मङ्कणककृता शिवस्तुतिरेवं सिद्धेश्वरलिङ्गवर्णानम्
ईश्वरः -
तत्प्रतीच्यां महादेवि प्रभासं नाम विश्रुतम् ।
प्रभासे वेनिका नाम नदी पुण्यप्रदा शुभा ॥ १॥
तत्र शैववरा नित्यं भसितोद्धूलने रताः ।
त्रिपुण्ड्रभालाः सततमन्यपुण्ड्रविवर्जिताः ॥ २॥
रुद्राक्षकवचाः सर्वे पञ्चाक्षरपरायणाः ।
रुद्राध्यायार्थकथनप्रवणाः शरणा मयि ॥ ३॥
मम लिङ्गार्चकाः सर्वे बिल्वपत्रादिसाधनैः ।
तैः शिवानर्पितं वारि फलं वा नोपभुज्यते ॥ ४॥
षट्सहस्रं मुनीन्द्राणां प्रभासे समवस्थितम् ।
तत्र मङ्कणको नाम पुरा सिद्धोऽभवन्मुनिः ॥ ५॥
तेन सिद्धेश्वरं लिङ्गं त्रिकालेषु समर्चितम् ।
बिल्वपत्रैश्च कल्हारैर्नीलैर्नीलोत्पलैरपि ॥ ६॥
नैवेद्यैः फलमूलादिकल्पितैः परमेश्वरि ।
सदा ममाराधनकृत् स मां तुष्टाव शङ्करि ॥ ७॥
सिद्धेशं सर्वसिद्धीनामाकरं भुवनेश्वरि ॥
---
मङ्कणकः -
सिद्धेश सिद्धगणपूज्यपदाब्जयुग्ममद्यैतदेकमनिशं दयया ददस्व ।
मुग्धेन्दुचूड मयि सिद्धिगणं त्वदीयैः (?) सिद्धोऽस्मि मोचय महाघसुपाशबद्धम् ॥ ८॥
बुद्धिं प्रसारय महेश सुखाय शम्भो त्वत्पादपूजनविधौ दृढभक्तियुक्ताम् ।
सक्तां सुदारतनयादिधनादिकेषु धान्येषु गोषु गृहवर्णगणेषु मुक्तिम् ॥ ९॥
देहि प्रसीद परमेश्वर पञ्चवक्त्र लोकेशमेति निखिलं सहभूतवर्गैः ।
वैमानिकाश्च सकलाः ससुराश्च लोकाः कालस्त्वमीश वडवामुखसन्निभोऽब्धौ ॥ १०॥
क्षेत्रोत्तमं मुनिवरैः सेवितं शाम्भवोत्तमैः ।
तत्र सिद्धेश्वरं नाम्ना लिङ्गं मुक्तिप्रदं मम ॥ ११॥
मद्भासनाकर्षणेन प्रभासमिति विश्रुतम् ।
हरिब्रह्मरुद्रेन्द्रसाम्राज्यजालं निकृष्टं तदुत्कृष्टकष्टैकनिष्ठम् ।
ममेशानलिङ्गार्चनध्यानतुष्टस्य लक्षस्थलिक्षायिता देववर्गाः ॥ १२॥
---
ईश्वरः -
इति मङ्कणकेनेशि संस्तुतोऽहं मुदा तदा ।
तमाहूय मुनिं सिद्धं सिद्धयस्तेऽभवंस्त्वयि ॥ १३॥
इति मत्तो वरं लब्ध्वा स तु मङ्कणको द्विजः ।
स्वकरात्पयसो धारां निःसृतां ददृशेऽम्बिके ॥ १४॥
सिद्धिः प्राप्तेसि च मया तस्य हर्षोऽजनि दुतम् ।
ननर्त सिद्धलिङ्गाग्रे करतालैः स शाम्भवः ॥ १५॥
---
मङ्कणकः -
स्वामिन्नन्नपते धनाधिपपते हे शैलकन्यापते हे
कामान्तक हे पुरान्तक महादेवेश मां पालय ।
हे विश्वेश्वर भर्ग देव भगवन् हे चारुचामीकर-
स्फाराकारशशीरशोभित महासिद्धेश सिद्धिप्रद ॥ १६॥
हे भीमामरनायकाखिलमहापापेरुतापं हर
रुद्रोग्रामितशङ्कर त्रिपुरजापारव्यथां संहर ।
हे कालान्तक कालकाल भवहन् कालाद्भयं संहार
हे गङ्गोत्तमसङ्गरङ्गितजटाभारार्धचन्द्रस्फुर ॥ १७॥
कर्पूरोज्वलभूतिभूष भगवन् मां सर्वदा पालय
हे भोगीश्वरकङ्कण प्रमथयानाथे प्रसीदाधुना ।
हे विश्वान्तक विश्वमेतदधुना त्वत्तो विभो निःसृतं
पाहि त्वं परमेश्वरेश कृपया त्वन्मायया कल्पितम् ॥ १८॥
हे लिङ्गार्चनजातनन्दितनिजानन्दैकमोदप्रद हे ।
बिल्वादिदलोत्तमाङ्ग भगवन् मत्सिद्धिदातार्चने ॥ १९॥
---
ईश्वरः -
इत्थं ननर्त स मुनिः सिद्धिविस्मापितस्तदा ।
तेन वृत्तेन सकलं जगन्नृत्तपरं भवत् ॥ २०॥
सोद्विग्नास्त्रिदशाः सर्वे मुनिं ते ददृशुस्तदा ।
निमीलिताक्षं ध्यायन्तं सानन्दजललोचनम् ॥ २१॥
ब्रह्मोपेन्द्रेन्द्रविबुधान्नैवापश्यत्तदाऽम्बिके ।
सिद्धेश्वराग्रतः सर्वे स्तुवन्तं मां सुरास्तदा ॥ २२॥
सदा सब्रह्मकाः सर्वे सिद्धेशं मां प्रणम्य च ।
बिल्वैः सम्पूज्य मां सर्वे प्रार्थयन्ति तदा सुराः ॥ २३॥
---
देवाः -
भो शम्भो त्रिपुरान्तकान्तक महादेवेश विश्वाधिक
विश्वाशास्य दयानिधे त्रिजगतां नाथ प्रसीदाव नः ।
भो भर्गामरधीर वीर भगवन् पाहीन्दुमौळे सुरान्
नृत्ये तेन मुनीश्वरेण भुवनं नृत्यन्विनम्येद्ध्रुवम् ॥ २४॥
अयं मङ्कणकः सिद्धः सिद्धेश तव दर्शनात् ।
सिद्धिं परमिकां प्राप्तस्तेन नृत्यानि मोहितः ॥ २५॥
तं निवारय लोकेश लोकानां स्थितिहेतवे ।
तद्ब्रह्मणो वचः श्रुत्वा सिद्धरूप्यहमागतः ॥ २६॥
---
ईश्वरः -
जटामण्डलशोभाढ्यस्त्रिपुण्ड्रनिटिलोल्लसन् ।
रुद्राक्षहारवलयः कङ्कणाद्यैश्च शोभितः ॥ २७॥
भसितोद्धूलितवपुः स्वर्णवेत्रलसत्करः ।
शङ्खखड्गादिकलितकुण्डलैः शोभिवक्त्रकः ॥ २८॥
पादुकाविलसत्पादो मेखलां पादलम्बिनीम् ।
दधड्डमरुकं देवि नादयन्डरबरोऽम्बरम् ॥ २९॥
पादकङ्कणभूतस्य फणिनः श्वासफूत्कृतैः ।
वैनतेयमहापक्षकृतपीडो महेश्वरि ॥ ३०॥
तस्याग्रतः स्थितो देवि सिद्धेशोऽहं मुनेस्तदा ।
स मुनिर्विस्मयाविष्टो मां प्रणम्य तदा स्थितः ॥ ३१॥
पश्यतस्तस्य मेऽङ्गुष्ठो देवि सन्ताडितो मया ।
तस्माच्च भस्मनो राशिरुदभूत पर्वतोपमः ॥ ३२॥
देवा मङ्कणकः शैवा अद्भुतं ददृशुस्तदा ।
नृत्तादुपारमद्विप्रो मया प्रोक्तः स मङ्कणः ॥ ३३॥
गच्छ मङ्कण सिद्धिस्ते मत्प्रसादात्परा तव ।
मैव ते विस्मयो भूयादेतल्लिङ्गं हि सिद्धिदम् ॥ ३४॥
प्रभासे पावने क्षेत्रे यो वा को वाऽपि मानवः ।
नियतः संवसेदत्र तस्य सिद्धिः परा भवेत् ॥ ३५॥
सिद्धिप्रदमिदं लिङ्गं सिद्धेशाख्यं तु कामदम् ।
दर्शनादस्य लिङ्गस्य सर्वाः सिद्ध्यन्ति सिद्ध्यः ॥ ३६॥
प्रभासे मत्प्रसादेन सिद्धलिङ्गमुदीक्ष्य च ।
मत्सायुज्यमवाप्नोति देवि सत्यं वदामि ते ॥ ३७॥
॥ इति शिवरहस्यान्तर्गते प्रभासक्षेत्रमाहात्म्ये मङ्कणककृता शिवस्तुतिरेवं सिद्धेश्वरलिङ्गवर्णानम् ॥
- ॥ श्रीशिवरहस्यम् । भर्गाख्यः पञ्चमांशः । अध्यायः ३४॥ -
- .. shrIshivarahasyam . bhargAkhyaH panchamAMshaH . adhyAyaH 34.. -
Notes:
Prabhas Shiva Kshetra, is abode to Siddheshwara (Siddhesha) Linga and is located on the banks of River Venika (Vena). The story of Siddha Muni Mankanaka is narrated here; whereby, Shiva granted that worship at Siddheshwara Linga in Prabhas Kshetra would result in prompt acquisition of Siddhies and benefit of Shiva-Sayujya.
The shloka numbers have been maintained per the source text.
Proofread by Ruma Dewan