सामवेदप्रोक्ता शिवस्तुतिः
(शिवरहस्यान्तर्गते उग्राख्ये)
सामवेद उवाच
नमो भवाय रुद्राय मोहनाय नमो नमः ।
मार्गीहिमाय शुद्धाय धुन्वते च नमो नमः ॥ ८८॥
नमो नमस्तापसाय तापसेशाय वै नमः ।
नमो नमो विशालाय श्रीपुनर्वसवे नमः ॥ ८९॥
नमः शिवाय पाराय सुपाराय नमो नमः ।
महापाराय पार्याय पारदाय नमो नमः ॥ ९०॥
धुन्वते पारविन्दाय पुरुषाय नमो नमः ।
नमः सुपुरुषार्थाय श्रीमहापुरुषाय च ॥ ९१॥
नमोऽन्नायान्नपतये एकाक्षायामितेक्षिणे ।
नमः प्रतिपदायापि नमः प्रतरिणे सदा ॥ ९२॥
नमस्त्रियम्बकायापि नमस्तस्मै कपर्दिने ।
नमो ब्रह्माधिपतये श्रीविष्णुपतये नमः ॥ ९३॥
नमोऽखिलाधिपतये विरूपाक्षाय सुन्वते ।
एक एव महारुद्रः सर्वदेवोत्तमो नमः ॥ ९४॥
न तस्मादधिकः कोऽपि सत्यमेवोच्यते मया ।
न यस्मादधिको देवो देवदेवान्महेश्वरात् ॥ ९५॥
स एव सर्वदा सेव्यः श्रीरुद्रो विश्वशासकः ।
विष्णुमुख्याः सुराः सर्वे शङ्करस्यैव किङ्कराः ॥ ९६॥
इन्द्रोपेन्द्रप्रभृतयः सर्व शङ्करकिङ्कराः ।
शिवमेवाधिक मन्ये देवदेवोत्तमं प्रभुम् ॥ ९७॥
देवोत्तमान्महादेवात्कोऽपि नास्त्यधिकः सुराः ।
देवोत्तमो महादेवः सर्वदेवनमस्कृतः ॥ ९८॥
सत्यमेतत्पुनः सत्यं सत्यमेतन्न संशयः ।
शिवः कल्याणनिलयः सर्वदेवशिखामणिः ॥ ९९॥
सत्यमेतत्पुनः सत्यं सत्यमेतन्न संशयः ।
शिव एव सदा पूज्यो भुक्तिमुक्तिफलेप्सुभिः ॥ १००॥
सत्यमेतत्पुनः सत्यं सत्यमेतन्न संशयः ।
सृष्टिस्थितिविनाशानां शिव एव हि कारणम् ॥ १०१॥
सत्यमेतत्पुनः सत्यं सत्यमेतन्न संशयः ।
तस्मै मया नमस्काराः कृताः पूर्वमघापहाः ॥ १०२॥
सर्वव्यापीति यो ज्ञेयः सोऽनन्त इति मन्महे ।
योऽनन्त इति विज्ञेयस्स तार इति मन्महे ॥ १०३॥
यत्तारमिति विज्ञेयं तत्सूक्ष्ममिति गीयते ।
यत्सूक्ष्ममिति विज्ञेयं तच्छुक्लमिति मन्यताम् ॥ १०४॥
यच्छुक्लमिति विज्ञेयं तद्धि वैद्युतमेव हि ।
यद्वैद्युतं तदेवैकं परब्रह्मेति मन्यताम् ॥ १०५॥
स एकः सर्वभूतात्मा स एको रुद्र उच्यते ।
स ईशानः स भगवान्स महेश्वर उच्यते ॥ १०६॥
स महादेव एवेशः स सदाशिव ईर्यते ।
अद्वितीयो विभुः श्रेष्ठः स एको रुद्र उच्यते ॥ १०७॥
रुद्रस्त्रियम्बको नान्यो रुद्र इत्यभिधीयते ।
सर्वव्यापी त्रिणयनस्तस्मादीशान उच्यते ॥ १०८॥
स पश्यत्यखिलाण्डानि स्वात्मसृष्टानि सर्वशः ।
सृष्टानि चाखिलाण्डानि स्वयमेषोऽवति प्रभुः ॥ १०९॥
लोकान्सङ्क्षपयते सर्वान्कल्पान्ते स्वेच्छया शिवः ।
शिवोऽयं विश्वतश्चक्षुः शिवोऽयं विश्वतोमुखः ॥ ११०॥
शिवोऽयं विश्वतोबाहुर्विश्वतस्मान्महेश्वरः ।
ततः सर्वं परित्यज्य पूजयन्तु महेश्वरम् ॥ १११॥
॥ इति शिवरहस्यान्तर्गते सामवेदप्रोक्ता शिवस्तुतिः सम्पूर्णा ॥
- ॥ श्रीशिवरहस्यम् । उग्राख्यः सप्तमांशः । अध्यायः २२। ८८-१११॥
- .. shrIshivarahasyam . ugrAkhyaH saptamAMshaH . adhyAyaH 22 . 88-111..
Proofread by Ruma Dewan