शिवशङ्करस्तुतिः
परशुराम उवाच -
नमस्ते देवदेवेश नमस्ते परमेश्वर ।
नमस्ते जगतो नाथ नमस्ते त्रिपुरान्तक ॥ १॥
नमस्ते सकलाध्यक्ष नमस्ते भक्तवत्सल ।
नमस्ते सर्वभूतेश नमस्ते वृषभध्वज ॥ २॥
नमस्ते सकलाधीश नमस्ते करुणाकर ।
नमस्ते सकलावास नमस्ते नीललोहित ॥ ३॥
नमः सकलदेवारिगणनाशाय शूलिने ।
कपालिने नमस्तुभ्यं सर्वलोकैकपालिने ॥ ४॥
श्मशानवासिने नित्यं नमः कैलासवासिने ।
नमोऽस्तु पाशिने तुभ्यं कालकूटविषाशिने ॥ ५॥
विभवेऽमरवन्द्याय प्रभवे ते स्वयम्भुवे ।
नमोऽखिलजगत्कर्मसाक्षिभूताय शम्भवे ॥ ६॥
नमस्त्रिपथगाफेनभासिगार्द्धन्दुमौलिने ।
महाभोगीन्द्रहाराय शिवाय परमात्मने ॥ ७॥
भस्मसंच्छन्नदेहाय नमोऽर्काग्नीन्दुचक्षुषे ।
कपर्दिने नमस्तुभ्यमन्धकासुरमर्द्दिने ॥ ८॥
त्रिपुरध्वंसिने दक्षयज्ञविध्वंसिने नमः ।
गिरिजाकुचकाश्मीरविरञ्जितमहोरसे ॥ ९॥
महादेवाय महते नमस्ते कृत्तिवाससे ।
योगिध्येयस्वरूपाय शिवायाचिन्त्यतेजसे ॥ १०॥
स्वभक्तहृदयाम्भोजकर्णिकामध्यवर्त्तिने ।
सकलागमसिद्धान्तसाररूपाय ते नमः ॥ ११॥
नमो निखिलयोगेन्द्रबोधनायामृतात्मने ।
शङ्करायाखिलव्याप्तमहिम्ने परमात्मने ॥ १२॥
नमः शर्वाय शान्ताय ब्रह्मणे विश्वरुपिणे ।
आदिमध्यान्तहीनाय नित्यायाव्यक्तमूर्त्तये ॥ १३॥
व्यक्ताव्यक्तस्वरूपाय स्थूलसूक्ष्मात्मने नमः ।
नमो वेदान्तवेद्याय विश्वविज्ञानरूपिणे ॥ १४॥
नमः सुरासुरश्रेणिमौलिपुष्पार्चिताङ्घ्रये ।
श्रीकण्ठाय जगद्धात्रे लोककर्त्रे नमोनमः ॥ १५॥
रजोगुणात्मने तुभ्यं विश्वसृष्टिविधायिने ।
हिरण्यगर्भरूपाय हराय जगदादये ॥ १६॥
नमो विश्वात्मने लोकस्थितिव्यापारकारिणे ।
सत्त्वविज्ञानरूपाय पराय प्रत्यगात्मने ॥१७॥
तमोगुणविकाराय जगत्संहारकारिणे ।
कल्पान्ते रुद्ररूपाय परापरविदे नमः ॥ १८॥
अविकाराय नित्याय नमः सदसदात्मने ।
बुद्धिबुद्धिप्रबोधाय बुद्धीन्द्रियविकारिणे ॥ १९॥
वस्वादित्यमरुद्भिश्च साध्यरुद्राश्विभेदतः ।
यन्मायाभिन्नमतयो देवास्तस्मै नमोनमः ॥ २०॥
अविकारमजं नित्यं सूक्ष्मरूपमनौपमम् ।
तव यत्तन्न जानन्ति योगिनोऽपि सदाऽमलाः ॥ २१॥
त्वामविज्ञाय दुर्ज्ञेयं सम्यग्ब्रह्मादयोऽपि हि ।
संसरन्ति भवे नूनं न तत्कर्मात्मकाश्चिरम् ॥ २२॥
यावन्नोपैति चरणौ तवाज्ञानविघातिनः ।
तावद्भ्रमति संसारे पण्डितोऽचेतनोऽपि वा ॥ २३॥
स एव दक्षः स कृती स मुनिः स च पण्डितः ।
भवतश्चरणाम्भोजे येन बुद्धिः स्थिरीकृता ॥ २४॥
सुसूक्ष्मत्वेन गहनः सद्भावस्ते त्रयीमयः ।
विदुषामपि मूढेन स मया ज्ञायते कथम् ॥ २५॥
अशब्दगोचरत्वेन महिम्नस्तव साम्प्रतम् ।
स्तोतुमप्यनलं सम्यक्त्वामहं जडधीर्यतः ॥ २६॥
तस्मादज्ञानतो वापि मया भक्त्यैव संस्तुतः ।
प्रीतश्च भव देवेश ननु त्वं भक्तवत्सलः ॥ २७॥
॥ इति ब्रह्माण्डपुराणान्तर्गता परशुरामप्रोक्ता शिवशङ्करस्तुतिः ॥
ब्रह्माण्डपुराणम् ॥ मध्यभागः ३ - उपोद्घातपादः ।
अध्यायः २५ - जाम्दग्नेयकृतशिवस्तुतिः । ५ - ३१ ॥
Encoded and proofread by Ruma Dewan