ऋषि अगस्त्यप्रोक्तं शिवलिङ्गस्वरूपोपदेशम्
(शिवरहस्यान्तर्गते उग्राख्ये)
सनातनः (उवाच)
शिवलिङ्गानि पूज्यानि कानि कानि मुनीश्वर ।
एतत्सर्वं विशेषेण वद मह्यं कृपानिधे ॥ २५१॥
दधीचिरुवाच
इति तद्वचनं श्रुत्वा प्रहृष्टवदनो मुनिः ।
शिवलिङ्गस्वरूपाणि वक्तुं समुपचक्रमे ॥ २५२॥
अगस्त्यः उवाच
शिवलिङ्गानि तिष्ठान्ति विविधान्युत्तमानि च ।
तत्स्वरूपाणि सर्वाणि वक्ष्ये सनातन ॥ २५३॥
शिवलिङ्गस्वरूपं तु वक्तुं यद्यपि नोचितम् ।
तथापि शिवभक्ताय तुभ्यं तत्प्रवदाम्यहम् ॥ २५४॥
शिवलिङ्गस्य महात्म्यं यस्य कस्यापि सत्वरम् ।
न वक्त्व्यं यतस्तत्तु गोपनीयं प्रयत्नतः ॥ २५५॥
यस्यास्ति श्रुतिषु श्रद्धा यस्य श्रद्धा महेश्वरे ।
तस्यैव शिवमाहात्म्ये श्रद्धा नान्यस्य सर्वथा ॥ २५६॥
यस्यास्ति शिवमाहात्म्ये श्रद्धा मुक्तिप्रदायिनी ।
तस्मै वकव्यमुत्कृष्टं शिवमाहात्म्यमादरात् ॥ २५७॥
धन्योऽसि कृतकृत्योऽसि शिवभक्तोऽसि यन्मुने ।
शङ्करानुगृहीतानां शिवे भक्तिः प्रजायते ॥ २८३॥
श्रुतिश्रद्धा तवातीव यतः शिवमयो ह्यसि ।
भक्तिरन्याहशी शम्भौ यतस्तेऽस्ति सनातन ॥ २८४॥
ततस्ते शिवलिङ्गानां माहात्म्यं प्रवदाम्यहम् ।
- -
शिवलिङ्गेषु सर्वेषु रसलिङ्गमनुत्तमम् ।
तत्र सम्पूजितः शम्भुः प्रसीदति न संशयः ॥ २८५॥
रसलिङ्गे महादेवं सम्पूज्यान्वहमादरात् ।
भुक्त्वा भोगानिहान्ते च शिवं प्राप्नोत्यसंशयम् ॥ २८६॥
हैमरौप्यादिलिङ्गेषु सम्पूज्य परमेश्वरम् ।
सर्वपापविनिर्मुक्ताः प्रयान्ति शिवमन्दिरम् ॥ २८७॥
काश्मीरलिङ्गममलं पुरा विष्णुर्यथाविधि ।
पूजयित्वा परामृद्धिं लक्ष्मीं चावाप शोभनाम् ॥ २८८॥
विधिर्मरकते लिङ्गे समभ्यर्च्य महेश्वरम् ।
सृष्टिकर्ताऽभवत्पूर्वं महादेवप्रसादतः ॥ २८९॥
हेमलिङ्गे समभ्यर्च्य महादेवं शचीपतिः ।
वृत्त्त्रं हत्वा विना यत्नात्स्वर्गं प्राप पुनर्मुदा ॥ २९०॥
वैद्रुमं लिङ्गमभ्यर्च्य योगसिध्यर्थमादरात् ।
योगिनो योगसम्पन्ना जाता भस्मविभूषणाः ॥ २९१॥
॥ इति शिवरहस्यान्तर्गते ऋषि अगस्त्यप्रोक्तं शिवलिङ्गस्वरूपोपदेशं सम्पूर्णम् ॥
- ॥ श्रीशिवरहस्यम् । उग्राख्यः सप्तमांशः । अध्यायः २७ मध्यार्जुनमहिमानुवर्णनम् । वावृत्तश्लोकाः॥
- .. shrIshivarahasyam . ugrAkhyaH saptamAMshaH . adhyAyaH 27 madhyArjunamahimAnuvarNanam . vAvRRittashlokAH..
Notes:
Ṛṣi Agastya ऋषि अगस्त्य; delivers Upadeśa उपदेश to Sanātana Muni सनातन मुनि about worshiping Śivaliṅga-s शिवलिङ्गानि made of various materials including Rasaliṅga रसलिङ्ग, Hemaliṅga हेमलिङ्ग, Raupyaliṅga रौप्यलिङ्ग, Kāśmīraliṅga काश्मीरलिङ्ग, Marakataliṇga मरकतलिङ्ग, Vaidrumaliṇga वैद्रुमलिङ्ग.
Chapter 27 further has details about worshiping the Mṛttikāliṅga मृत्तिकालिङ्ग / Mṛnmayaliṅga मृन्मयलिङ्ग / Mṛlliṅga मृल्लिङ्ग - as told by Himavān हिमवान् to his son Maināka मैनाक.
Proofread by Ruma Dewan