शिवप्रोक्तं काशीमन्त्रमहिमावर्णनम्
(शिवरहस्यान्तर्गते उग्राख्ये)
श्रीशिवः (उवाच)
काशीतिवर्णयुगलं निःसृतं यन्मुखाम्बुजात् ।
तस्य संसारनिगला गलिता एव तत्क्षणे ॥ १७७॥
विवशेनापि काशीति येनैव समुदीरितम् ।
स सद्यः सकलापद्भ्यो मुच्यते नात्र संशयः ॥ १७८॥
काशीति परमं मन्त्रं सर्वमन्त्राधिदैवतम् ।
मुक्तिदं मुनयः सर्वे जपन्त्यनुदिनं मुदा ॥ १७९॥
काशीत्यमृतकल्लोललोलजिह्वा मनीषिणः ।
प्रयान्ति शिवसायुज्यं इज्यादानादिभिर्यमम्(र्विना) ॥ १८०॥
काशीति वर्णयुग्मस्य प्रभावं वेद शङ्करः ।
काशीति वर्णद्वन्द्व यद्बहुदुःखापहारकम् ॥ १८१॥
तद्विधूय द्वन्द्वदुःखं शुद्धमद्धा ददाति च ।
काशीत्युच्चरित येन परिहासेन वा यम ।
तेन स्वोपार्जितानन्तपापं नश्यत्यसंशयम् ॥ १८२॥
पापकानननाशाय काशीत्येष हुताशनः ।
परमेशेन निर्दिष्टः शिष्टः कष्टविनाशकृत् ॥ १८३॥
जन्ममृत्युजरादुःखमहारोगौषधं परम् ।
काशीति परमो मन्त्रो सन्त्रासयति पातकम् ॥ १८४॥
संसारपापमत्तेभपञ्चाननमनामयम् ।
संसारगर्तमग्नानां काशीत्येष महामनुः ॥ १८५॥
समाकर्षकरं स्पष्टं सर्वश्रेयस्करं तथा ।
संसारसर्पदष्टेन काशीति मनुमूलिका ॥ १८६॥
संसारविषशान्त्यर्थं सेवनीया मुहुर्मुहुः ।
मुक्तिकान्ताकर्षकोऽयं काशीति मनुरुत्तमः ॥ १८७॥
असकृद्वा सकृद्वापि काशीति मनुमुत्तमम् ।
यो जपेत्स महाघेभ्यः सद्य एव विमुच्यते ॥ १८८॥
यम काशीति वाग्वल्ली सुवर्णद्वन्द्वपल्लवा ।
स्वर्गापवर्गफलदा बलप्रमथनप्रिया ॥ १८९॥
काशी नाम सुधा धन्या वसुधातलवासिनाम् ।
पिबन्ति श्रद्धया सिद्धाः शमनैतां तपोधनाः ॥ १९०॥
काशीति मन्त्रराजोऽयं पुण्यराशिसमृद्धिदः ।
अनन्ताभेद्यविविधपापराशिमहाशनिः ॥ १९१॥
काशीत्वमृतमुस्कृष्टं सुराणामतिदुर्लभम् ।
पिबन्ति साधवो भक्त्या भाललोचनपूजकाः ॥ १९२॥
पीत्वाप्यमृतमाशास्य सुरा भूत्वा पुनर्नराः ।
भवन्ति न तथा काशीनामामृतनिपायिनः ॥ १९३॥
काशीत्येष महामन्त्रः श्रेष्ठोऽयममृतादपि ।
अमृतं नश्वरं यस्मादनश्वरमय मनुः ।
(अमृतं नश्वरं यस्मान्मनुरेष ह्यनश्वरः ।)
एतादृशोऽयं काशीति महामन्त्रोऽमृतात्मकः ॥ १९४॥
काशीति नामोच्चरणं सर्वाङ्गे भूतिधारणम् ।
कस्य वा मरणेऽभ्यर्णे न निर्वाणं प्रयच्छति ॥ १९५॥
काशीप्रयाणं काशीति नाम पीयूषभक्षण(सेवन)म् ।
विभूतिधारणं चेति त्रयं निर्वाणदं न किम् (दायकम्) ॥ १९६॥
॥ इति शिवरहस्यान्तर्गते शिवप्रोक्तं काशीमन्त्रमहिमावर्णनं सम्पूर्णम् ॥
- ॥ श्रीशिवरहस्यम् । उग्राख्यः सप्तमांशः । अध्यायः २९ शिवगौरीसंवादे काशीप्रभावकथनम् । १७७-१९६॥
- .. shrIshivarahasyam . ugrAkhyaH saptamAMshaH . adhyAyaH 29 shivagaurIsaMvAde kAshIprabhAvakathanam . 177-196..
Notes:
Śiva शिव describes about the merits of Varṇayugma वर्णयुग्म that forms the MantraRāja/MahāMantra ``Kāśī'' मन्त्रराज/महामन्त्र ``काशी''.
Proofread by Ruma Dewan