Nandikeshaproktam Shivanamamritam Mahimavarnanam

 नन्दिकेशप्रोक्तं शिवनामामृतम्महिमवर्णनम् 
हे विश्वेश्वर हे महेश्वर महादेवेति नामामृतं
      पीत्वा पीनतनुस्तनोति मुहुरप्यावर्तनं तस्य यः ।
कर्तुं वाञ्च्छति तत्पदाम्बुजरजःपुञ्जेन सञ्जीवनी-
      कल्पेनास्तु शिरो विभूषितमितो भीतिर्न मृत्योरपि ॥ १॥

हे कैलासनिवास हे पशुपते पाहीति नामामृतं
      पीत्वा पीनतनुस्तनोति मुहुरप्यावर्तनं तस्य यः ।
कर्तुं वाञ्च्छति तत्पदाम्बुजरजःपुञ्जेन सञ्जीवनी-
      कल्पेनास्तु शिरो विभूषितमितो भीतिर्न मृत्योरपि ॥ २॥

हे गौरीकुचकुम्भिकुम्भविलसत्काश्मीरधारारस-
      श्रीपुञ्जर्जितपादपद्म भगवन् पाहीति यो नर्तनम् ।
कर्तुं वाञ्च्छति तत्पदाम्बुजरजःपुञ्जेन सञ्जीवनी-
      कल्पेनास्तु शिरो विभूषितमितो भीतिर्न मृत्योरपि ॥ ३॥

हे गौरीरमणारुणाचलपते हे शङ्कराराधन-
      व्यासक्तामरभूरुहोत्तमतम स्वामिन्नितीशार्चनम् ।
कर्तुं वाञ्च्छति तत्पदाम्बुजरजःपुञ्जेन सञ्जीवनी-
      कल्पेनास्तु शिरो विभूषितमितो भीतिर्न मृत्योरपि ॥ ४॥

हे श्रीशैलपते मुहुः पशुपते हे शैलकन्यापते
      हे कामान्तक हे पुरान्तक इति स्मृत्वैव यो नर्तनम् ।
कर्तुं वाञ्च्छति तत्पदाम्बुजरजःपुञ्जेन सञ्जीवनी-
      कल्पेनास्तु शिरो विभूषितमितो भीतिर्न मृत्योरपि ॥ ५॥

हे काशीपुरनायकाश्रितशिवाचारव्रतप्रापक-
      व्यापारप्रियपालकाव भगवन्नित्येव यो नर्तनम् ।
कर्तुं वाञ्च्छति तत्पदाम्बुजरजःपुञ्जेन सञ्जीवनी-
      कल्पेनास्तु शिरो विभूषितमितो भीतिर्न मृत्योरपि ॥ ६॥

श्रीमन्मेरुशरासनोरुशिखरस्फारप्रभामण्डल-
      व्यासक्तामलगण्डमण्डलतल त्राहीति यो नर्तनम् ।
कर्तुं वाञ्च्छति तत्पदाम्बुजरजःपुञ्जेन सञ्जीवनी-
      कल्पेनास्तु शिरो विभूषितमितो भीतिर्न मृत्योरपि ॥ ७॥

हे मृत्युञ्जय हे सदाशिव शिवावामाङ्ग शङ्ग प्रभो
      हे शम्भो वृषभध्वजातिदयया पाहीति यो नर्तनम् ।
कर्तुं वाञ्च्छति तत्पदाम्बुजरजःपुञ्जेन सञ्जीवनी-
      कल्पेनास्तु शिरो विभूषितमितो भीतिर्न मृत्योरपि ॥ ८॥

हे विश्वाधिक भाललोचन चिरासारोरुसंसारजा-
      पारक्लेशनिशाविनाश दयया पाहीति यो नर्तनम् ।
कर्तुं वाञ्च्छति तत्पदाम्बुजरजःपुञ्जेन सञ्जीवनी-
      कल्पेनास्तु शिरो विभूषितमितो भीतिर्न मृत्योरपि ॥ ९॥

शम्भो मे जननी त्वमेव जनको भ्राता सखा मित्रमि-
      त्यालस्येन विना बदत्यनुदिनं भक्त्याऽपि यो नर्तनम् ।
कर्तुं वाञ्च्छति तत्पदाम्बुजरजःपुञ्जेन सञ्जीवनी-
      कल्पेनास्तु शिरो विभूषितमितो भीतिर्न मृत्योरपि ॥ १०॥

भो भर्ग त्रिपुरान्तक त्रिनयन श्रीनीलकण्ठ प्रभो
      शम्भो मारहरामरप्रवर मां पाहीति यो नर्तनम् ।
कर्तुं वाञ्च्छति तत्पदाम्बुजरजःपुञ्जेन सञ्जीवनी-
      कल्पेनास्तु शिरो विभूषितमितो भीतिर्न मृत्योरपि ॥ ११॥

त्वत्पादाम्बुरुहार्चनेन विजयो भाग्यानि मे जीवनं
      जीवातुश्च तदेव मे शिव शिव त्राहीति यो नर्तनम् ।
कर्तुं वाञ्च्छति तत्पदाम्बुजरजःपुञ्जेन सञ्जीवनी-
      कल्पेनास्तु शिरो विभूषितमितो भीतिर्न मृत्योरपि ॥ १२॥

प्राणिप्राणनकारणप्रवण मां प्राणप्रयाणक्षणे
      प्रक्षीणं शिवनामधेयसुधया पाहीति यो नर्तनम् ।
कर्तुं वाञ्च्छति तत्पदाम्बुजरजःपुञ्जेन सञ्जीवनी-
      कल्पेनास्तु शिरो विभूषितमितो भीतिर्न मृत्योरपि ॥ १३॥

स्वामिन्नन्नपते धनाधिपपते दुःखाब्धिमग्नं मुहुः
      लग्नं पापगणेन भग्नमनसं पाहीति यो नर्तनम् ।
कर्तुं वाञ्च्छति तत्पदाम्बुजरजःपुञ्जेन सञ्जीवनी-
      कल्पेनास्तु शिरो विभूषितमितो भीतिर्न मृत्योरपि ॥ १४॥

मामेकं शरणागतं शरणदानन्दप्रदानोद्यत
      स्वाधीनं कुरु लिङ्गपूजनरतं पाहीति यो नर्तनम् ।
कर्तुं वाञ्च्छति तत्पदाम्बुजरजःपुञ्जेन सञ्जीवनी-
      कल्पेनास्तु शिरो विभूषितमितो भीतिर्न मृत्योरपि ॥ १५॥

काश्यामेव सितत्रिपुण्ड्रनिटिलो रुद्राक्षकण्ठो मुहुः
      श्री वीरेश्वरलिङ्गपूजनरतं पाहीति यो नर्तनम् ।
कर्तुं वाञ्च्छति तत्पदाम्बुजरजःपुञ्जेन सञ्जीवनी-
      कल्पेनास्तु शिरो विभूषितमितो भीतिर्न मृत्योरपि ॥ १६॥

रुद्राक्षामितभस्मरूषिततनुः विश्वेश्वराराधनं
      कृत्वा शङ्कर चन्द्रशेखर महादेवेति यो नर्तनम् ।
कर्तुं वाञ्च्छति तत्पदाम्बुजरजःपुञ्जेन सञ्जीवनी-
      कल्पेनास्तु शिरो विभूषितमितो भीतिर्न मृत्योरपि ॥ १७॥

कृत्वा सोदकबिल्वकोमलदलैः विश्वेश्वराराधनं
      जप्त्वा शङ्करनाम जीवनपरित्यागाय यो नर्तनम् ।
कर्तुं वाञ्च्छति तत्पदाम्बुजरजःपुञ्जेन सञ्जीवनी-
      कल्पेनास्तु शिरो विभूषितमितो भीतिर्न मृत्योरपि ॥ १८॥

शम्भोर्लिङ्गसमर्चनोत्तरमयं घोरान्तरायैर्विना
      देहो यातु लयं ममेति मनसा निश्चित्य यो नर्तनम् ।
कर्तुं वाञ्च्छति तत्पदाम्बुजरजःपुञ्जेन सञ्जीवनी-
      कल्पेनास्तु शिरो विभूषितमितो भीतिर्न मृत्योरपि ॥ १९॥

यो वृन्दारकवृन्दवन्दितलसत्पादारविन्दार्चकं
      दीनं मामव शङ्कर स्मरहर व्याहारकृन्नर्तनम् ।
कर्तुं वाञ्च्छति तत्पदाम्बुजरजःपुञ्जेन सञ्जीवनी-
      कल्पेनास्तु शिरो विभूषितमितो भीतिर्न मृत्योरपि ॥ २०॥

॥ इति शिवरहस्यान्तर्गते नन्दिकेशप्रोक्तं शिवनामामृतम्महिमवर्णनं सम्पूर्णम् ॥

- ॥ श्रीशिवरहस्यम् । हराख्यः तृतीयांशः । पूर्वार्धम् । अध्यायः ४२। ६८-८७ ॥


- .. shrIshivarahasyam . harAkhyaH tRRitIyAMshaH . pUrvArdham . adhyAyaH 42. 68-87 ..

Proofread by Ruma Dewan