ऋषि अगस्त्यप्रोक्तं शिवार्चनोपदेशम् ३
(शिवरहस्यान्तर्गते उग्राख्ये)
अगस्त्यः (उवाच)
अत एव महादेवः पूजनीयो महर्षिभिः ।
समर्चयन्त्युमाकान्तमिन्द्रोपेन्द्रादयः सुराः ॥ २२७॥
अत्यन्तश्रद्धया देवं येऽर्चयन्ति महेश्वरम् ।
तेषामायुष्यमारोग्यमपवर्गश्च जायते ॥ २२८॥
पुण्या शिवा शिवः पुण्यः पुण्यं तिर्यक्त्रिपुण्ड्रकम् ।
शिवलिङ्गार्चनं पुण्यं पुण्यमानन्दकाननम् ॥ २२९॥
एतत्प्रातः समुत्थाय स्मर्तव्यं पुण्यपञ्चकम् ।
स्मरणेनास्य सततं जायते पुण्यवान्नरः ॥ २३०॥
उमासहायमित्यादिवेदमन्त्रैः शिवः प्रगे ।
स्मर्तव्यः सततं विप्रैः सर्वसिध्यर्थमादरात् ॥ २३१॥
शिव शङ्कर गौरीश विश्वनाथ महेश्वर ।
देवोत्तमेति नामानि प्रातर्जप्यानि सज्जनैः ॥ २३२॥
भवानी स्कन्दजननी गौरी शङ्करवल्लभाम् ।
शिवेति प्रातरुत्थाय स्मर्तव्या जगदम्बिका ॥ २३३॥
प्रातः कालान्यकालेऽपि शिव शम्भो महेश्वर ।
महादेवेति नामानि जपनीयानि सज्जनैः ॥ २३४॥
स्मर्तव्यः कीर्तनीयश्च जपनीयश्च शङ्करः ।
यतस्तत्स्मरणादीनि मुक्तिदानि महामुने ॥ २३५॥
तन्मनो येन मनसा स्मर्यन्ते पार्वतीपतिः ।
सा जिह्वा कीर्त्यते साम्बः सततं जिह्वया यया ॥ २३६॥
स हस्तो येन हस्तेन बिल्वैः सम्पूज्यते शिवः ।
तच्छिरो येन शिरसा नम्यते भगवान् शिवः ॥ २३७॥
तौ पादौ यौ शिवक्षेत्रे भक्त्या पर्यटतो मुदा ।
स पुण्यो येन वा काश्यां स्वशरीरं समर्पितम् ॥ २३८॥
पद्भ्यां प्रदक्षिणाः कार्याः सावधानं शिवालये ।
हस्ताभ्यां अतियत्नेन कर्तव्यं शङ्करार्चनम् ॥ २३९॥
प्रणामाः स्वशरीरेण कर्तव्याः पार्वतीप्रभोः ।
श्रोत्राभ्यामतियत्नेन श्रोतव्याः शाङ्कराः कथाः ॥ २४०॥
नेत्राभ्यामतियत्नेन द्रष्टव्यः पूजितः शिवः ।
घ्राणेन घ्रेयममलं बिल्वपत्रं शिवार्पितम् ॥ २४१॥
जिह्वया श्रीमहादेवः कीर्तनीयः प्रयत्नतः ।
स्प्रष्टव्यं शिवलिङ्गं च श्रद्धया यत्समर्चितम् ॥ २४२॥
ध्यातव्यो मनसा नित्यमुमादेहार्धविग्रहः ।
वेदवेदान्तसंवेद्यः सर्वदा श्रीसदाशिवः ॥ २४३॥
इन्द्रियैः षड्भिरप्यार्यास्तत्तदिन्द्रियकर्मभिः ।
शिवमेवानिशं भक्त्याऽऽराधयन्ति मुमुक्षवः ॥ २४४॥
यजन्ते विविधैर्यज्ञैः शिवमेव हि याजिनः ।
यतो देवाधिदेवोऽयं यज्ञकर्मफलप्रदः ॥ २४५॥
चिन्तयन्ति महादेवं योगिनो युक्तमानसाः ।
यतो देवाधिदेवोऽयं योगकर्मफलप्रदः ॥ २४६॥
शिवात्परतरं नेति ये भजन्ति महेश्वरम् ।
ते धन्यास्ते सदाचारास्ते पूज्या धर्ममूर्तयः ॥ २४७॥
शिवनाममणिं कण्ठे सदा सन्धारयन्ति ये ।
ते धन्यास्ते सदाचारास्ते पूज्या धर्ममूर्तयः ॥ २४८॥
सन्धारयन्ति ये शुद्धं त्रिपुण्ड्रं शिवभूषणम् ।
ते धन्यास्ते सदाचारास्ते पूज्या धर्ममूर्तयः ॥ २४९॥
येषां देवगणाधीशो महेशः कुलदैवतम् ।
ते धन्यास्ते सदाचारास्ते पूज्या धर्ममूर्तयः ॥ २५०॥
येषां सर्वार्थदं नित्यं व्रतं शङ्करपूजनम् ।
ते धन्यास्ते सदाचारास्ते पूज्या धर्ममूर्तयः ॥ २५१॥
येषां शिवार्चनादन्यद्व्रतं नास्त्येव सर्वथा ।
ते धन्यास्ते सदाचारास्ते पूज्या धर्ममूर्तयः ॥ २५२॥
येषां शिवान्यदेवेषु शिवभक्तत्वधीः सदा ।
ते धन्यास्ते सदाचारास्ते पूज्या धर्ममूर्तयः ॥ २५३॥
येषां महेश्वरे साम्बे सर्वदेवोत्तमत्त्वधीः ।
ते धन्यास्ते सदाचारास्ते पूज्या धर्ममूर्तयः ॥ २५४॥
येषां चित्तं परावृत्तं महादेवान्यदर्शनात् ।
ते धन्यास्ते सदाचारास्ते पूज्या धर्ममूर्तयः ॥ २५५॥
कर्मणा मनसा वाचा नित्यमव्यभिचारतः ।
यः पूजयेन्महारुद्रं स मोक्षमधिगच्छति ॥ २५६॥
॥ इति शिवरहस्यान्तर्गते राजाप्रति ऋषि अगस्त्यप्रोक्तं शिवार्चनोपदेशं ३ सम्पूर्णम् ॥
- ॥ श्रीशिवरहस्यम् । उग्राख्यः सप्तमांशः । अध्यायः २८ मध्यार्जुनमहिमानुवर्णनम् । २२७-२५६॥
- .. shrIshivarahasyam . ugrAkhyaH saptamAMshaH . adhyAyaH 28 madhyArjunamahimAnuvarNanam . 227-256..
Notes:
Ṛṣi Agastya ऋषि अगस्त्य delivers Upadeśa उपदेश (to Rājā राजा) about worshiping Śiva शिव.
Proofread by Ruma Dewan