ऋषि अगस्त्यप्रोक्तं मृल्लिङ्गमहिमोपदेशम् २
(शिवरहस्यान्तर्गते उग्राख्ये)
अगस्त्यः (उवाच)
अतो मृन्मयलिङ्गस्य पूजनं सर्वकामदम् ।
तुष्टो भवति गौरीशो यतो मृल्लिङ्गपूजया ॥ ६५६॥
सम्पूज्य मृन्मयं लिङ्गं यो नित्यमनुमोदने(ते) ।
तद्द्वारि मत्तमातङ्गास्तिष्ठन्त्येवामिता मुने ॥ ६५७॥
मुने पार्थिवलिङ्गस्य पूजनं शङ्करप्रियम् ।
धर्मार्थकाम मोक्षाणामचिरेणैव दायकम् ॥ ६५८॥
भस्मगोमयवार्क्षादि लिङ्गान्यपि सनातन ।
पूजनीयानि यत्नेन धनधान्याभिवाञ्छिभिः ॥ ६५९॥
मुने भस्मादि लिङ्गानि मोक्षदार्न्याप वस्तुतः ।
भवन्ति भक्ततुष्ट्यर्थं धनधान्यान्नदान्यपि ॥ ६६०॥
एकैकमपि तल्लिङ्गं धनधान्यप्रदं मुने ।
मोक्षदं च तथाप्युक्तफलं भवति तत्क्षणं(क्षणात्) ॥ ६६१॥
मुने शिवार्चनं यस्माच्चतुर्वर्गफलार्थिभिः ।
शिवोददाति विष्णुत्वं सन्तुष्टो लिङ्गपूजया ॥ ६६२॥
तथा ब्रह्मत्वमिन्द्रत्वं ददात्येव महेश्वरः ।
विना तपोभिर्दानैश्च केवलं शिवपूजया ॥ ६६३॥
मुने भवन्त्यभीष्टानि श्री महेशप्रसादतः ।
यत्पादपद्ममभ्यर्च्य स्वनेत्राब्जेन केशवः ॥ ६६४॥
चक्रं च प्राप गौरीशात्पूजनीयो मुमुक्षुभिः ।
स्तुवन्ति यं सदादेवा वेदाश्चापिस्तवोन्मुखाः ॥ ६६५॥
स देवदेवो गौरीशः पूजनीयः प्रयत्नतः ।
यमाहुर्विष्णुजनकं यमाहुर्जनकं विधेः ॥ ६६६॥
यमाहुर्गिरिजानाथं यमाहुर्मन्दनान्तकम् ।
स देवदेवो गौरीशः पूजनीयः प्रयत्नतः ॥ ६६७॥
यमाहुः स्कन्दजनकं यमाहुः सर्वगं प्रभुम् ।
स देवदेवो गौरीशः पूजनीयः प्रयत्नतः ॥ ६६८॥
मुने विश्वाधिकं रुद्रं यमाहुः श्रुतयोऽखिलाः ।
स देवदेवो गौरीशः पूजनीयः प्रयत्नतः ॥ ६६९॥
मुने विश्वाधिकं रुद्रमभ्यर्च्यं सर्वकामदम् ।
परित्यज्यार्चयन्त्यन्यानमरान्पामरा नराः ॥ ६७०॥
को नु विश्वाधिकाद्रुद्रादन्यं पूजयति भ्रमात् ।
ऋते महापातकिनं पापिष्ठं नरकाश्रयम् ॥ ६७१॥
सर्वदेवोत्तमं साम्बं यो नार्चयति सन्ततम् ।
दुरात्मा स तु पापिष्ठः स सुरापः स पुल्कसः ॥ ६७२॥
शिवार्चनपरो मर्त्यो न बिभेति यमादपि ।
किं पुनर्जन्म मरणजरारोगादिभिः (तो) मुने ॥ ६७३॥
यतश्चरमदेहानां शिवे भक्तिः प्रजायते ।
ततो जन्मजरादिभ्यो न बिभेति शिवार्चकः ॥ ६७४॥
महद्भाग्यं शाम्भवानां शम्भु संसक्तचेतसाम् ।
यतः पुनर्नजन्मादिभयं तेषां महात्मनाम् ॥ ६७५॥
यस्य शैवो भवामीति बुद्धिर्भवति भाग्यतः ।
स धन्यः कृतकृत्यश्च मान्यः सर्वामरैरपि ॥ ६७६॥
धन्यानां शिवभक्तानां मतिर्निर्मलदेहिनाम् ।
यद्भाग्यं तादृशैर्भोग्यममरैरप्यपेक्षितम् ॥ ६७७॥
॥ इति शिवरहस्यान्तर्गते वसिष्ठमुनिप्रति ऋषि अगस्त्यप्रोक्तं मृल्लिङ्गमहिमोपदेशं २ सम्पूर्णम् ॥
- ॥ श्रीशिवरहस्यम् । उग्राख्यः सप्तमांशः । अध्यायः २७ मध्यार्जुनमहिमानुवर्णनम् । ६५६-६७७॥
- .. shrIshivarahasyam . ugrAkhyaH saptamAMshaH . adhyAyaH 27 madhyArjunamahimAnuvarNanam . 656-677..
Notes:
Ṛṣi Agastya ऋषि अगस्त्य delivers Upadeśa उपदेश (to Vasiṣṭha Muni वसिष्ठ मुनि) about the merits of worshiping Śiva शिव, especially through the form of Mṛnmayaliṅga/Mṛlliṅga मृन्मयलिङ्ग/मृल्लिङ्ग.
Proofread by Ruma Dewan