा ॥
- ॥ श्रीशिवरहस्यम् । उग्राख्यः सप्तमांशः । अध्यायः ११ । ३२७.२-३४७॥
- .. shrIshivarahasyam . ugrAkhyaH saptamAMshaH . adhyAyaH 11 . 327.2-347..
Notes:
Lakṣmī लक्ष्मी advises Viṣṇu विष्णु about worshiping Śiva शिव during the evening-dusk especially Pradoṣakāla प्रदोषकाल.
Proofread by Ruma Dewan