भृशुण्डिकृता नग्नभैरवस्तुतिः
॥ श्रीगणेशाय नमः ॥
भृशुण्ड्युवाच ।
सर्वमायाविहीनाय सर्वमायाप्रचालक ।
सर्वान्तर्यामिणे नित्यं नग्नभैरव ते नमः ॥ ३५॥
मयूरेशपरायैव मयूरपुरपालक ।
धर्मिष्ठानां सुपालाय नग्नभैरव ते नमः ॥ ३६॥
अधर्मनिरतांश्चैव बहिःकाराय देवप ।
सदा स्वानन्दनिष्ठाय नग्नभैरव ते नमः ॥ ३७॥
संस्कारयुक्तभावेन पापकर्मपरात्मनाम् ।
मयूरे दण्डकर्त्रे वै नग्नभैरव ते नमः ॥ ३८॥
महाबलधरायैव ब्रह्मादीनां प्रचालक ।
अमेयशक्तये देव नग्नभैरव ते नमः ॥ ३९॥
भुक्तिमुक्तिप्रदात्रे च धनधान्यविवर्धन ।
गाणेशानां प्रपालाय नग्नभैरव ते नमः ॥ ४०॥
प्रलये शूलमुद्यम्य ब्रह्माण्डभयकारक ।
शूलप्रोतमहाण्डाय नग्नभैरव ते नमः ॥ ४१॥
अट्टहासेन देवेन्द्रांस्तथा सन्त्रास्य चासुरान् ।
नृत्यसे गणनाथाग्रे नग्नभैरव ते नमः ॥ ४२॥
विश्वं ततं सर्वमिदं त्वयेश आद्यन्तमध्येषु महानुभाव ।
संरक्ष देवेश मयूरसंस्थानस्मान् कुरुष्व त्वमनन्यभावान् ॥ ४३॥
शूलिन्नमस्तेऽखिलकारणाय त्वद्भीतिभावेन जगत्प्रवृत्तिः ।
व्यापारयुक्तं विविधेषु नित्यं स्वस्वप्रकार्यं प्रकरोति चात्मन् ॥ ४४॥
अतस्त्वदाधारमयं परेश सुरक्ष ते भक्तियुतं कुरुष्व ।
गणेशक्षेत्रं त्वदधीनगं तुं गणेशसंस्थं कुरु ते नमो वै ॥ ४५॥
(फलश्रुतिः)
इदं स्तोत्रं महेशाना नग्नभैरवकस्य च ।
यः पठेच्छृणुयाद्वाऽपि स सर्वं प्रलभेच्छुभम् ॥ ४६॥
धनधान्यादिकं सर्वं भुक्तिमुक्तिसमन्वितम् ।
लभेदनेन देवेशास्तुविध्वं नग्नभैरवम् ॥ ४७॥
मयूरक्षेत्रत्यागश्च कदापि न भवेन्नृणाम् ।
स्तोत्रेण स्तुवतां नित्यं न किञ्चिद् दुर्लभं भवेत् ॥ ४८॥
इति भृशुण्डिकृता नग्नभैरवस्तुतिः सम्पूर्णा ॥
- ॥ मुद्गलपुराणं षष्टः खण्डः । अध्यायः २८ । ६.२८ ३५-४८॥
- .. mudgalapurANaM ShaShTaH khaNDaH . adhyAyaH 28 . 6.28 35-48..
Proofread by Yash Khasbage, Preeti Bhandare