शिवप्रोक्तं विश्वेश्वरज्योतिर्लिङ्गार्चनोपदेशम्
(शिवरहस्यान्तर्गते उग्राख्ये)
श्रीशिवः (उवाच)
पूज्यते ध्यायते नित्यं लिङ्गं विश्वेश्वराभिधम् ।
वेदोपनिषदां सारो लिङ्गरूपमुपाश्रितः ॥ २२५॥
विश्वेश्वराभिधं प्राप्य काश्यां तिष्ठति सर्वदा ।
विश्वेश्वराख्या जिह्वाग्रे चित्ते विश्वेश्वरस्मृतिः ॥ २२६॥
विश्वेश्वरार्चनं हस्ते यस्य तस्य न यातनाः ।
विश्वेश्वरं विलासेनाप्येकदा वीक्ष्य सादरम् ॥ २२७॥
न बिभेति यमाग्रेऽपि कृतपापोऽपि सर्वथा ।
यल्लिङ्गं पार्वती भक्त्या बिल्वैःसम्पूज्य सादरम् ॥ २२८॥
मुदिताभूत्तदेवेदं लिङ्गं विश्वेश्वराभिधम् ।
यागदानादिधर्माणां फलं यल्लिङ्गदर्शनम् ॥ २२९॥
तदेवेदं परं ज्योतिर्लिङ्गं विश्वेश्वराभिधम् ।
यद्विश्वेश्वरलिङ्गस्य दर्शनं यमतर्जनम् ॥ २३०॥
तद्विश्वेश्वरलिङ्गस्य त्यागो न महतां मतः ।
यद्विश्वेश्वरलिङ्गस्य दर्शनं पापकर्षणम् ॥ २३१॥
तद्विश्वेश्वरलिङ्गस्य त्यागो न महतां मतः ।
यद्विश्वेश्वरलिङ्गस्य भजनं मोक्षसाधनम् ॥ २३२॥
तद्विश्वेश्वरलिङ्गस्य त्यागो न महतां मतः ।
स एव वाजपेयादिसर्वयागफलाश्रयः ॥ २३३॥
यः प्रेक्षते हि विश्वेशं चक्षुषा पक्ष्मपातिना ।
स एव गजदानादिमहादानविचक्षणः ॥ २३४॥
यो दद्याद्बिल्वजं पत्रं लिङ्गं विश्वेश्वराभिधे ।
स एव सर्वधर्माणां तपसामपि संश्रयः ॥ २३५॥
यो व्योमकेशं विश्वेशं सविश्वासमुपाश्रयेत् ।
तावद्दुगर्जत्यघकुलं कृतान्तश्च भटैस्सह ॥ २३६॥
यावन्नाभ्यर्च्यते भक्त्या लिङ्गं विश्वेश्वराभिधम् ।
तावत्तिष्ठति मर्त्येषु घोरसंसारशृङ्खला ॥ २३७॥
यावन्नाभ्यर्चितं भक्त्या लिङ्गं विश्वेश्वराभिधम् ।
तावद्दुःखानि सर्वाणि भुज्यन्ते मनुजैः सदा ॥ २३८॥
यावन्नाभ्यर्चितं भक्त्या लिङ्गं विश्वेश्वराभिधम् ।
तावन्मरणसन्त्रासस्तावज्जन्मभयं महत् ॥ २३९॥
यावन्नाभ्यर्चितं भक्त्या लिङ्गं विश्वेश्वराभिधम् ।
ताद्दुर्भगता तावन्नानारोगोद्भवं भयम् ॥ २४०॥
॥ इति शिवरहस्यान्तर्गते शिवप्रोक्तं विश्वेश्वरज्योतिर्लिङ्गार्चनोपदेशं सम्पूर्णम् ॥
- ॥ श्रीशिवरहस्यम् । उग्राख्यः सप्तमांशः । अध्यायः २९ शिवगौरीसंवादे काशीप्रभावकथनम् । २२५-२४०॥
- .. shrIshivarahasyam . ugrAkhyaH saptamAMshaH . adhyAyaH 29 shivagaurIsaMvAde kAshIprabhAvakathanam . 225-240..
Notes:
Śiva शिव describes about the merits of worshiping the Viśveśvara Jyotirliṅga / Viśveśvaraliṅga विश्वेश्वरज्योतिर्लिङ्ग / विश्वेश्वरलिङ्ग at Kāśī काशी.
Proofread by Ruma Dewan